வீட்டைவிட்டு வெளியேறித் திருமணம் செய்துகொள்ளும் இளம் வயதினரை அரசு எப்படித் தடுக்க முடியும்? போக்சோ சட்ட முறைகேடு குறித்து உச்ச நீதிமன்றம் சரமாரி கேள்வி!

புதுடில்லி, ஜூலை 15- காதலித்து வீட்டை விட்டு வெளியேறி திருமணம் செய்து கொள்ளும் இளம் வயதினரை அரசு எப்படித் தடுக்க முடியும் என்று கேள்வி எழுப்பியுள்ள உச்ச நீதிமன்றம், போக்சோ (POCSO) சட்டம் தவறாகப் பயன்படுத்தப்படுவது குறித்து தனது கடுமையான கவலையை வெளிப்படுத் தியுள்ளது.

வழக்கின் பின்னணி என்ன?

கடந்த 2023-ஆம் ஆண்டு, 17 வயது சிறுமியைக் காதலித்து, வீட்டை விட்டு வெளியேறி திருமணம் செய்து கொண்ட 25 வயது இளைஞர் மீது போக்சோ சட்டத்தின் கீழ் வழக்குப் பதிவு செய்யப்பட்டது.

இந்த வழக்கை விசாரித்த கொல்கத்தா உயர் நீதிமன்றம், “இளம் பெண்கள் தங்களின் பாலியல் உணர்வுகளைக் கட்டுப்படுத்திக் கொள்ள வேண்டும்” என்று சர்ச்சைக்குரிய தீர்ப்பை வழங்கியது.

இந்தத் தீர்ப்பை எதிர்த்து உச்ச நீதிமன்றம் தாமாக முன்வந்து வழக்குப் பதிவு செய்து, கொல்கத்தா உயர் நீதிமன்றத்தின் அந்த சர்ச்சைக்குரிய கருத்துகளை ரத்து செய்தது.

உச்ச நீதிமன்றத்தில் தற்போதைய விசாரணை

இந்த வழக்கு நீதிபதிகள் பி.வி.நாகரத்னா மற்றும் ஆர். மகா தேவன் அடங்கிய அமர்வில் மீண்டும் விசாரணைக்கு வந்தது.விசாரணையின் போது மூத்த வழக்குரைஞர் மாதவி திவான் ஆஜராகி பின்வரும் முக்கிய விவரங்களை முன்வைத்தார்.

சம்பந்தப்பட்ட சிறுமி, தற்போது தனது 25 வயது கணவருடன் (முன்னாள் காதலன்) குழந்தை பெற்றுக்கொண்டு மகிழ்ச்சியாக வாழ்ந்து வருகிறார்.

அதே நேரத்தில், போக்சோ சட்டம் இது போன்ற வழக்குகளில் தவறாகப் பயன்படுத்தப்படுவதைத் தடுக்க ஒரு முறையான கட்டமைப்பு உருவாக்கப்பட வேண்டும்.

நீதிபதிகள் எழுப்பிய
முக்கிய கேள்விகள்

வழக்கை விசாரித்த நீதிபதிகள் அமர்வு, சட்டம் மற்றும் சமூக எதார்த்தம் குறித்த மிக முக்கியமான சில கருத்துகளைப் பகிர்ந்து கொண்டனர்.

“15 முதல் 18 வயது என்பது மிகவும் உணர்வுப்பூர்வமான பருவம். இந்த வயதில் ஏற்படும் ஒவ்வொரு காதல் உறவையும் போக்சோ சட்டத்தின் கீழ் கொண்டுவந்து வழக்காகக் கருத முடியுமா? இளம் வயதினர் ஒருவருக்கொருவர் சம விருப்பத்துடன் காதலித்து ஓடிப் போவதை அரசுதான் எப்படி தடுக்க முடியும்?”

மேலும், குடும்ப கவுரவத்தைக் காப்பதற்காகவே பெரும்பாலான பெற்றோர்கள் இது போன்ற காதல் திருமணங்கள் மீது குற்றவியல் வழக்குகளைப் பதிவு செய்வதை ஒரு வழக்கமாக வைத்துள்ளனர் என்றும் நீதிபதிகள் சுட்டிக்காட்டினர்.

அடுத்த கட்டம்

மனிதாபிமான மற்றும் சட்ட ரீதியான பல்வேறு கோணங்களை உள்ளடக்கிய இந்த வழக்கின் அடுத்தகட்ட விசாரணையை உச்ச நீதிமன்றம் வரும் ஜூலை 17-ஆம் தேதிக்கு ஒத்திவைத்துள்ளது.