பெரியார் மணியம்மை அறிவியல் மற்றும் தொழில் நுட்ப நிறுவனத்தின் (நிகர்நிலை பல்கலை.) 34ஆம் பட்டமளிப்பு விழா

பெண்கள் – விஞ்ஞானிகள், பொறியாளர்கள், கட்டடக் கலைஞர்கள், ஆராய்ச்சியாளர்கள், தொழில்முனைவோர், நிர்வாகிகள், நீதிபதிகள், கல்வியாளர்கள் மற்றும் தலைவர்களாக இருக்கவேண்டும்!
சென்னை உயர்நீதி மன்ற நீதியரசர் ஏ.டி.ஜெகதீஷ் சந்திரா உரை

தஞ்சாவூர், செப்.21 பெரியார் மணியம்மை அறிவியல் மற்றும் தொழில்நுட்ப நிறுவனத்தின் 34 ஆவது பட்டமளிப்பு விழா பல்கலைக்கழக உள்விளையாட்டரங்கத்தில் நடை பெற்றது.

பல்கலைக்கழக இணை துணைவேந்தர் பேராசிரியர் ஆர்.மல்லிகா பட்டமளிப்பு விழாவில் கலந்துகொண்ட  வேந்தர் டாக்டர் கி.வீரமணி அவர்களையும் சிறப்பு விருந்தினர் மாண்பமை சென்னை உயர்நீதிமன்ற நீதியரசர் ஏ.டி.ஜெகதீஷ் சந்திரா அவர்களையும்  வரவேற்றார்.  மேலும், இந்நிகழ்வில் கலந்துகொண்டு சிறப்பிக்கும் அனைத்துச் சிறப்பு விருந்தினர்கள் அன்பிற்குரிய பெற்றோர்கள், முன்னாள் மாணவர்கள், ஊடகவியலாளர்கள் மற்றும் நலம் விரும்பிகள் அனைவரையும் வரவேற்றார்.

தொடர்ந்து அவர் தமது உரையில் ‘‘இந்தத் தருணம் எல்லாவற்றிற்கும் மேலாக மாணவ, மாணவிகளைக் கொண்டாடும் ஒரு தருணமாகும். இது பல ஆண்டுகால அறிவுசார் ஈடுபாடு, தொடர் முயற்சி, விடாமுயற்சி மற்றும் நோக்கமுள்ள கற்றல் ஆகியவற்றின் விளைவுகளாகும். நீங்கள் இந்த நிறுவனத்தின் எல்லையைக் கடந்து பரந்த உலகிற்குள் நுழையும்போது, இந்நிறுவனத்தின் சமூகப் பொறுப்புணர்வு, புதுமை, நேர்மை மற்றும் நிலைத்தன்மைக்கான உறுதியான அர்ப்பணிப்பு ஆகியவற்றை வரையறுக்கும் நிலையான விழுமியங்களையும் உங்களுடன் எடுத்துச் செல்கிறீர்கள்.

உங்கள் கல்வி உங்களைச் சிந்திக்கும் திறன் கொண்டவர் களாகவும், பொறுப்புடன் செயல்படுவர்களாகவும், துணிச் சலுடன் புதுமைகளைப் படைப்பவர்களாகவும், சமூகத்திற்கு அர்த்தமுள்ள பங்களிப்பை அளிப்பவர்களாகவும் மாற்றியமைக்கட்டும்.

2025 – 2026 ஆம் கல்வியாண்டிற்கான ஆண்டறிக்கையைச் சமர்ப்பிப்பதில் நான் பெருமிதம் கொள்கிறேன். இவ்வறிக்கை, நமது கல்விசார் முன்னேற்றங்கள், ஆராய்ச்சி முயற்சிகள், புலமைசார் சாதனைகள், நிறுவன அங்கீகாரங்கள் மற்றும் நமது மாணவர்கள் மற்றும் ஆசிரியர்களின் சிறப்பான சாதனைகளை உள்ளடக்கியுள்ளது. உயர்கல்வியின் பல்வேறு பரிமாணங்களில் அர்த்தமுள்ள முன்னேற்றத்தைக் கண்ட இவ்வாண்டு, சிறந்த விளங்குதல், புத்தாக்கம், அறிவுசார் வளர்ச்சி மற்றும் நிறுவன மாற்றம் ஆகியவற்றில் நமது கூட்டு அர்ப்பணிப்பை மீண்டும் உறுதிப்படுத்துகிறது.

1. பல்வேறு துறைகளைச் சேர்ந்த மொத்தம் 1,811 பட்டதாரிகளுக்குப் பட்டங்கள் வழங்கப்படுகின்றன. இதில் 1,383 இளங்கலை, 410 முதுகலை மற்றும் 18 முனைவர் பட்ட ஆய்வாளர்கள் அடங்குவர்.
2. சிறப்பான கல்விசார் சாதனைகளை அங்கீகரிக்கும் வகையில், பல்கலைக்கழகம் மொத்தம் 121 பதக்கங்களை வழங்குகிறது. 49 தங்கப் பதக்கங்கள், 40 வெள்ளிப் பதக்கங்கள் மற்றும் 32 வெண்கலப் பதக்கங்கள்.
3. நாங்கள் பி.காம் (நிதித் தொழில்நுட்பம்) என்ற புதிய பாடத்திட்டத்தை அறிமுகப்படுத்தியுள்ளோம். மேலும் தகவல் தொடர்பு தொழில்நுட்பக் கருவிகள் (அய்சிடி டுல்ஸ்) கட்டமைப்பை பல்கலைக்கழகம் செயல்படுத்தியுள்ளது. இது கற்பவர்களுக்கு அதிக நெகிழ்வுத்தன்மையும், படிப்படியான கல்விப் பாதைகளையும் வழங்குகிறது.
4. தொடர்ச்சியான கல்விச் சீர்திருத்தங்கள் மற்றும் பாடத் திட்ட மாற்றங்களின் ஒரு பகுதியாக, பன்முறை நுழைவு மற்றும் பன்முறை வெளியேறும் முறை (MEME) கட்டமைப்பை பல்கலைக்கழகம் செயல்படுத்தியுள்ளது. இது கற்பவர்களுக்கு அதிக சுதந்திரத் தன்மையையும், படிப்படியான கல்வி வழிகளையும் வழங்குகிறது.
5. அனைத்துப் பாடத்திட்டங்களையும் அய்க்கிய நாடுகள் சபையின் நிலையான வளர்ச்சி இலக்குகளுடன் (UN Sustainable Development Goals) ஒருங்கிணைப்பதன் மூலம், கல்வியின் உலகளாவிய மற்றும் கலாச்சாரப் பரிமாணங்களை நாங்கள் வலுப்படுத்தியுள்ளோம்.
6. கற்பித்தல், கற்றல், மதிப்பீடு, ஆராய்ச்சி மற்றும் தரவுப் பாதுகாப்பு ஆகியவற்றை உள்ளடக்கிய விரிவான நிறுவன அளவிலான செயற்கை நுண்ணறிவு (AI) கட்டமைப்பின் மூலம் நமது கல்விச் சூழலில் செயற்கை நுண்ணறிவை ஒருங்கிணைத்துள்ளோம். பல்வேறு துறைகளிலும் செயற்கை நுண்ணறிவை இணைக்கும் வகையில் நமது பாடத்திட்டங்கள் பணிபுரிய ஏற்றதாக நவீனப்படுத்தப்பட்டுள்ளன. இது நமது பட்டதாரிகளைத் தொழில்நுட்பத் திறன் மிக்கவர்களாக மாற்ற உதவுகிறது.
7. ஒரே இடத்தில் மாணவர்கள் ஒரே நேரத்தில் இயக்கிய அதிக எண்ணிக்கையிலான கையால் செய்யப்பட்ட கிளைடர்கள் (Gliders) மூலம் விமானப் போக்குவரத்து கல்வியில் நாங்கள் ஒரு முக்கிய சாதனையைப் படைத்துள்ளோம். மொத்தம் 1,932 பள்ளி மாணவர்கள் இணைந்து 966 கிளைடர்களை விண்ணில் செலுத்தினர். இச்சாதனை ஆசியா புக் ஆஃப் ரெக்கார்ட்ஸ் (Asia Book of Records) மற்றும் இந்தியா புக் ஆஃப் ரெக்கார்ட்ஸ் (India Book of Record) ஆகியவற்றின் அங்கீகாரத்தைப் பெற்றுள்ளது.

8.எங்கள் ஆராய்ச்சிக் சூழல் தொடர்ந்து செழித்து வருகிறது. பல்வேறு துறைகளைச் சேர்ந்த அறிஞர்களால் 26 புத்தகங்கள், 486 புத்தக அத்தியாயங்கள் மற்றும் 35 மாநாட்டு ஆய்வறிக்கைகள் வெளியிடப்பட்டுள்ளன. இதழ்களில் 203 க்கும் மேற்பட்ட ஆய்வுக் கட்டுரைகள் இடம் பெற்றுள்ளன. இத்தகைய கல்விசார் பங்களிப்புகள், எங்கள் வளர்ந்து வரும் ஆராய்ச்சி கலாச்சாரம், பல்துறைசார் ஈடுபாடு மற்றும் அறிவு உருவாக்கத்திற்கான அர்ப்பணிப்பு ஆகியவற்றை வெளிப்படுத்துகின்றன.

9. தஞ்சாவூர் மாவட்டம் மனோராவில் அமையவுள்ள பன்னாட்டு (கடல்பசு) பாதுகாப்பு (International Dugong Conservation Centre) விரிவான திட்ட அறிக்கையை (DPR)ரூ.41 கோடி மதிப்பீட்டில் நிறைவு செய்ததன் மூலம் நாங்கள் ஒரு குறிப்பிடத்தக்க மைல்கல்லை எட்டியுள்ளோம்.
10. செயற்கை நுண்ணறிவு (AI), இணையப் பாதுகாப்பு (Cyber Security), IOT தரவு மேகக் கணினி தொழில்நுட்பம் (Data Cloud Technology),  டிஜிட்டல் தடயவியல் (Digital Forensics), இரட்டை பட்டப் படிப்புகள், தொழிற்பயிற்சி (Internship),  உடபொதிக்கப்பட்ட அமைப்புகள் (Embeded Systems),  நூலக வலைப்பின்னல்கள் மற்றும் வடிவமைப்பு புத்தாக்கம் (Design innovation)  உள்ளிட்ட வளர்ந்து வரும் தொழில்நுட்பம், கல்வி மற்றும் தொழில் துறைகளில் 10 முக்கிய புரிந்துணர்வு ஒப்பந்தங்களில் (MoUs) நாங்கள் கையெழுத்திட்டுள்ளோம். இக்கூட்டு முயற்சிகள், கல்வி-தொழில் துறை இடையிலான வலுவான தொடர்புகள், வளர்ந்து வரும் தொழில்நுட்பங்கள், குறித்த மாணவர்களின் புரிதல், அனுபவப்பூர்வமான கற்றல் மற்றும் தொழில்பயிற்சி வாய்ப்புகள் ஆகியவற்றை மேம்படுத்தியுள்ளன; அத்துடன் கூட்டுப் புத்தாக்கம் மற்றும் எதிர்காலத்திற்குத் தயாரான கல்விக்கான புதிய வழிகளையும் திறந்துள்ளன.
11. எங்கள் கல்விசார் உள்கட்டமைப்பு மற்றும் அறிவு வளங்களை வலுப்படுத்தும் நோக்கில், பெரியார் அறிவு மய்யம் (Periyar Knowledge Centre) கூடுதல் தளங்கள் (3 மற்றும் 4-ஆவது தளங்கள்) மூலம் விரிவுபடுத்தப்பட்டுள்ளது.
12. வேலைவாய்ப்புத் திறனுக்கான பயிற்சித் திட்டம் (Finishing School of Employability Programme) மூலம் மாணவர்களுக்குத் தரவுப் பகுப்பாய்வு (Data Analytics) மற்றும் மென் திறன்கள் (Soft Skills) ஆகியவற்றில் வெற்றிகரமாகப் பயிற்சி அளித்து, அவர்களின் தன்னம்பிக்கை, திறன்கள் மற்றும் பணி உலகிற்கான தயார்நிலையை மேம்படுத்தியதற்காக, இன்ஃபோசிஸ் சிஎஸ்ஆர் அறக்கட்டளையிடமிருந்து (Infosys CSR Foundation)  பாராட்டுச் சான்றிதழைப் பெற்றதில் நாங்கள் பெருமிதம் கொள்கிறோம்.

13 புது டில்லியைச் சேர்ந்த சிறீ பகவான் மகாவீர் விக்லாங் சகாயதா சமிதி (Shree Bhagwan Mahaveer Viklang Sahayata Samiti)  அமைப்புடன் இணைந்து, தஞ்சாவூரில் 2026 மார்ச் 19 முதல் 21 வரை ஜெய்ப்பூர் ஃபூட் (Jaipur Foot) மற்றும் உதவி உபகரணங்கள் வழங்கும் முகாம் நடத்தப்பட்டது. மூன்று நாட்கள் நடைபெற்ற இந்த முகாமில் 957 மாற்றுத்திறனாளிகள் பயனடைந்தனர். செயற்கை உறுப்புகள், சக்கர நாற்காலிகள், மூன்று சக்கர வாகனங்கள், செவித்திறன் கருவிகள் கால்களுக்கான தாங்கிகள் (Calipers) மற்றும் வாக்கர்கள் (Walkers) உள்ளிட்ட 1,150 உதவி உபகரணங்கள் அவர்களின் தனிப்பட்ட தேவைகளுக்கு ஏற்ப வழங்கப்பட்டு பொருத்தப்பட்டன.

14. நிலையான வளர்ச்சிக்கான தனது உறுதிபாட்டை வெளிப்படுத்தும் விதமாக பல்கலைக்கழகத்தில் தனது தொழில்நுட்பக் கட்டடம் – I (Technology block – I) பகுதியில் 220 kw திறன் கொண்ட மின் தொகுப்புடன் இணைக்கப்பட்ட (Grid – tied) மேற்கூரை சூரிய மின்சக்தி நிலையத்தை நிறுவியுள்ளது. இதன் மூலம்  மின்சாரப் பயன்பாட்டில் சுமார் 30 சதவிகிதம் சேமிப்பு எட்டப்பட்டுள்ளது. சுற்றுச்சூழலுக்கு உகந்த இந்த முக்கிய முன்னெடுப்பு புதுப்பிக்கத்தக்க ஆற்றல், ஆற்றல் திறன், சுற்றுச்சூழல் பாதுகாப்பு மற்றும் நிலையான எதிர்காலம் ஆகியவற்றின் மீதான பல்கலைக்கழகத்தின் அர்ப்பணிப்பை வெளிப்படுத்தியது.

பட்டம் பெறும் மாணவர்கள் அனைவருக்கும் பிரகாசமான மற்றும் நோக்கமுள்ள எதிர்காலம் அமைய எனது வாழ்த்துகளைத் தெரிவித்துக்கொள்கிறேன்’’ எனக் கூறினார்.

விழாவில் சிறப்பு விருந்தினர் மாண்பமை சென்னை உயர்நீதி மன்ற நீதியரசர் திரு. A.D.ஜெகதீஷ் சந்திரா அவர்கள், தனது விழாப் பேருரையில் ‘‘பெரியார் மணியம்மை அறிவியல் மற்றும் தொழில்நுட்ப நிறுவனத்தின் 34 ஆவது பட்டமளிப்பு விழாவில் கலந்து கொள்வது எனக்கு மிகுந்த பெருமையும் மகிழ்ச்சியும் அளிக்கிறது’’ எனக் கூறினார்.

‘‘பல்கலைக்கழக நிர்வாகிகள், ஆசிரியர்கள், நிர்வாகப் பணியாளர்கள், பெற்றோர்கள் மற்றும் அனைத்து விருந்தினர்களுக்கும் எனது வாழ்த்துகளைத் தெரிவித்துக்கொள்கிறேன்.

பட்டம் பெறுகின்ற மாணவ, மாணவியர்களுக்கு எனது உளமார்ந்த வாழ்த்துகளைத் தெரிவித்துக்கொள்கிறேன்.

இன்றைய நாள் உங்கள் கல்விசார் சாதனையைக் கொண்டாடும் நாள் மட்டுமல்ல – அது சிந்தனைக்குரிய தருணமும் ஆகும். உங்கள் வாழ்க்கையின் ஒரு கட்டத்தை நிறைவு செய்து, மற்றொரு புதிய கட்டத்திற்குள் நீங்கள் நுழைகிறீர்கள் அந்தப் புதிய கட்டம் உங்கள் அறிவை மட்டுமல்லாமல், உங்களை தீர்மானிக்கும் குணநலம் மற்றும் பொறுப்புணர்வு ஆகியவற்றையும் சோதிக்கும்.

பட்டமளிப்பு விழா என்பது வெறும் ‘சடங்கு’ நிகழ்வு அல்ல. ஒரு பல்கலைக்கழகம் தனது பட்டதாரிகளிடம் நம்பிக்கையை ஒப்படைக்கும் தருணமாகும். இந்த நிறுவனத்தை விட்டு நீங்கள் வெளியேறும்போது, வேலைவாய்ப்பைப் பெறவும் தொழில்முறை வெற்றியைத் தொடரவும் உதவும் கல்வித் தகுதிகளைப் பெற்றிருப்பீர்கள். அதைவிட முக்கியமாக, எத்தகைய தொழில்முறை நிபுணராகவும், எத்தகைய குடிமகனாகவும் நீங்கள் உருவாக விரும்புகிறீர்கள் என்பதைத் தீர்மானிக்கும் வாய்ப்பை நிங்கள் பெற்றிருக்கிறீர்கள்.

வாழ்நாள் முழுவதும் தொடரும் கல்விப் பொறுப்பு பாடத்திட்டம் முடிவடைந்தவுடன் கல்வியும் முடிவடைந்துவிடுதில்லை. கல்வியின் ஆழமான நோக்கம் என்பது தெளிவாகச் சிந்திக்கவும், நியாயமாகத் தீர்மானிக்கவும், பொறுப்புடன் செயல்படவும், சமூகத்தின் தேவைகளுக்கு மனிதநேயத்துடன் பதிலளிக்கவும் கூடிய திறனை வளர்ப்பதாகும்.

நீங்கள் பொறியியல் கட்டடக்கலை, அறிவியல், தொழில்நுட்பம் கலை மேலாண்மை, கல்வி, ஆராய்ச்சி, பொதுச்சேவை, தொழில்முனைவு அல்லது வேறு ஏதேனும் துறையில் நுழையலாம்.

பெரியார் மணியம்மை அறிவியல் மற்றும் தொழில்நுட்ப நிறுவனத்திற்கென தனித்துவமான கல்வி அடையாளம் உள்ளது.

1988-ஆம் ஆண்டு பெரியார் மணியம்மை மகளிர் தொழில்நுட்பக் கல்லூரியாக தொடங்கப்பட்ட இதன் வரலாறு, அறிவியல் மற்றும் தொழில்நுட்பக் கல்வியில் பெண்களுக்கு வாய்ப்புகளை வழங்குவதற்கான ஆரம்பகாலமும் அர்த்தமுள்ளதுமான ஒரு உறுதிப்பாட்டைப் பிரதிபலிக்கிறது.

கல்வி வாய்ப்புகளை விரிவுப்படுத்தும்போது தான் அது உண்மையான மாற்றத்தை உருவாக்குகிறது என்பதால் இந்த நிறுவனத்தின் வரலாறு சிறப்பான அங்கீகாரத்திற்குரியது.  தந்தை பெரியார் மற்றும் அன்னை மணியம்மையார் ஆகியோருடன் தொடர்புடைய இந்த நிறுவனத்தின் பாரம்பரியம், சுயமரியாதை, பகுத்தறிவுச் சிந்தனை, சமத்துவம், கண்ணியம் மற்றும் சமூக முன்னேற்றம் ஆகியவற்றிற்கு முக்கியத்துவம் அளிக்கிறது.

இந்தக் கொள்கைகள் இன்றைய உலகிலும் மிகவும் பொருத்தமானவையாக உள்ளன. பெரியாரின் தொலைநோக்குப் பார்வை, அறிவு, புதுமை மற்றும் சமூகப் பொறுப்பு ஆகியவற்றை அதன் நோக்கத்தின் மய்யமாகக் கொண்டுள்ளது. மேலும், சமத்துவமான சமூகத்தை உருவாக்கும் விரிவான இலக்கையும் அது முன்வைக்கிறது.

இன்று இங்கு பட்டம் பெறும் நீங்கள் அனைவரும் அந்த இலட்சியங்களின் உயிரோட்டமான வெளிப்பாடாக இருக்கிறீர்கள்.

இந்த நிறுவனத்தின் உண்மையான மதிப்பு, நீங்கள் இந்த வளாகத்தைவிட்டு வெளியேறிய பின்னர் உங்கள் கல்வியை எவ்வாறு பயன்படுத்துகிறீர்கள் என்பதில் வெளிப்படும்.

அரசியலமைப்புச் சட்டம் வலியுறுத்தும் நீதி

நீதித்துறையின் உறுப்பினராக இருக்கும் நான், நீதி என்பது நீதிமன்றங்களுக்கும், சட்ட நிறுவனங்களுக்கும் மட்டுமே உரிய ஒரு கருத்தல்ல என்பதை உணர்கிறேன்.

இந்திய அரசியலமைப்பின் முகவுரை நமக்கு ஓர் உயர்ந்த அறநெறி மற்றும் குடிமைப் பார்வையை முன்வைக்கிறது.

கொள்கைகள் நீங்கள் எந்தத் தொழிலில் இருந்தாலும் ஒவ்வொரு பட்டதாரிக்கும் பொருந்தக்கூடியவை.

பாதுகாப்பற்ற கட்டடத்தை வடிவமைக்கும் பொறியாளர், தனியுரிமையைப் புறக்கணிக்கும் தொழில்நுட்ப வல்லுநர், ஆதாரங்களைத் திரித்துக் காட்டும் ஆராயச்சியாளர், ஒருவருக்கு மட்டும் அநியாயமாக ஆதரவளிக்கும் நிர்வாகி அல்லது பாகுபாட்டைக் கண்டும் காணாமல் இருப்பவர் தொழில்நுட்பத் திறமை பெற்றவராக இருக்கலாம். ஆனால் இத்தகைய நடத்தை பொறுப்பான தொழில்முறை நடத்தையாகக் கருதப்பட முடியாது.

ஒவ்வொரு மனிதருக்கும் கண்ணியம் உண்டு என்பதை ஏற்றுக்கொள்வதிலிருந்தே நீதி தொடங்குகிறது.

பொறுப்புடன் கூடிய புதுமை

நீங்கள் பட்டம் பெறும் இந்தக் காலகட்டம் குறிப்பிடத்தக்க தொழில்நுட்ப மாற்றங்கள் நிகழும் காலமாகும். செயற்கை நுண்ணறிவு, ரோபோட்டிக்ஸ், தரவு அறிவியல், உயிரித் தொழில்நுட்பம், டிஜிட்டல் தகவல்தொடர்பு, புதுப்பிக்கதக்க ஆற்றல் மற்றும் தானியக்கமயமாக்கல் ஆகியவை உலகை மாற்றியமைத்து வருகின்றன.

இந்த முன்னேற்றங்கள் மிகப்பெரிய வாய்ப்புகளை வழங்குகின்றன. அவை மருத்துவ சேவைகளை மேம்படுத்தலாம்;  கல்வியை வலுப்படுத்தலாம்; அறிவியல் கண்டுபிடிப்புகளுக்கு உதவலாம்; பொதுச் சேவைகளை மேம்படுத்தலாம் புதிய வேலைவாய்ப்புகளையும் தொழில் முனைவு வாய்ப்புகளையும் உருவாக்கலாம்.

தொழில்நுட்பம் மனிதர்களுக்கு உதவ வேண்டும் அவர்களின் கண்ணியத்தைக் குறைக்கக் கூடாது. தகவல்கள் அறிவார்ந்த முடிவுகளுக்கு உதவ வேண்டும். தனியுரிமையைப் புறக்கணிப்பதற்கான காரணமாக மாறக்கூடாது. செயற்கை நுண்ணறிவு பொறுப்புணர்வு, வெளிப்படைத்தன்மை மற்றும் மனிதக் கண்காணிப்புடன் உருவாக்கப்பட வேண்டும். மிகவும் மதிப்புமிக்க புதுமை என்பது அவசியமாக மிகவும் சிக்கலானதாக இருக்க வேண்டியதில்லை. பல நேரங்களில், குறைந்த செலவில் கிடைக்கக்கூடிய நிலைத்தன்மை கொண்ட எளிதில் பயன்படுத்தக்கூடிய, சாதாரண மக்களின் வாழ்க்கையை மேம்படுத்தக்கூடிய தீர்வே சிறந்த பயனை அளிக்கும்.

மனித நலனுக்கான ஆராய்ச்சி

அறிவுசார் நேர்மையுடன் ஆராய்ச்சியை மேற்கொள்ளுமாறு நான் உங்களை ஊக்குவிக்கிறேன். ஆதாரங்களுக்கு மதிப்பளியுங்கள். உங்கள் ஆய்வின் வரம்புகளை ஏற்றுக்கொள்ளுங்கள். மற்றவர்களின் பணிக்கு உரிய அங்கீகாரம் வழங்குங்கள். வெளியீடுகள், புகழ் அல்லது நிதி ஆதாயத்திற்கான அழுத்தங்கள் உண்மையை சமரசம் செய்ய அனுமதிக்காதீர்கள். உங்கள் பணி எப்போதும் உடனடியாக கவனத்தை ஈர்க்காமல் இருக்கலாம்.மிகவும் மதிப்புமிக்க சில பங்களிப்புகள் மெதுவாகவும் அமைதியாகவும் உருவாகின்றன. எனவே, உங்கள் பணியின் மதிப்பை அதன் பிரபலத்தால் மட்டும் அளவிடாதீர்கள். அதன் பயனாலும் நேர்மையாலும் அளவிடுங்கள்.

பெண்கள் விஞ்ஞானிகள், பொறியாளர்கள், கட்டடக் கலைஞர்கள், ஆராய்ச்சியாளர்கள், தொழில்முனைவோர், நிர்வாகிகள், நிதிபதிகள், கல்வியாளர்கள் மற்றும் தலைவர்களாக இருக்கவேண்டும். நிறுவனங்களையும் சமூகங்களையும் வடிவமைக்கும் முடிவுகளில் அவர்களின் குரல்கள் கேட்கப்பட வேண்டும்.அதே நேரத்தில், சமத்துவம் என்பது அனைவருடைய பொறுப்பாகும். உண்மையாகக் கல்வி கற்ற ஒருவர். நான் என்ன சாதிக்க முடியும்? என்று மட்டும் கேட்கமாட்டார். அவர் மற்றவர்களும் தங்கள் இலக்குகளை அடைவதற்கு நியாயமான வாய்ப்பை நான் எவ்வாறு உறுதி செய்ய முடியும்? என்றும் கேட்பார்.

தொழில்முறை வாழ்க்கையில் நேர்மை

உங்கள் நம்பகத்தன்மையைப் பாதுகாத்துக் கொள்ளுங்கள்.

உங்கள் வாக்குறுதிகளைக் காப்பாற்றுங்கள்

தவறுகளை ஒப்புக்கொள்ளுங்கள்

ரகிசியமான தகவல்களைப் பொறுப்புடன் கையாளுங்கள்

மற்றவர்களின் பணிக்கு உரிய அங்கீகாரம் வழங்குங்கள்

அதிகாரத்தைத் தவறாகப் பயன்படுத்தாதீர்கள்

தொடர்ந்து கற்றுக்கொள்பவராக இருங்கள்

சுதந்திரமாகவும் ஒழுக்கத்துடனும் சிந்தியுங்கள்

உங்கள் அறிவைப் பயனுள்ளதாக மாற்றுங்கள்

திறமைக்கு அருகில் மனச்சாட்சியையும் வைத்திருங்கள்

உங்கள் தேர்வுகளுக்கான பொறுப்பை ஏற்றுக் கொள்ளுங்கள்

பெற்றோர்களையும் ஆசிரியர்களையும் நினைவுகூர்தல்

இந்த முக்கியமான தருணத்தில், உங்கள் சாதனையைச் சாத்தியமாக்கக் காரணமாக இருந்தவர்களை நினைவுகூறுமாறு நான் பட்டதாரிகளைக் கேட்டுக் கொள்கிறேன்.  நன்றியை வெளிப்படுத்துவதற்கான மிகச் சிறந்த வழி பொறுப்புடன் வாழ்வதாகும். மற்றவர்கள் உங்கள் மீது வைத்த நம்பிக்கையை நியாயப்படுத்தும் வகையில் உங்கள் நடத்தை அமையட்டும்!

தன்னம்பிக்கையுடன் இருங்கள், ஆனால் தொடர்ந்து கற்றுக்கொள்ளத் தயாராக இருங்கள். என்று கவிஞர் இரவீந்தரநாத் தாகூர் எழுதியுள்ளார்.

எங்கே மனம் அச்சமின்றி இருக்கிறதோ, அங்கே தலை நிமிர்ந்து நிற்கிறது.

உங்கள் அறிவு ஆழமானதாக இருக்கட்டும்

உங்கள் சிந்தனை சுதந்திரமானதாக இருக்கட்டும்

உங்கள் பணி நேர்மையானதாக இருக்கட்டும்

உங்கள் சேவை அர்த்தமுள்ளதாக இருக்கட்டும்.

உங்கள் கல்வி உங்களுக்கு ஒரு வாழ்வாதாரத்தை மட்டுமல்ல ஒரு உயர்ந்த          நோக்கத்தையும் வழங்கட்டும்.

தன்னம்பிக்கையுடன் முன்னேறுங்கள் அதே நேரத்தில் பணிவுடனும் இருங்கள்.

மேலும் கலைமாமணி   சுகி சிவம்  அவர்களுக்கு அவரது துறையில் (பேச்சாளர், எழுத்தாளர் மற்றும் தமிழறிஞர்) அவர் ஆற்றிய சிறப்பு மிக்க பங்களிப்புக்காக மதிப்புறு முனைவர் பட்டம் (ஹானரிஸ் காசா) இப்பல்கலைக்கழகம் வழங்கி சிறப்பித்தது.

இப்பட்டமளிப்பு விழாவில் துணை தலைவர், இணை துணைவேந்தர், பதிவாளர், தேர்வு கட்டுப்பாட்டு நெறியாளர் பல்வேறு துறைத் தலைவர்கள், பேராசிரியர்கள், பணியாளர்கள், பெற்றோர்கள் மற்றும் மாணவர்கள்  உட்பட அனைவரும் கலந்து கொண்டு சிறப்பித்தனர்.