இந்திய அரசமைப்புச் சட்டத்தை மனுஸ்மிருதியால் மாற்ற முயல்கிறார்கள்!
ஆரிய ஆதிக்க எதிர்ப்பை முன்னெடுத்தார் பெரியார்
கேரள முதலமைச்சர் பினராயி விஜயன்
சென்னை, டிச.29- வைக்கம் போராட்டம் ஒரு மதச்சார்பற்ற இயக்கம் – முன்மாதிரி யான போராட்டம்! அரசமைப்புச் சட்டத் தை மனுஸ்மிருதியால் மாற்ற முயல்கிறார்கள்! ஆரிய ஆதிக்க எதிர்ப்பை முன்னெ டுத்தார் பெரியார் என் றார் கேரள முதலமைச் சர் பினராயி விஜயன் அவர்கள்.
சென்னையில் தமிழ்நாடு முதலமைச்சர் மு.க.ஸ்டாலின் தலைமையில் நடைபெற்ற வைக்கம் சத்தியாகிரக போராட்ட நூற்றாண்டு விழாவில் கேரள முதலமைச்சர் பினராயி விஜயன் ஆற்ற தயாரிக்கப்பட்ட உரை வருமாறு:
வைக்கம் சத்தியாகிரகம் இந்திய வரலாற்றில் இணையற்ற மக்கள் இயக்கம். அதன் நூற்றாண்டு விழாவின் ஒரு பகுதி யாக நாங்கள் இங்கு கூடியுள்ளோம். வைக்கம் சத்தியா கிரகத்தில் பங்கேற்றதற்காக கேரளாவும் தமிழ்நாடும் பெருமை கொள்கின்றன. வைக்கம் சத்தியாகிரகம் மற்றும் அதன் பாரம்பரியம் என்று வரும்போது, நமது தமிழ் சகோ தரர்கள் கேரள மக்களைப் பற்றி பெருமிதம் கொள்கிறார்கள் என்பதற்கு சென்னையில் ஏற்பாடு செய்யப்பட்ட கொண் டாட்டம் ஒரு சான்றாகும். வைக்கம் சத்தியாகிரகத்தின் நூற்றாண்டை நினைவு கூரும் வகையில் இந்த சிறப்பான நிகழ்வை ஏற்பாடு செய்த எனது அன்புச் சகோதரரும் தோழருமான தமிழ்நாடு முதலமைச்சர் மு.க.ஸ்டாலினுக்கு இந்தச் சந்தர்ப்பத்தில் எனது வாழ்த்துகளைத் தெரிவித்துக் கொள்கிறேன்.
வைக்கம் போராட்டத்தின்
வரலாற்று முக்கியத்துவம்
கேரளாவில் பல மறுமலர்ச்சி இயக்கங்கள் தோன்றின. மரு மரக்கால் சமரம், அருவிப்புரம் பிரதிஷ்டை, வில்லு வண்டி சாமரம், கல்லுமலை சமரம், குருவாயூர் சத்தியாகிரகம் போன்றவை அவற்றில் அடங்கும். மறுமலர்ச்சி இயக்கங் களின் இந்த நீண்ட சங்கிலியில் வைக்கம் சத்தியாகிரகம் ஒரு முக்கிய இணைப்பு. இருப்பினும், இது தனித்துவமானது, இது மற்றவற்றிலிருந்து தனித்து நிற்கிறது. மற்ற இயக்கங் களிலிருந்து இது வேறுபட்டது; எப்படி என்றால் சமூக சீர் திருத்தத்தில் கவனம் செலுத்திய மறுமலர்ச்சி இயக்கங்களும், தேச விடுதலைக்காகப் போராடிய காலனிய எதிர்ப்பு இயக்கமும் வைக்கம் சத்தியாகிரகத்தில் ஒன்றாக இணைந்தது என்பது தான். அதுவரை, மறுமலர்ச்சி இயக்கத் தலைவர் களும், சமூக அமைப்புகளும் தனித்தனியாகவே சீர்திருத்த இயக்கங்களை நடத்தி வந்தனர். ஆனால் வைக்கம் சத்தி யாகிரக போராட்டத்தில் ஈடுபட்டவர்கள் தேசத்தின் சுதந்திரப் போராட்டத் தலைவர்களுடன் கைகோர்த்தார்கள். எனவேதான் வைக்கம் சத்தியாகிரகம் வரலாற்றில் முக்கியத் துவம் பெற்றது.
மனிதநேய விழுமியங்கள்
சீர்திருத்த இயக்கங்கள் மற்றும் அரசியல் இயக்கங்கள் என இரட்டைத் தலைமையின் கீழ் சமூக அவலங்களுக்கு எதிராக இதுபோன்ற போராட்டம் வேறு எங்கும் நடந்ததாக எனக்கு தெரியவில்லை. சிறீ நாராயண குரு, சட்டம்பி சுவாமிகள், அய்யன்காளி போன்ற மறுமலர்ச்சி இயக்க தலைவர்கள் கலங்கரை விளக்கமாக இருந்து வழிகாட்டியிருக்காவிட்டால், கேரளாவில் இப்படி ஒரு முற்போக்கு இயக்கம் நடந்திருக்க வாய்ப்பில்லை. சிறீ நாராயண குரு வைக்கத்திற்குச் சென்றார். அவர் தனது ஆசிரமத்தை சத்தியாகிரக போராட்டத்தில் பங்கேற்றவர்களுக்காக திறந்து விட்டார். தீண்டாமையை ஒழிக்க குழு ஒன்றும் அப்போது அமைக்கப்பட்டது
தெருவில் நடமாடும் உரிமை குடிமகனின் அடிப்படை உரிமை. ஆனால், நம் நாட்டில் அந்தக் காலத்தில் அதற்கு அனுமதி இல்லை. பெரும்பாலான மக்கள் பொதுச் சாலைகளில், குறிப்பாக கோவில்களுக்கு அருகில் நடக்க அனுமதிக் கப்படவில்லை. தூய்மை மற்றும் தீண்டாமை பற்றிய கருத்துகள் அதனுடன் தொடர்புபடுத்தப்பட்டது. இது அடிப்படை உரிமையை மறுக்கும் செயல் என்பதால் உணர்வுப்பூர்வமான எதிர்ப்பு எழுந்தது . வைக்கம் சத்தியாகிரக போராட்டம் என்பது வர்ணாஸ்ரம தர்மம் என்ற மனித விரோத ஜாதி அமைப்புக்கு எதிரான ஒரு தெளிவான அறைகூவல் ஆகும். குருவாயூர் சத்தியாகிரக போராட்டத்தின் மூலம் அது மேலும் முன்னேறியது. இந்தப் போராட்டங்கள் கோவில் நுழைவுப் பிரகடனத்துக்கு வழிவகுத்தது. அந்த வகையில், வைக்கம் சத்தியாகிரகம் நாடு முழுவதற்கும் முன்மாதிரியாக இருந்தது, அதைத் தொடர்ந்து நாட்டின் பல பகுதிகளில் கோவில்கள் மற்றும் பொது சாலைகளில் சுதந்திரமாக நடமாடுவது தொடர்பான பல போராட்டங்கள் நடத்தப்பட்டன. குருவாயூரைத் தவிர, புனே, நாசிக் மற்றும் பலவற்றிலும் வைக்கம் சத்தியாகிரகத்தின் தாக்கத்தைக் காண முடியும்.
முன்மாதிரியான போராட்டம்
வைக்கம் சத்தியாகிரகம் மற்றொரு முன்மாதிரியையும் உருவாக்கியுள்ளது. சமூகக் கொடுமைகள் மற்றும் ஒடுக்கு முறைகளுக்கு மட்டும் ஆளானவர்கள், அதற்கு எதிராகப் போராடுபவர்களாக இருக்கக் கூடாது. இத்தகைய தீமைகள் மற்றும் அடக்குமுறைகளின் மோசமான பலனை அனுபவிப்பவர்கள் கூட அதை எதிர்த்துப் போராட ஒன்றுபட வேண்டும் என்ப துதான் அது. கே.கேளப்பன், கே.பி.கேசவமேனன், மன்னத்து பத்மநாபன், குரூர் நீலகண்டன் நம்பூதிரிபாட், டி.கே.மாதவன், டி.ஆர்.கிருஷ்ணசுவாமி அய்யர், கண்ணன்தொடத்து வேலாயுதமேனன் ஆகியோர் வைக்கம் சத்தியாகிரகத்தின் முன்னணியில் இருந்தவர்கள் என்பது குறிப்பிடத்தக்கது. இந்த இயக்கத்தை சுதந்திரப் போராட்டத்துடன் இணைப்பதில் டி.கே.மாதவன் போன்றோர் ஆற்றிய பங்கு குறிப்பிடத்தக்கது. காக்கிநாடாவில் நடைபெற்ற அகில இந்திய காங்கிரஸ் கட்சியின் சிறப்பு மாநாட்டில் தீண்டாமை ஒழிப்பு மற்றும் கோவில் நுழைவு போராட்டத்திற்கு ஆதரவாக அவர் தீர்மானம் கொண்டு வந்தார். டி.கே.மாதவனுக்கு காந்தியார்கள் ஆதரவு அளித்தார். சிறீநாராயண குருவின் வாழ்த்தைப் பெற்ற பிறகுதான் காந்தியடிகள் சத்யாகிரக போராட்டத்தை காணச் சென்றார். வைக்கம் சத்தியாகிரகம் தொடர்பாக காந்தியாரின் முதல் கேரளப் பயணம் அதுவாகும்.
காந்தியாருக்கே அனுமதி மறுப்பு
காந்தியார் வைக்கம் சென்றபோது, அவர் ஒரு ‘அவர்ணன்’ (பிற்படுத்தப்பட்டவர்) என்பதால், கோயிலின் நிர்வாகக் கட்டுப்பாட்டைக் கொண்டிருந்த இந்தம்துருத்தி மன என்பவர்கள் கோவிலுக்குள் நுழைய அவருக்கு அனுமதி மறுத்தனர். கோவிலை சுற்றியுள்ள பொதுச் சாலைகள் அனைவருக்கும் திறக்கப்பட வேண்டும் என்று அவர் கோரிக்கை விடுத்தபோது, கோயில் நிர்வாக அதிகாரிகளான, ‘சவர்ணாஸ்’ அதை செய்ய மறுத்துவிட்டனர். இன்று, அந்த மனா (நிர்வா கம்) அன்றைய காலத்தில் பிற்படுத்தப்பட்டவர்கள் என்று கருதப்பட்ட பின்னணியில் இருந்து வந்த தொழிலாளர்களை கொண்டு நிர்வாக அலுவலகமாக செயல்படுகிறது. இறுதியில் வரலாறு எந்த திசையில் முன்னேறுகிறது, எப்படி முன்னோக்கி நகர்கிறது, எப்படி ஒரு முற்போக்கான திசையில் செல்கிறது என்பதற்கு இதுவே ஒரு சிறந்த எடுத்துக்காட்டாகும்.
வைக்கம் சத்தியாகிரகத்தில் பல்வேறு ஜாதிகளைச் சேர்ந்த வர்கள் மட்டுமின்றி, பல்வேறு மதங்களைச் சேர்ந்தவர்களும் கலந்து கொண்டனர். அந்த வகையில், இது உண்மையிலேயே ஒரு மக்கள் இயக்கமாகும். கே.அப்துல் ரஹ்மான் குட்டி, பரீத் சாஹிப், எம்.கே.அப்துல் ரஹீம் மற்றும் பலர் இஸ்லாமிய சமூகத்தைப் பிரதிநிதித்துவப்படுத்தி ஒற்றுமையை வெளிப்படுத்தினர். ஜார்ஜ் ஜோசப் போன்றவர்கள் சத்தியாகிரகத்தை ஏற்பாடு செய்வதில் திரைக்குப் பின்னால் முக்கிய பங்கு வகித்தனர். சீக்கிய மதத்தைச் சேர்ந்த சகோதரர்கள் வைக்கத்தில் ‘லங்கர்’ (பொது சமையல் கூடம்) கூட அமைத்த னர். எனவே, சத்யாகிரகம் உண்மையான மதச்சார்பற்ற தன்மையைக் கொண்டிருந்தது.
முற்போக்கான மாற்றம் தேவை
1865 ஆம் ஆண்டிலேயே, பிற்படுத்தப்பட்ட சமூகங்கள் உட்பட சமூகத்தின் அனைத்துப் பிரிவினரும் பொதுச் சாலை களைப் பயன்படுத்த அனுமதிக்க திருவிதாங்கூர் சமஸ்தானம் முடிவு செய்தது. இன்னும், ஆறு தசாப்தங்களுக்குப் பிறகும் அந்த முடிவை நடைமுறைப்படுத்த ஒரு மக்கள் இயக்கம் தேவைப்படுகிறது. சிறந்த சட்டங்களை நடைமுறைப்படுத்துவதன்மூலம் மட்டும் சமூக மாற்றத்தை ஏற்படுத்த முடியாது என்பதற்கு இது ஒரு எடுத்துக்காட்டு. அதை அடைய, சமூக பார்வையிலும் செயல்பாடுகளிலும் முற்போக்கான மாற்றங்களைக் கொண்டு வரக்கூடிய மக்கள் இயக்கங்களும் தேவைப்படுகிறது. இதைத்தான் நமக்கு வைக்கம் சத்தியாகிரகம் சுட்டிக்காட்டுகிறது.
சமூக மாற்றங்களை கொண்டு வந்த ஆளுமைகள்
அரசியல் இயக்கங்கள் இருந்தாலும் சமூக இயக்கங்களு டன் அவற்றுக்கு எந்தத் தொடர்பும் இல்லை என்ற வாதத்தை உறுதிப்படுத்தும் போக்கு பொதுவாக உள்ளது. வைக்கம் சத்தியாகிரகம் அந்த கருத்தோட்டத்தை நிராகரித்து விட்டது. இந்தியாவின் பெரும்பாலான சீர்திருத்த இயக்கங்கள் உயர்ந்த ஆளுமைகளின் பங்களிப்பால் வந்தவைதான். ராஜா ராம் மோகன் ராய், பெரியார், ஜோதிபா பூலே, சிறீ நாராயண குரு மற்றும் பலர் நாட்டில் சமூக மாற்றத்தைக் கொண்டு வருவதில் நிச்சயமாக பெரும் பங்கு வகித்துள்ளனர். இருப்பினும், வைக்கம் சத்தியாகிரகம் ஒரு தனி நபரைச் சுற்றி வரவில்லை. சமூக, அரசியல் இயக்கங்களில் ஈடுபட்ட அனைவரின் கூட்டு முயற்சியே அதன் வெற்றியை உறுதி செய்தது.
மறுமலர்ச்சி இயக்கத்தின் பாரம்பரிய அரசுகள்
20 ஆம் நூற்றாண்டின் முற்பகுதியில் தோன்றிய மறு மலர்ச்சி இயக்கங்களின் பாரம்பரியத்தை முன்னெடுத்துச் சென்ற அரசியல் அமைப்புகளே இன்று தமிழ்நாடு மற்றும் கேரளா ஆகிய இரு மாநிலங்களிலும் ஆட்சியில் உள்ளன என்பதை கவனத்தில் கொள்ள வேண்டும். பெரியார், அண்ணா தலைமையில் இருந்த திராவிட இயக்கம், முத்தமிழறிஞர் கலைஞர் போன்றவர்களால் காலத்திற்கு ஏற்றவாறு மாற்றமடைந்துள்ளது. இந்தப் பெருமைக்குரிய மரபை தமிழ்நாட்டில் திமுக அரசு முன்னெடுத்துச் செல்கிறது. கேரளாவில், நமது மறுமலர்ச்சி இயக்கங்களின் உள்ளடக்கம் மற்றும் நிலைத்தன்மை போன்ற விழுமியங்களை உள்வாங்கி, நவீன கேரளாவை உருவாக்க இடதுஜனநாயக முன்னணி அரசு முயற்சிக்கிறது. வைக்கம் சத்யாகிரகத்தின் நூற்றாண்டை நினைவுகூரும் வகையில் இந்த இரண்டு அரசியல் அமைப்புகளும், அவர்கள் தலைமையிலான அரசுகளும் ஒன்று கூடுவது மிகவும் பொருத்தமானது.
நாட்டின் பொதுநலனுக்காக ஒன்றுபடுவோம்!
வைக்கம் சத்தியாகிரகம் 100 ஆண்டுகளுக்கு முன்பு, சமு தாயத்தின் உயரிய நலன்களைப் நிறைவேற்ற நடத்தப்பட்டது. நமது வரலாறு, மொழி, பண்பாடு, மதச்சார்பின்மை, கூட்டாட்சி, ஜனநாயகம் மற்றும் அனைத்தையும் ஒன்றாகக் கொண்டுள்ள அரசமைப்புச் சட்டம் ஆகியவற்றைப் பாதுகாக்க, நாட்டின் மிகப்பெரிய நலன்களுக்காக ஒன்றுபட வேண்டிய காலத்தில் நாம் வாழ்ந்து கொண்டிருக்கிறோம். சமூக மற்றும் அரசியலில் வெவ்வேறு கொள்கைகளை உடையவர்கள் பொது நலனுக்காக ஒன்றிணைந்த ஒரு இயக்கத்தை பற்றி நாம் நினைவுகூரும்போது, நமது காலத்திற்கு பொருத்தமான பொது நன்மையை அடைய நாமும் இதுபோன்ற இயக்கங்களை ஒன்றிணைக்க பாடுபடுவது கட்டாயமாகும்.
பொதுநலன்களுக்கு போராடுவோம்
அப்போதுதான் ஜாதிவெறி, தீண்டாமை, சமூகத் தீமைகள், மூடநம்பிக்கைகள், மனிதாபிமானமற்ற சடங்குகள் போன்றவற்றுக்கு எதிரான போராட்டம் கூர்மையடையும். இன்றும் கூட இத்தகைய பிற்போக்குச் சிந்தனைகள் மற்றும் நடைமுறைகளை பிரதான நீரோட்டத்தில் கொண்டு வருவதற்கான முயற்சிகள் நடைபெற்று வருகின்றன என்பதை நாம் கவனத்தில் கொள்ள வேண்டும். மதம், மாநிலம் போன்றவற்றின் அடிப்படையிலும் நம்மை பிரிக்கும் முயற்சிகள் நடக்கின்றன. நாம் போராடி சுதந்திரம் அடைந்தாலும், இன்று நமது இறையாண்மைக்கு சவால் விடும் பொருளாதார உறவுகளுக்கும் வர்த்தக ஒப்பந்தங்களுக்கும் தள்ளப்பட்டுள்ளோம். இவை அனைத்திற்கும் எதிராக பொதுநலன் கருதி போராட வேண்டும். பொறுப்புள்ள அரசியல் அமைப்புகள் மற்றும் அரசாங்கங்கள் என்ற முறையில் காலம் அதை நம்மிடம் கோருகிறது.
மதவாத அரசால் மாற்றியமைக்கப்படும் விழுமியங்கள்
நமது அரசமைப்புச் சட்டம் மற்றும் அது நிலைநாட்டும் மதிப்புகள், நமது புகழ்பெற்ற சுதந்திரப் போராட்டத்தின் ஒரு பகுதியாக உருவான விழுமியங்கள் மீது கடுமையான தாக்குதல் தற்போது கட்டவிழ்த்து விடப்பட்டுள்ளது. வைக்கம் சத்தியாகிரகத்தின் மதச்சார்பற்ற தன்மைபற்றி குறிப்பிட்டிருந்தேன். இது நமது சுதந்திரப் போராட்டத்தின் மிகவும் போற்றுதலுக்குரிய மதிப்புகளில் ஒன்றாகும். இது நமது அரசியலமைப்பின் அடிப்படைக் கொள்கைகளில் ஒன்றாகும். எவ்வாறாயினும், நமது மதச்சார்பற்ற அரசியல் ஒரு மதவாத அரசால் மாற்றி யமைக்கப்படுகிறது. நமது அரசியலமைப்புச் சட்டம் மநுஸ்மிரு தியால் மாற்றப்பட முயற்சிகள் நடக்கின்றன. நமது கூட்டாட்சி அமைப்பு ஒற்றையாட்சி அமைப்பாக மாற்றப்பட்டு வருகிறது.மதச்சார்பற்ற, சோசலிச, ஜனநாயக, சுதந்திரமான, இந்தியாவின் அடிப்படைக் கட்டமைப்பு பாதுகாக்கப்பட்டு, பலப்படுத்தப்பட வேண்டும் என்பதற்காக, இதுபோன்ற மோசமான அனைத்து முயற்சிகள் குறித்து நாம் விழிப்புடன் இருக்க வேண்டும், அவற்றிற்கு எதிராகப் போராட வேண்டும்.
மாநில அரசுகளின் அதிகாரங்களைத் தகர்க்கும் ஆளுநர்கள்
கடந்த காலங்களில் இதே போன்ற பிரச்சினைகளை நாங்கள் எதிர்கொண்டோம். அந்த நேரத்தில், நாங்கள் அதை எதிர்கொண்டு ஒன்றாக நின்று வென்றோம். தற்போதும், இதே போன்ற பிரச்சினைகளை நாம் எதிர்கொள்கிறோம். இந்த நேரத்தில் இந்த சக்திகளால் ஏற்படும் நெருக்கடியை நாம் கைகோர்த்து நின்று எதிர்ப்பதில் உறுதியாக உள்ளோம். தேர்ந்தெடுக்கப்பட்ட மாநில அரசுகளின் அதிகாரங்களை தகர்ப்பதற்காக ஆளுநருக்கு உரிய அதிகாரம் தவறாகப் பயன்படுத்தப்படுவது வாய்ப்புக் கேடானது.
ஆளுநர்களின் அதிகார அத்துமீறல்
மாநிலப் பட்டியலில் உள்ள ஒரு விஷயம் தொடர்பாக, சட்ட மன்றத்தால் நிறைவேற்றப்பட்ட மசோதாக்களை ஆளுநர்கள் குடியரசுத் தலைவரின் பரிசீலனைக்கு எந்த அதிகாரத்தை கொண்டு அனுப்பி வைக்கிறார்கள்? நமது கூட்டாட்சி ஆட்சியில், மாநிலப் பட்டியலில் இடம்பெறும் ஒரு விஷயத்தில் மாநிலச் சட்டம் செல்லுமா இல்லையா என்பதை பரிசீலிக்க குடியரசுத் தலைவருக்குக் கூட அதிகாரம் இல்லாதபோது, அத்தகைய மசோதாக்களை குடியரசுத் தலைவரின் பரிசீலனைக்கு அனுப்புவதன் மூலம், அரசியலமைப்பின் கீழ் ஆளுநருக்கு வழங்கப்பட்டுள்ள அதிகாரங்களை உண்மையில் அவர்கள் வேண்டுமென்றே கைவிடுகிறார்கள். இது ஒரு தேர்ந்தெடுக்கப்பட்ட சட்டமன்றத்தின் அதிகாரங்களை அழிப்பதை நோக்கமாகக் கொண்ட ஒரு செயலாகும்.
ஒரு மாநிலச் சட்டம், பொதுப் பட்டியலில் உள்ள ஒரு விஷயத்தைத் தொடும். மத்திய சட்டத்தில் உள்ள எந்த விதி களையும் மீறாமல் இருக்கும் வரை, வேறுவிதமாகக் கூறினால், ஒன்றிய சட்டத்தின் அம்சங்களுக்குள் நுழையாத பட்சத்தில், மாநில சட்டமன்றத்தால் நிறைவேற்றப்பட்ட அத்தகைய மசோதாக்களை குடியரசுத் தலைவரின் பரிசீலனைக்கு ஆளுநரால் அனுப்ப முடியாது. இந்த மசோதாவில் அரசமைப்புச் சட்ட விதிகளுக்கு முரணாக ஏதும் இருப்பதாக ஆளுநர் கருதினாலும், அந்த மசோதாவை தனது கருத்துகளுடன் மீண்டும் சட்டமன்றத்திற்கு அனுப்புவதே ஆளுநருக்கு உள்ள ஒரே வாய்ப்பு.
நீதிமன்ற அதிகாரங்களை
ஆக்கிரமிக்கும் ஆளுநர்கள்
இதுதொடர்பாக, ஒரு சட்டத்தை அரசமைப்புச் சட்ட ரீதியாக தீர்மானிக்கும் இறுதி அதிகாரம் இந்த நாட்டில் உள்ள அரசியலமைப்பு சட்டத்தால் உருவாக்கப்பட்டுள்ள நீதிமன்றங்களுக்கு வழங்கப்பட்டுள்ளது என்பதை நினைவில் கொள்ளவேண்டும். இந்த உண்மையை மறந்துவிட்டு, இந்த நாட்டில் ஆளுநர் பதவியை வகிக்கும் சிலர், அரசியல் சாசனத்தால் சட்டப்பூர்வமாக நீதித்துறைக்கு வழங்கப்பட்டுள்ள துறைகளை ஆக்கிரமித்து வருகின்றனர்.
ஜனநாயக ரீதியில் தேர்ந்தெடுக்கப்பட்ட சட்டமன்றத்திற்கு அரசியலமைப்புச் சட்டம் சரியாகப் பிரித்து வைத்துள்ள அதிகாரங்கள், ஆளுநரைப் போன்ற ஒரு நியமன அதிகாரியின் தலையீட்டை அனுமதிக்கும் பட்சத்தில், நாட்டில் ஜனநாயக அரசியல் நிலவுவதைப்பற்றி சிந்திப்பது பயனற்றதாக இருக்கும். இந்த நாட்டில் அரசமைப்பு சட்டத்தின் கீழ் செயல்படும் எந்த ஆளுநருக்கும் தனது ஒப்புதலுக்காக அனுப்பப்பட்ட மசோதாக்களை காலவரையின்றி வைத்திருக்கும் அதிகாரமோ உரிமையோ கிடையாது. இது நன்கு நிறுவப்பட்ட சட்டத்தின் நிலைப்பாடு என்று உச்சநீதிமன்றத்தால் மீண்டும் மீண்டும் வலியுறுத்தப்பட்டுள்ளது.
சட்டத்தின் இந்த நிலைப்பாட்டை உச்சநீதிமன்றம் அவ்வப்போது நினைவுகூரும் போதும் ஜனநாயக செயல்முறைக்கு குந்தகம் விளைவிப்பதை மறைமுக நோக்கமாகக் கொண்ட ஆளுநர்கள், மசோதாக்களை பரிசீலிக்காமல் அவற்றை முடக்கி வைக்கிறார்கள்.அல்லது குடியரசுத் தலைவரின் பரிசீலனைக்கு அனுப்பி வைக்கிறார்கள்.
கேரள ஆளுநரின் ஜனநாயக விரோத செயல்பாடுகள்
கேரள மாநிலத்தில், ஆளுநர் தனது ஒப்புதலுக்காக அனுப்பப்பட்ட எட்டு மசோதாக்களை இரண்டு ஆண்டு களுக்கும் மேலாக கிடப்பில் போட்டுள்ளார். ஆளுநரின் இத்தகைய செயலற்ற தன்மையை நீதிமன்றத்திற்கு கேரள அரசு கொண்டு சென்ற போதுதான் அந்த எட்டு மசோதாக் களில் ஒரு மசோதாவுக்கு ஆளுநர் ஒப்புதல் அளித்தார், மீத முள்ளவற்றை குடியரசுத் தலைவரின் பரிசீலனைக்கு அனுப்பினார். ஆளுநர் தனது சட்ட விரோத செயல்களை தெரிந்தே செய்கிறார் என்பது தெளிவாகிறது. அதையும் மீறி, அவர் அவ்வாறு நடந்துகொள்வதுஎன்பது அவரது அரசியல் பழிவாங்கலை மட்டுமே காட்டுகிறது. நாட்டு மக்கள் இத்தகைய பழிவாங்கும் செயல்களை திறம்பட எதிர்கொண்டு தோற்கடிப்பதில் வல்லவர்கள் என்பதை அதிகார மய்யங்கள் நினைவில் கொள்வது நல்லது.
வைக்கம் சத்தியாகிரகத்தின் இந்த நூற்றாண்டு விழா, இந்த முன்னோக்கிய பயணத்தில் புத்துணர்ச்சியையும் வலிமையையும் அளிக்கும் என்று கூறி எனது உரையை முடித்துக்கொள்கிறேன்.
– நன்றி: ‘தீக்கதிர்’, 29.12.2023
