சென்னை, மே 7- மன்னார் வளைகுடா மற்றும் அதனைச் சுற்றியுள்ள பகுதிகளில் நிலவும் வளிமண்டல கீழடுக்கு சுழற்சி காரணமாக, தமிழ்நாட்டின் பல்வேறு மாவட்டங்களில் பரவலாக மழை பெய்து வருகிறது.
குறிப்பாக நேற்று (6.5.2026) 11 மாவட்டங்களில் கனமழை பதிவாகியுள்ள நிலையில், இந்த மழைப்பொழிவு வரும் மே 12ஆம் தேதி வரை நீடிக்கும் என சென்னை வானிலை ஆய்வு மய்யம் தெரிவித்துள்ளது.
இதுகுறித்து வானிலை ஆய்வு மய்யம் வெளியிட்டுள்ள செய்திக் குறிப்பில் கூறப்பட்டு உள்ளதாவது:-
தற்போது இரண்டு முக்கிய வானிலை மாற்றங்கள் நிலவுகின்றன:
மன்னார் வளைகுடா பகுதியில் சுமார் 1.5 கி.மீ உயரத்தில் ஒரு வளிமண்டல சுழற்சி நிலவுகிறது. வட உள் கருநாடகம் முதல் மன்னார் வளைகுடா வரை, ராயலசீமா மற்றும் தமிழ்நாடு வழியாக 0.9 கி.மீ உயரத்தில் ஒரு வளிமண்டல காற்றழுத்தத் தாழ்வுப்பாதை நிலைகொண்டுள்ளது.
மே 11 வரை: நீலகிரி, கோவை, ஈரோடு, திருப்பூர், திண்டுக்கல், மதுரை, தேனி, தென்காசி, விருதுநகர், திருநெல்வேலி மற்றும் கன்னியாகுமரி ஆகிய மாவட்டங்களில் ஓரிரு இடங்களில் இடி மின்னலுடன் கூடிய மழை தொடரும்.
மே 12 அன்று: தென் மாவட்டங்களான கன்னியாகுமரி, திருநெல்வேலி, தூத்துக்குடி, ராமநாதபுரம் மற்றும் டெல்டா மாவட்டங்களான தஞ்சாவூர், திருவாரூர், நாகப்பட்டினம், மயிலாடுதுறை உள்ளிட்ட பகுதிகளில் மழைக்கு வாய்ப்புள்ளது.
கடந்த சில நாட்களாக தமிழ்நாட்டில் வெயில் வாட்டி வதைத்து வந்தது. குறிப்பாக கரூர், ஈரோடு, வேலூர் மற்றும் மதுரையில் 102 டிகிரி பாரன்ஹீட் வரை வெப்பம் பதிவானது.
மழை காரணமாக வரும் 10ஆம் தேதி வரை அதிகபட்ச வெப்பநிலையானது படிப்படியாக 2-3 டிகிரி செல்சியஸ் வரை குறையக்கூடும். சென்னையில் இன்று (7.5.2026) வெப்பநிலை இயல்பை ஒட்டியே இருக்கும் என கணிக்கப்பட்டுள்ளது.
இவ்வாறு அதில் கூறப்பட்டுள்ளது.
