நாக்பூர், அக்.21 வரலாற்றில் முதல்முறையாக, மகாராட்டிர முதலமைச்சர் தேவேந்திர பட்ன விஸ், நாக்பூரில் நடைபெற்ற ஆர்.எஸ்.எஸ்.விஜய தசமி விழாவில் ராஷ்ட்ரிய சுயம்சேவக் சங்கத்தின் அதிகாரப்பூர்வ சீருடையை அணிந்து கலந்து கொண்டது அரசியல் வட்டாரங்களில் பெரும் விவா தத்தையும், அதிர்வலைகளையும் ஏற்படுத்தியுள்ளது.
மகாராட்டிராவில் தீவிர ஹிந்துத்துவ அமைப்பா கத் தொடங்கி, பின்னர் அரசியல் கட்சியாக உருவெடுத்து ஆட்சிப் பீடம் ஏறிய சிவசேனா கட்சியைச் சேர்ந்த முதலமைச்சர்கள் கூட, ஆர்.எஸ்.எஸ். தலைமையகத்தில் நடைபெற்ற விஜயதசமி விழாக்களுக்குச் சீருடை அணிந்து சென்றதில்லை. மேலும், ஒன்றிய அமைச்சரவையில் உள்ள பல முக்கியத் தலைவர்கள் மற்றும் மத்தியப் பிரதேசம், சட்டீஸ்கர் உள்ளிட்ட மாநிலங்களின் பாஜக முதலமைச்சர்கள் எவரும் இதுவரை ஆர்.எஸ்.எஸ். சீருடையோடு இதுபோன்ற விழாக்களில் கலந்துகொண்டதில்லை என்பது குறிப்பிடத்தக்கது.
குறிப்பாக, மத்தியப் பிரதேச முதலமைச்சர் மோகன் யாதவ் ஆர்.எஸ்.எஸ். அமைப்பில் மிக முக்கியமான பொறுப்பில் இருந்தபோதிலும், ஆர்.எஸ்.எஸ் தலைமை அவரை விஜயதசமி மேடைக்கு அழைக்கவில்லை. ஆனால், மகாராட்டிர முதலமைச்சராகப் பதவியேற்ற பிறகு தேவேந்திர பட்னவிஸ் முழுச் சீருடையுடன் மேடையேறியுள்ளது பல்வேறு கேள்விகளை எழுப்பியுள்ளது.
அரசியலமைப்புச்
சட்டத்தின் மீதான கேள்வி
இந்திய விடுதலைக்குப் பிறகு பல்வேறு காலகட்டங்களில் மூன்று முறை தடை செய்யப்பட்ட ஆர்.எஸ்.எஸ். அமைப்பு மற்றும் அதன் கிளை அமைப்புகள் மீது தீவிர விமர்சனங்கள் வைக்கப்பட்டு வருகின்றன. நரேந்திர தபோல்கர் முதல் கவுரி லங்கேஷ் படுகொலை வரை தொடர்புடைய பல இந்துத்துவா அமைப்புகளுடன் ஆர்.எஸ்.எஸ்.சுக்கு உள்ள தொடர்புகள் குறித்து பல்வேறு தரப்பினரும் குற்றச்சாட்டுகளை முன்வைக்கின்றனர்.
‘ஸனாதன் சன்ஸ்தா’ போன்ற அமைப்புகளுக்கும், எங்களுக்கும் எந்தத் தொடர்பும் இல்லை என்று நாக்பூர் தலைமை முன்பு மறுத்திருந்தாலும், அந்த அமைப்பைச் சேர்ந்த பல முக்கியப் பிரமுகர்கள் ஆர்.எஸ்.எஸ். விஜயதசமி விழாக்களில் தொடர்ந்து கலந்துகொண்டு வருவது குறிப்பிடத்தக்கது.
இந்நிலையில், ‘‘இந்திய அரசமைப்புச் சட்டத்தின் மீது பற்றுறுதி கொண்டு, மதச்சார்பின்மை யைப் பேணுகின்ற ஒரு மாநிலத்தின் முதலமைச்சர் பதவி யில் இருக்கும் ஒருவர், சமூக நீதி மற்றும் சமத்து வத்திற்கு எதிரான கொள்கைகளைக் கொண்டதாக விமர்சிக்கப்படும் ஓர் அமைப்பின் விழாவில் சீருடை யுடன் பங்கேற்பது, அரசியலமைப்புச் சட்டத்தின் மீதான மாண்பைக் காலில் போட்டு மிதிப்பதற்குச் சமம்’’ என்று அரசியல் விமர்சகர்களும், ஜனநாயக அமைப்புகளும் கடுமையான கண்டனங்களைத் தெரிவித்து வருகின்றனர்.
