பெங்களூரு, ஜூன் 5- கருநாடக மாநிலத்தின் 25ஆவது புதிய முதலமைச்சராக காங்கிரஸ் கட்சியின் மூத்த தலைவர் டி.கே.சிவக்குமார் 3.6.2026 அன்று முறைப்படி பதவியேற்றுக் கொண்டார். அவருடன் துணை முதலமைச்சராக டாக்டர் ஜி.பரமேஸ்வரும், 12 புதிய அமைச்சர்களும் பொறுப்பேற்றுக் கொண்டனர்.
மாநிலத்தில் ஆட்சித் தலைமை மாற்றம் ஏற்படுவதற்கு வசதியாக, முன்னாள் முதலமைச்சர் சித்தராமையா கடந்த மே 28ஆம் தேதி தனது பதவியை விட்டு விலகினார். அதனைத் தொடர்ந்து, மே 30ஆம் தேதி நடைபெற்ற காங்கிரஸ் சட்டமன்ற உறுப்பினர்கள் கூட்டத்தில் டி.கே.சிவக்குமார் சட்டமன்ற கட்சித் தலைவராக ஒருமனதாகத் தேர்ந்தெடுக்கப்பட்டார். ஜூன் 3ஆம் தேதி ஆளுநரைச் சந்தித்து ஆட்சி அமைக்க உரிமை கோரியதை அடுத்து, 3.6.2026 அன்று இந்த பதவியேற்பு விழா நடைபெற்றது.
கோலாகல பதவியேற்பு விழா
பெங்களூரு மக்கள் பவனில் உள்ள கண்ணாடி மாளிகையில் 3.6.2026 அன்று மாலை 4.05 மணிக்கு விழா தொடங்கியது. மாலை 4.15 மணிக்கு டி.கே.சிவக்குமார் தனது குருவான வீரகங்காதரய்யா அஜ்ஜய்யானாவின் பெயரில் முதலமைச்சராகப் பதவியேற்றார்.அவருக்கு ஆளுநர் தாவர்சந்த் கெலாட் பதவிப் பிரமாணமும், ரகசிய காப்புப் பிரமாணமும் செய்து வைத்தார்.
துணை முதலமைச்சர்: டாக்டர் ஜி.பரமேஸ்வர்.
முக்கிய அமைச்சர்கள்: கே.எச்.முனியப்பா, கே.ஜே.ஜார்ஜ், எம்.பி.பாட்டீல், ராமலிங்கரெட்டி, சதீஷ் ஜார்கிஹோலி, கிருஷ்ணபைரேகவுடா, பிரியாங்க் கார்கே, யு.டி.காதர், ஈஸ்வர்கண்ட்ரே, முன்னாள் முதலமைச்சர் சித்தராமையாவின் மகன் மருத்துவர் யதீந்திரா, பைரதி சுரேஷ் மற்றும் சரணபிரகாஷ் பாட்டீல் ஆகியோர் அமைச்சர்களாகப் பொறுப்பேற்றனர்.
பங்கேற்ற முக்கியத் தலைவர்கள்:
ராகுல் காந்தி, மல்லிகார்ஜுன கார்கே, இமாச்சலப் பிரதேச முதலமைச்சர் சுக்விந்தர்சிங் சுகு, கேரள முதலமைச்சர் சதிசன், தெலங்கானா முதலமைச்சர் ரேவந்த், கே.சி.வேணுகோபால் உள்ளிட்ட பலர் இவ்விழாவில் பங்கேற்றனர்.
நாட்டின் ‘மிகப் பெரிய பணக்கார முதலமைச்சர்’ டி.கே.சிவக்குமார்
புதிதாகப் பதவியேற்றுள்ள டி.கே.சிவக்குமார், நாட்டின் மிகப்பணக்கார முதலமைச்சர்கள் பட்டியலில் முதலிடத்தைப் பிடித்துள்ளார் டி.கே.சிவக்குமார் (கருநாடகா): ரூ.1,413 கோடி சொத்துகள் (முதலிடம்) சந்திரபாபு நாயுடு (ஆந்திரா): ரூ.931 கோடி சொத்துகள் (இரண்டாமிடம்) ஜோசப் விஜய் (தமிழ்நாடு): ரூ.625 கோடி சொத்துகள் (மூன்றாமிடம்)
கட்சிப் பதவியும், சட்டப்பேரவைத் தலைவர் பதவியும் விலகல்
புதிய காங்கிரஸ் தலைவர்: கடந்த 6 ஆண்டுகளாக கருநாடக மாநில காங்கிரஸ் தலைவராக இருந்த டி.கே.சிவக்குமார், முதலமைச்சர் பொறுப்பை ஏற்றதால் தனது கட்சிப் பதவியை விட்டு விலகியுள்ளார். அவருக்குப் பதிலாக பி.கே.ஹரிபிரசாத் புதிய மாநிலத் தலைவராக நியமிக்கப்பட்டுள்ளார்.
சட்டமன்ற பேரவைத் தலைவர் மாற்றம்:
சட்டமன்ற பேரவைத் தலைவராக இருந்த யு.டி.காதர் அமைச்சராகப் பதவியேற்றதால், தனது பேரவைத் தலைவர் பதவியிலிருந்து விலகினார். அடுத்த சட்டமன்ற பேரவைத் தலைவராக மூத்த உறுப்பினர் ஆர்.வி.தேஷ்பாண்டே நியமிக் கப்படலாம் என எதிர்பார்க்கப்படுகிறது.
