கேள்வி: மேற்கு வங்கத் தேர்தல் முடிவுக்குப் பிறகு, “முதலமைச்சர் பதவியில் இருந்து நான் விலகமாட்டேன்” என்று மம்தா உறுதியாகத் தெரிவித்துள்ளாரே – அடுத்து என்ன நடக்கும்?
– எம்.கதிர், நம்மாழ்வார்பேட்டை, சென்னை
பதில்: போராட்டம் அவரது ரத்த ஓட்டம்! எனவேதான் துணிவின் உச்சியில் என்றும் அவர்!
கேள்வி: தமிழ்நாடு சட்டமன்றத் தேர்தல் பிரச்சாரத்தின்போது, தாம் தாக்கிப் பேசிய கட்சியினரிடமும், எதிர்கட்சிக் கூட்டணி யினரிடமும் ஆட்சியமைக்க ஆதரவுக்குத் த.வெ.க.வினரின் முயற்சி கண்டு தங்களுக்குத் தோன்றுவது என்ன?
– இரா.சுந்தர், திருவானைக்காவல்
பதில்: கொள்கை முக்கியமல்ல; பதவிதான் முக்கியம்! சம்பந்தப்பட்ட எல்லோருக்கும் என்பதன் பகிரங்க நடைமுறை – புரிகிறதா?
கேள்வி: பா.ஜ.க. ஆளும் ராஜஸ்தானில் ஹரியாவ் கிராமத்தில் தாழ்த்தப்பட்ட சமூகத்தைச் சேர்ந்த மணமகள் பூஜா மேக்வால் குதிரையில் ஊர்வலமாகச் சென்றார் என்பதற்காக அவர், அவரது உறவினர்கள் மீது உயர்ஜாதி வெறியர்கள் தாக்குதல் நடத்தியுள்ளார்களே – இத்தகைய கொடூரங்களுக்கு முடிவே இல்லையா?
– எஸ்.ஜெயக்குமார், காஞ்சிபுரம்
பதில்: ஒன்றிய பா.ஜ.க. – ஆர்.எஸ்.எஸ். ஆட்சி மாறும்போதுதான் விடிவு கிடைக்கும் போலும்!
கேள்வி: த.வெ.க. சட்டமன்ற உறுப்பினராக இராயபுரம் தொகுதியில் தேர்ந்தெடுக்கப்பட்டுள்ளவர் இரண்டடி வாளைக் கொண்டு கேக் வெட்டிப் பிறந்த நாளைக் கொண்டாடியுள்ளதும், சென்னையில் சிறுமியிடம் பாலியல் அத்துமீறலில் ஈடுபட்ட த.வெ.க. வட்டச் செயலாளர் போக்சோ சட்டத்தில் கைது செய்யப்பட்டுள்ளதும் எதைக் காட்டுகிறது?
– ஆ.செல்வம், எண்ணூர்
பதில்: தமிழ்நாட்டிற்கான தலைகுனிவுச் செய்தி இது! கட்சித் தலைமை வெட்கப்பட வேண்டிய செய்தியும்கூட!
கேள்வி: பிஜே.பி. எந்த வகையிலாவது சதி செய்து மதவாதத்தை எதிர்க்கும் முக்கியத் தலைவர்களை அழிக்கும் முயற்சியை இந்தியா முழுக்க செய்து வரும் நரித் தந்திரத்தைப் பற்றி உங்கள் கருத்து?
– மா.சாக்கியமுனி, நுங்கம்பாக்கம்
பதில்: ‘நரி’ எப்போதும் தந்திரத்தின் மூலம் தானே வாழ முடியும் என்பதை அனைவருக்கும் புரிய வைக்க வேண்டும். மிகப் பெரிய தொடர்பணி!
கேள்வி: நாட்டுக்கே வழிகாட்டிய சிறந்த திட்டங்களைத் தீட்டிய நல்ல நிர்வாகத்தைத் தந்த தி.மு.கழகத்தை ஏற்கவில்லையே. சினிமா நடிகரின் மோகம் என்ன விளைவை ஏற்படுத்தும்?
– அ.யுவகாளி, உத்திரமேரூர்
பதில்: திடீர்ப் புயலால், நன்கு விளைந்து அறுவடைக்குத் தயாரான நெற்பயிர் நாசமானதுபோல – செழித்து வளர்ந்திருந்த தமிழ்நாட்டின் வளர்ச்சியைக் காப்பாற்றும் பொறுப்புமிக்க படித்த அறிவுஜீவி வாக்காளர் களையே கூட தேடித்தான் கண்டறிய வேண்டும்! இல்லையெனில், பிறகு இதுதான் நடக்கும்!
கேள்வி: “நூற்றாண்டு திராவிட இயக்கக் கொள்கைகளை வீழ்த்திய விசில்” என்று ‘தினத்தந்தி’ தலைப்பிட்டு செய்தி வெளியிட்டுள்ளதே, இதுகுறித்து தங்கள் கருத்து?
– முகிலன், சென்னை
பதில்: ஏற்கத்தகாத பதில் – திராவிட இயக்க கொள்கைகளையா அவர்கள் வீழ்த்தினார்கள்? தேர்தல் வெற்றிகள், கொள்கைகளை வீழ்த்திவிடவே முடியாது! அந்த திராவிட இயக்கத்தினரால் சி.பா.ஆதித்தனார் சட்டமன்றத் தலைவராக (அண்ணா ஆட்சியில்) ஆனதுண்டு. அடுத்த 1971க்குப் பிறகு அமைச்சராகவும் ஆனாரே! ஏனோ அது ‘தந்தி’க்கு வசதியாக மறந்துவிட்டதோ!
கேள்வி: “தமிழ்நாட்டில் தொங்கு சட்டமன்றம் வராது; தங்கு சட்டமன்றம்தான்” என்று இருந்த நிலை மாறியிருக்கிறதே?
– கண்மணி, மாமல்லபுரம்
பதில்: இப்போது அதன் ‘கொடுமையை’த் தமிழ்நாடு முதல் கட்டத்திலேயே கூட அனுபவிக்கத் தொடங்கிவிட்டதே!
கேள்வி: நடிகர் ரஜினிகாந்த் – தி.மு.க. தலைவர் மு.க.ஸ்டாலின் சந்திப்பு எதைக் காட்டுகிறது?
– ஆதவன், சீர்காழி
பதில்: நல்ல நட்புக்கான ஓர் உதாரணம் என்பதைக் காட்டுகிறது!
கேள்வி: தமிழ்நாட்டில் புதிதாக அமையவுள்ள அரசிற்குத் தங்களது ஆலோசனை என்ன?
– ம.மணி, செங்கல்பட்டு
பதில்: ஆட்சியை ஆட்சியாக நடத்துவது முக்கியம்! அது வெறும் காட்சியாக ஆகிவிடக் கூடாது!
