பெய்ஜிங் செப். 25- சீன நிறுவனமான ஹுவாவே ரத்த அழுத்தத்தை துல்லியமாகக் கணிக்கும் சிறப்பு ‘கஃப்’ வசதியுடன் கூடிய புதிய ஸ்மார்ட்வாட்சை அறிமுகப்படுத்தியுள்ளது.
‘ஹுவாவே வாட்ச் டி3’ எனப் பெயரிடப்பட்டுள்ள இந்த கடிகாரத்தில், ரத்த அழுத்த பரிசோதனைக் கருவிகளில் பயன்படுவது போன்ற சிறிய ‘கஃப்’ அதன் வார்பட்டையிலேயே (ஸ்ட்ராப்) இணைக்கப்பட்டுள்ளது. இது மணிக்கட்டைச் சுற்றி லேசாகக் காற்றில் உப்பி, சிஸ்டாலிக் மற்றும் டயஸ்டாலிக் ரத்த அழுத்த அளவு களைத் துல்லியமாகக் காட்டுகிறது. இது தொடர்பான வீடியோ இணையதளங்களில் வைரலாகி வருகிறது.
இதுகுறித்து ஹுவாவே நிறுவனம் வெளியிட்ட அறிக்கையில், “மருத்துவக் கருவி போன்ற தோற்றம் இல்லாமல், சாதாரண ஸ்மார்ட்வாட்ச் போலவே 11.3 மி.மீ. தடிமன், 40 கிராம் எடையுடன் இது வடிவமைக்கப்பட்டுள்ளது. பிளாக், கோல்டு மற்றும் மோகா கோல்டு ஆகிய நிறங்களில் வெளியாகியுள்ள இந்த ஸ்மார்ட்வாட்ச், இங்கிலாந்தில் 399.99 பவுண்டுகள் (ரூ.50,770) விலையில் விற்பனைக்கு வந்துள்ளது. இக்கடிகாரம் ஆண்ட்ராய்டு மற்றும் ஆப்பிள் (ஐஓஎஸ்) ஆகிய இரண்டு இயங்குதளங்களிலும் செயல்படும் திறன் கொண்டது” என்று கூறப்பட்டுள்ளது.
