சென்னை, நவ. 14- தமிழ்நாட்டில் உள்ள அரசு கலை மற்றும் அறிவியல் கல்லூரிகள், கல்வியியல் கல்லூரிகள், பொறியியல் கல்லூரிகள் மற்றும் பல்வகை தொழில்நுட்பக் (பாலிடெக்னிக்) கல்லூரிகளில் தற்காலிகமாகப் பணிபுரிந்து வரும் கவுரவ விரிவுரையாளர்களின் மாதாந்திர தொகுப்பூதியத்தை ரூ.5,000 உயர்த்தி வழங்க தமிழ்நாடு அரசு உத்தரவிட்டுள்ளது.
இதுகுறித்து தமிழ்நாடு அரசு வெளியிட்டுள்ள செய்திக்குறிப்பில் கூறப்பட்டிருப்பதாவது: கலை, அறிவியல், கல்வியியல் மற்றும் பொறியியல் கல்லூரிகள்: இக்கல்லூரிகளில் தொகுப்பூதிய அடிப்படையில் பணிபுரியும் கவுரவ விரிவுரையாளர்களின் மாதாந்திர ஊதியம் ரூ.30,000-லிருந்து ரூ.35,000-ஆக உயர்த்தப்பட்டுள்ளது.
பல்வகை தொழில்நுட்பக் கல்லூரியில் பணிபுரியும் கவுரவ விரிவுரையாளர்களின் மாதாந்திர ஊதியம் ரூ.25,000-லிருந்து ரூ.30,000-ஆக உயர்த்தப்பட்டுள்ளது. இந்த ஊதிய உயர்வு கடந்த நவம்பர் 1ஆம் தேதி (01.11.2026) முதல் முன்தேதியிட்டு அமல்படுத்தப்படுகிறது.
அரசின் இந்த அறிவிப்பின் மூலம் தமிழ்நாடு முழுவதும் உள்ள 9,646 தற்காலிக கவுரவ விரிவுரையாளர்கள் நேரடியாகப் பயனடைவார்கள். இந்த ஊதிய உயர்வால் நடப்பு நிதியாண்டில் தமிழ்நாடு அரசுக்கு ரூ.24.12 கோடி கூடுதல் செலவினம் ஏற்படும் என அந்தச் செய்திக்குறிப்பில் தெரிவிக்கப்பட்டுள்ளது.
