புதுடில்லி, நவ. 12- பெங்களூருவைச் சேர்ந்த சிறீலட்சுமி சிறீனிவாசா அக்ரோ ஃபுட்ஸ் நிறுவனம், சென்னையைச் சேர்ந்த வர்த்தக நிறுவனங்களுக்கு எதிராக அறிவுசார் சொத்துரிமை தொடர்பான வர்த்தக வழக்கை டில்லி உயர் நீதிமன்றத்தில் தாக்கல் செய்திருந்தது.
இதனை சென்னை உயர் நீதிமன்றத்துக்கு மாற்றக் கோரி எதிர் மனுதாரர்களான சென்னையைச் சேர்ந்த சாய் மகாலட்சுமி டிரேடர்ஸ் உள்ளிட்டோர் உச்ச நீதிமன்றத்தில் மனு தாக்கல் செய்தனர். இந்த மனு நீதிபதிகள் பி.வி. நாகரத்னா, ஆர். மகாதேவன் ஆகியோர் அடங்கிய அமர்வில் விசாரணைக்கு வந்தது. அப்போது இந்த வழக்கை மாற்றி உத்தரவிடக்கூடாது என எதிர்மனுதாரர் சார்பில் வலியுறுத்தப்பட்டது.
இதை ஏற்க மறுத்த நீதிபதிகள், ”ஒரு குறிப்பிட்ட வகையான வழக்கை விசாரிப்பதற்கு ஒரு குறிப்பிட்ட உயர் நீதிமன்றம் மற்றவற்றை விடச் சிறந்தது என்று கருதுவது தவறானது. உயர் நீதிமன்றங்களுக்கு இடையே உயர்வு தாழ்வு கிடையாது” என்றனர். ஆனாலூம் அறிவுசார் சொத்துரிமை தொடர்பான வழக்கை சென்னை உயர் நீதிமன்றத்துக்கு மாற்றி நீதிபதிகள் உத்தரவிட்டனர்.
