சென்னை, செப். 24– தமிழ் நாட்டில் புதிய நீதிமன்றங்கள் அமைப்பது தொடர்பான திட்டங்கள் குறித்து இரண்டு வாரங்களில் அறிக்கை தாக்கல் செய்யுமாறு தமிழ்நாடு அரசுக்கு சென்னை உயர் நீதிமன்றம் உத்தரவிட்டுள்ளது. தமிழ்நாடு முழுவதும் புதிய நீதிமன்றங்கள் அமைப்பது தொடர்பாக நிலுவையில் உள்ள திட்டங்கள் குறித்து அறிக்கை தாக்கல் செய்யுமாறு தமிழ்நாடு அரசுக்கு உத்தரவிடக் கோரி சென்னை உயர் நீதிமன்றம் தாமாக முன்வந்து விசாரணைக்கு எடுத்துள்ளது. மாவட்ட நீதித்துறையின் 425 தற்காலிக நீதிமன்றங்களை நிரந்தர நீதிமன்றங்களாக மாற்றுவது தொடர்பாகவும், உள்கட்டமைப்பு வசதிகள் மற்றும் உதவி அரசு வழக்குரைஞர்கள் நியமித்து சிறார் நீதி வாரியங்கள் அமைப்பது தொடர்பாகவும் இந்த வழக்கில் விசாரிக்கப்பட்டு வருகிறது.
இந்த வழக்கு தலைமை நீதிபதி எஸ்.ஏ.தர்மாதிகாரி, நீதிபதி அருள்முருகன் அடங்கிய அமர்வில் விசாரணைக்கு வந்தது. வழக்கை விசாரித்த நீதிபதிகள், தமிழ்நாட்டில் புதிய நீதிமன்றங்கள் அமைப்பது தொடர்பான திட்டங்கள் குறித்து இரண்டு வாரங்களில் பதிலளிக்குமாறு தலைமைச் செயலாளர், உள்துறைச் செயலாளர், பொதுத்துறைச் செயலாளர், நிதித்துறைச் செயலாளர், மனித வள மேலாண்மைத்துறைச் செயலாளர் ஆகியோருக்கு உத்தரவிட்டு விசாரணையை தள்ளிவைத்தார்.
