டேராடூன், செப்.25 உத்தராகண்ட் மாநிலம் இமயமலையில் அமைந்துள்ள கேதார்நாத்தில், நடப்பு ஆண்டில் (2026) ஏப்ரல் முதல் ஆகஸ்ட் வரையிலான வெறும் 5 மாதங்களில் மட்டும் 50.30 மெட்ரிக் டன் குப்பைகள் சேகரிக்கப்பட்டுள்ளன.
கடந்த ஆண்டுகளின் மொத்தக் குப்பை அளவுகளுடன் ஒப்பிடுகையில் இது மிகப்பெரிய உயர்வு ஆகும்:
2023: 32.58 மெட்ரிக் டன், 2024: 26.10 மெட்ரிக் டன்,
2025: 21.40 மெட்ரிக் டன்.
மாத வாரியான தரவுகளின்படி, மே மாதத்தில் மட்டும் அதிகபட்சமாக 16.3 மெட்ரிக் டன் குப்பை உற்பத்தியாகியுள்ளது. மேலும், இந்த ஆண்டு இதுவரை 20 மெட்ரிக் டன் பிளாஸ்டிக் கழிவுகள் உருவானதில், 18.5 மெட்ரிக் டன் கழிவுகள் மறுசுழற்சி செய்யப்பட்டுள்ளதாகத் தெரிவிக்கப்பட்டுள்ளது.
சுற்றுச்சூழல் ஆர்வலர்கள் எச்சரிக்கை
இந்த ஆண்டில் இதுவரை சுமார் 15 லட்சம் பக்தர்கள் கேதார்நாத்திற்கு வருகை தந்துள்ளனர். பக்தர்கள் வருகை அதிகரிப்பால், இமயமலை சுற்றுச்சூழல் மண்டலம் கடுமையான அச்சுறுத்தலைச் சந்தித்து வருகிறது. மிகக் குறுகிய காலத்தில் இந்த அளவிற்கு குப்பைகள் குவிவது கேதார்நாத் பகுதியைக் குப்பை மேடாக மாற்றும் அபாயத்தை ஏற்படுத்தியுள்ளதாகச் சுற்றுச்சூழல் ஆர்வலர்கள் பெரும் கவலை தெரிவித்துள்ளனர்.
