டக்கார், நவ.9 வடமேற்கு ஆப்பிரிக்க நாடான செனகலின் வடக்குக் கடலோரப் பகுதிக்கு அப்பால், அட்லாண்டிக் பெருங்கடல் வழியாக அய்ரோப்பாவை நோக்கிச் சென்ற புலம்பெயர்ந்தோரின் சிறிய படகு ஒன்று கவிழ்ந்து விபத்துக்குள்ளானதில் 21 பேர் பரிதாபமாக பலியானதாக அதிகாரப் பூர்வ தகவல்கள் தெரிவிக்கின்றன.
போர் மற்றும் வறுமையின் பிடியில் சிக்கியுள்ள ஆப்பிரிக்க நாடுகளைச் சேர்ந்த இளைஞர்கள், ஐரோப்பாவில் ஒரு சிறந்த எதிர்காலத்தைத் தேடி மேற்கொள்ளும் ஆபத்தான கடல் பயணங்களில் இது மேலும் ஒரு பேரிடராக மாறியுள்ளது.
செனகல் தலைநகர் டக்காருக்கும், வடக்கே உள்ள செயிண்ட்-லூயிஸ் நகருக்கும் இடைப்பட்ட பகுதியில் அமைந்துள்ள கெபெமர் மாகாணத்தின் லூம்பூல் மணல் குன்றுகளுக்கு அருகில் சனிக்கிழமை இரவு இந்தத் துயரச் சம்பவம் நிகழ்ந்துள்ளது. எனினும், செனகலின் முக்கிய புலம்பெயர்ந்தோர் உதவி சங்கமான ‘போசா ப்வே’ இந்த விபத்து வெள்ளிக்கிழமையன்றே நிகழ்ந் திருக்கக்கூடும் என்று தெரிவித்துள்ளது. இந்த கோர விபத்தில் இதுவரை 21 பேரின் உடல்கள் மீட்கப்பட்டுள்ளதாகவும், ஒரே ஒரு நபர் மட்டுமே உயிருடன் மீட்கப்பட்டுள்ளதாகவும் செனகல் உள்துறை அமைச்சகம் வெளியிட்டுள்ள அறிக்கையில் குறிப்பிடப்பட்டுள்ளது.
