போதைப்பொருள் நடமாடும் சென்னை!

சென்னை, நவ. 9- பெங்களூருவில் இருந்து குட்கா புகையிலை பொருட்களைக் கடத்தி வந்த இளைஞரை மயிலாப்பூரில் காவல் துறையினர் கைது செய்தனர். அவரிடம் இருந்து 91 கிலோ குட்கா புகையிலைப் பொருட்களைப் காவல் துறையினர் பறிமுதல் செய்தனர்.
சென்னை காவல் ஆணையர் அமல்ராஜ் உத்தரவின்படி, மாநகரம் முழுவதும் போதைப் பொருட்கள் மற்றும் தடை செய்யப்பட்ட குட்கா புகையிலை பொருட்களுக்கு எதிரான நடவடிக்கைகள் தீவிரப்படுத்தப்பட்டுள்ளன.
இதற்காக சென்னை முழுவதும் தனிப்படைகள் அமைக்கப்பட்டு, தொடர் கண்காணிப்பு மற்றும் சோதனைகள் மேற்கொள்ளப்பட்டு வருகின்றன.
இந்நிலையில், மயிலாப்பூர் காவல் துறையினருக்குத் கிடைத்த ரகசிய தகவலின்பேரில், நேற்று முன்தினம் (7.11.2026) காலை மயிலாப்பூர் கச்சேரி சாலை, கல்விவாரு வீதி பகுதியில் கண்காணிப்புப் பணியில் ஈடுபட்டனர். அப்போது, அவ்வழியாக சந்தேகத்துக்கிடமாக வந்த இலகு ரக சரக்கு வாகனத்தை நிறுத்தி காவல் துறையினர் சோதனை செய்தனர்.
அதில் தமிழ்நாடு அரசால் தடை செய்யப்பட்ட ஹான்ஸ், விமல், கூலிப் உள்ளிட்ட குட்கா புகையிலைப் பாக்கெட்டுகள் இருப்பது கண்டு பிடிக்கப்பட்டது. இதையடுத்து, சரக்கு வாகனத்தை ஓட்டி வந்த திருவள்ளூர் மாவட்டம் கே.ஜி. கண்டிகையைச் சேர்ந்த சிவா (32) என்பவரை போலீசார் கைது செய்தனர்.
சுமார் 91 கிலோ எடையுள்ள குட்கா புகையிலைப் பாக்கெட்டுகளும், கடத்தலுக்குப் பயன்படுத்தப்பட்ட சரக்கு வாகனமும் பறிமுதல் செய்யப்பட்டன. காவல் துறையினரின் விசாரணையில், சிவா பெங்களூருவில் இருந்து குட்கா புகையிலைப் பொருட்களைக் கடத்தி வந்து சென்னையில் விற்பனை செய்து வந்தது தெரிய வந்தது.
மேலும், இவர் ஏற்கெனவே குட்கா புகையிலை பொருட்கள் விற்பனை தொடர்பாக 2 குற்ற வழக்குகளில் தொடர் புடையவர் என்பதும் விசாரணையில் தெரிய வந்தது. கைது செய்யப்பட்ட சிவா, விசாரணைக்குப் பின்னர் சிறையில் அடைக்கப்பட்டார்.