சென்னை, அக். 28- ரயில் பெட்டிகளில் உள்ள சார்ஜிங் பாயிண்ட்களின் மின் இணைப்பை இரவு 11 மணி முதல் அதிகாலை 5 மணி வரை துண்டிக்க ரயில்வே நிர்வாகம் உத்தரவிட்டுள்ளது.
நவீன தகவல் தொழில்நுட்ப வளர்ச்சியில் கைப்பேசி குறிப்பிடத்தக்க பங்கு வகிக்கிறது. இதற்காக அனைத்து வகையான ரயில் பெட்டிகளிலும் பயணிகளுக்கு கைப்பேசி சார்ஜிங் பாயிண்ட் வைக்கப்பட்டு உள்ளது. இதன் மூலம் பயண நேரத்தில் கைப்பேசி மற்றும் மடிக்கணிகளை சார்ஜ் செய்து கொள்ள முடியும்.
இந்த நிலையில், சில நாள்களுக்கு முன்பு தென்கிழக்கு ரயில்வே மண்டலத்தில் இயக்கப்பட்ட ஒரு ரெயிலில் பயணி ஒருவர் பவர்பேங்கை சார்ஜிங் பாயிண்ட்டில் பொருத்தி விட்டு தூங்கிகொண்டிருந்த போது வெடித்து புகை கிளம்பியது. ஆனால் இந்த சம்பவத்தில் யாருக்கும் காயம் ஏற்படவில்லை.
அதனைத்தொடர்ந்து, ரயில்வே வாரியத்தின் மெக்கானிக்கல் என்ஜினீயரிங் பிரிவு அனைத்து ரயில்வே மண்டலங்களுக்கும் ஒரு சுற்றறிக்கையை அனுப்பி உள்ளது. அதில், ரயில் பெட்டிகளில் உள்ள சார்ஜிங் பாயிண்ட்களின் மின் இணைப்பை இரவு 11 மணி முதல் அதிகாலை 5 மணி வரை துண்டிக்க வேண்டும் என தெரிவிக்கப்பட்டு உள்ளது.
இதனால் பயணிகள் பாதிக்கப்படுவார்கள் என்ற கருத்தும் நிலவுவதால், இந்த உத்தரவை ரயில்வே வாரியம் மறுபரிசீலனை செய்ய வேண்டும் என்ற கோரிக்கையும் எழுந்துள்ளது.
