பாமாயில் கொள்முதலில் குறிப்பிட்ட நிறுவனத்துக்கு மட்டும் அதிக ஒதுக்கீடு!

சென்னை, அக். 17– விழாக் காலங்களை முன்னிட்டு பாமாயில் கொள்முதலில் குறிப்பிட்ட ஒரு தனியார் நிறுவனத்துக்கு மட்டும் அதிக ஒதுக்கீடு செய்த உத்தரவுக்கு உயர் நீதிமன்றம் இடைக்காலத் தடை விதித்துள்ளது.

விழாக் காலங்களை முன்னிட்டு ரேஷன் கடைகள் மூலமாக பொதுமக்களுக்கு தலா ஒரு லிட்டர் வீதம் சுமார் 600 லட்சம் பாமாயில் பாக்கெட்டுகளை விநியோகம் செய்வதற்காக, பாமாயில் கொள்முதலுக்கான ஒப்பந்த அறிவிப்பை தமிழ்நாடு நுகர்பொருள் வாணிபக் கழகம் கடந்த ஜூன் 5இல் வெளியிட்டது.

இந்த ஒப்பந்தத்தில் பல்வேறு தனியார் நிறுவனங்கள் பங்கேற்ற நிலையில் தகுதியின் அடிப்படையில் 4 நிறுவனங்கள் தேர்வு செய்யப்பட்டு அந்த நிறுவனங்களிடமிருந்து முதற்கட்டமாக 200 லட்சம் லிட்டர் பாமாயில் பாக்கெட்டுகளை அக்.29-க்குள் கொள்முதல் செய்ய உத்தரவு பிறப்பிக்கப்பட்டது.

இந்நிலையில் தேர்வு செய்யப்பட்ட 4 நிறுவனங்களில் ஒன்றான சென்னை கொடுங்கையூரைச் சேர்ந்த கேடிவி ஹெல்த் ஃபுட் என்ற நிறுவனம் உயர் நீதிமன்றத்தில் தாக்கல் செய்த மனுவில், ‘‘தமிழ்நாடு அரசின் சிறப்பு பொது விநியோகத்திட்டத்தின் கீழ் 600 லட்சம் லிட்டர் பாமாயில் கொள்முதல் செய்வதற்கான ஒப்பந்தத்தில் எங்களது நிறுவனம் உள்பட 4 நிறுவனங்கள் தேர்வு செய்யப்பட்டன.

அதில் குறைந்த விலையின் அடிப்படையில் ஒரு பாக்கெட்டுக்கு ரூ.148 வீதம் எங்களது நிறுவனம் சார்பில் 360 லட்சம் லிட்டர் பாமாயில் பாக்கெட்டுகளை சப்ளை செய்ய ஒப்பந்தம் செய்தோம்.

அதேபோல் எம்ஜிஎம் என்ற நிறுவனம் 150 லட்சம் லிட்டர் பாக்கெட்டுகளை சப்ளை செய்ய முன்வந்தது. இந்நிலையில் முதற்கட்டமாக எம்ஜிஎம் நிறுவனத்திடமிருந்து 80 லட்சம் லிட்டர் பாக்கெட்டுகளையும், குமார் அக்ரோ என்ற நிறுவனத்திடமிருந்து 52 லட்சம் லிட்டர் பாக்கெட்டுகளையும், இன்டகிரேட்டடு என்ற நிறுவனத்திடமிருந்து 34 லட்சம் லிட்டர் பாக்கெட்டுகளையும், எங்களது நிறுவனத்திடமிருந்து 34 லட்சம் லிட்டர் பாக்கெட்டுகளையும் கொள்முதல் செய்வதற்கான ஒதுக்கீட்டு உத்தரவை நுகர்பொருள் வாணிபக் கழகம் பிறப்பித்து இருப்பது பாரபட்சமானது.

எந்த அடிப்படையில் இந்த ஒதுக்கீடு செய்யப்பட்டது என்பதற்கான தெளிவான அளவுகோல் இல்லை என்பதால் எம்ஜிஎம் நிறுவனத்திடமிருந்து 80 லட்சம் லிட்டர் பாமாயில் கொள்முதல் செய்வதற்காக கடந்த செப்.29இல் பிறப்பித்த உத்தரவுக்கு தடைவிதிக்க வேண்டும்.

அத்துடன் 4 நிறுவனங்களும் சப்ளை செய்ய முன்வந்த பாமாயில் பாக்கெட் அளவுகளின்படி விகிதாச்சாரத்தின்படி கொள்முதல் செய்ய உத்தரவிட வேண்டும்’’ எனக் கோரியிருந்தது. இந்த வழக்கு விசாரணை நீதிபதி பி.டி.ஆஷா முன்பாக நடந்தது.

அப்போது மனுதாரர் நிறுவனம் தரப்பில் ஆஜரான வழக்குரைஞர் ஆர்.சரவணக்குமார், ‘‘நுகர்பொருள் வாணிபக் கழகம் இந்த கொள்முதல் உத்தரவை முறையாகப் பிறப்பிக்கவில்லை. ஒரு குறிப்பிட்ட நிறுவனத்திடமிருந்து மட்டும் அதிகப்படியானபாக்கெட்டுகளை கொள்முதல் செய்வது ஏற்புடையதல்ல’’ என வாதிட்டார்.

அதையடுத்து நீதிபதி, இது தொடர்பாக செப்.29 அன்று பிறப்பித்த உத்தரவுக்கு நவ.2 வரை இடைக்காலத் தடைவிதித்து விசாரணையை அன்றைய நாளுக்கு தள்ளி வைத்துள்ளார்.

கோயில் திருட்டு!

கடவுள் எங்கே போனார்?

பழனி, அக். 17- பழனியில், அறநிலையத்துறை கட்டுப்பாட்டில் உள்ள இடும்பன் கோயிலில் சாமிக்கு அணிவிக்கப்படும் 20.5 பவுன் தங்க நகை, 3 கிலோ வெள்ளி நகைகள் கடந்த சில மாதங்களுக்கு முன்பு திருடுபோனது.

இது தொடர்பாக கோயில் நிர்வாகம் அளித்த புகாரின்பேரில், நகை திருட்டு வழக்கில் பழனி இடும்பன் கோயிலில் தற்காலிக ஊழியராக வேலை செய்த பாப்பம்பட்டி நிரஞ்சனா (வயது 26), அவரது நண்பரான நெய்க்காரப்பட்டி பிரபாகரன் (35) ஆகியோரை காவல் துறையினர் கைது செய்துள்ளனர்.

விசாரணையில், கடந்த ஆண்டு நிரஞ்சனா தற்காலிக ஊழியராக வேலைக்கு சேர்ந்துள்ளார். இதையடுத்து நிரஞ்சனா கோவில் நகையை திருடி, தனது ஆண் நண்பர் பிரபாகரனுடன் சேர்ந்து அதை உருக்கி விற்று, அந்த பணத்தில் இருவரும் ஆடம்பர பொருட்கள், சுற்றுலா என சொகுசாக வாழ்ந்தது தெரியவந்தது. இந்த வழக்கில் வேறு யாருக்கேனும் தொடர்பு உள்ளதா என காவல் துறையினர் விசாரணை நடத்தி வருகின்றனர்.

பள்ளி மாணவர்களுக்கான

ஊரகத் திறனாய்வுத் தேர்வுக்கு
அக்.21 வரை விண்ணப்பிக்க அவகாசம் நீட்டிப்பு

சென்னை, அக். 17- கல்வி உதவித் தொகைக்கான ஊரகத் திறனாய்வுத் தேர்வுக்கு விண்ணப்பிக்கும் கால அவகாசம் அக்.21 வரை நீட்டிக்கப்பட்டுள்ளதாக தேர்வுத் துறை அறிவித்துள்ளது.

இதுகுறித்து தேர்வுத் துறை இயக்குநரகம் வெளியிட்ட செய்திக்குறிப்பு: தமிழ்நாட்டில் கிராமப்புற மாணவர்களை ஊக்குவிப்பதற்காக ஊரகத் திறனாய்வுத் தேர்வு திட்டத்தின்கீழ் கல்வி உதவித்தொகை வழங்கப்பட்டு வருகிறது. அதன்படி பள்ளிகளில் 9ஆம் வகுப்பு பயிலும் மாணவர்கள் இந்தத் திட்டத்தின்கீழ் மாவட்டம்தோறும் தலா 50 மாணவர்கள் தேர்வு செய்யப்பட்டு ஆண்டுக்கு ரூ.1,000 வீதம் 4 ஆண்டுகளுக்குக் கிடைக்கும்.

நடப்பாண்டுக்கான ஊரக திறனாய்வு தேர்வு நவ.21இல் நடக்கிறது. இதற்கான விண்ணப்பப் பதிவு 15ஆம் தேதியுடன் நிறைவுபெற்றது. தற்போது மாணவர்கள் நலன் கருதி கால அவகாசம் அக்.21 வரை நீட்டிக்கப்பட்டுள்ளது.