இந்நாள் – அந்நாள்

லோக் நாயக் ஜெயபிரகாஷ் நாராயணன் பிறந்தநாள் இன்று (11-10-1902)

சமூகநீதி பொதுவுடமை கருத்து களுக்கான அரசியலை புதிய கோணத்தில் துவக்கியவர்.

ஜெயபிரகாஷ் நாராயணன் சுருக்கமாக ஜெ.பி (JP) என்று அழைக்கப்படுபவர், ஒரு புகழ் பெற்ற இந்திய அரசியல் தலைவர், சமூக சிந்தனையாளர் மற்றும் விடுதலைப் போராட்ட வீரர். இவர் ‘மக்களின் தலைவர்’ என்ற பொருளில் லோக்நாயக் என்று அழைக்கப்பட்டார்.

சமூகச் நீதி மற்றும் சமத்துவத்திற்காக வாதாடிய இவர், இந்திய அரசியலில் புரட்சிகரமானவர். பீகார் மாநிலத்தில் உள்ள சீதாப்தியரா கிராமத்தில் 1902 ஆம் ஆண்டு அக்டோபர் 11 ஆம் நாளில் பிறந்தார்.

விடுதலை இயக்கத்தில் ஈடுபாடு

மவுலானா அபுல் கலாம் ஆசாத்தின் உரையால் ஈர்க்கப்பட்டு,  காந்தியாரின் ஒத்துழையாமை இயக்க அறைகூவலை ஏற்று தனது கல்லூரிப் படிப்பை விட்டு வெளியேறினார். பின்னர் அமெரிக்காவிற்குச் சென்று கலிபோர்னியா, விஸ்கான்சின், மற்றும் ஓஹியோ மாநிலப் பல்கலைக்கழகங்களில் பயின்றார். அங்கு அவர் மார்க்சிய சிந்தனைகளால் பெரிதும் ஈர்க்கப்பட்டார்.

காங்கிரஸ் சோசலிஸ்ட் கட்சி

இந்தியா திரும்பிய பின்,  காங்கிரஸ் சோசலிஸ்ட் கட்சியை நிறுவிய முக்கிய தலைவர்களில் ஒருவரானார். 1942 இல் நடந்த வெள்ளையனே வெளியேறு இயக்கத்தின் போது இவர் தீவிரமாகப் பங்கேற்றார் மற்றும் மூத்த தலைவர்கள் கைது செய்யப்பட்ட போது, தலைமறைவாக இருந்து இயக்கத்தை வழிநடத்துவதில் முக்கியப் பங்காற்றினார்.

சுதந்திரத்திற்குப் பிந்தைய பணிகள்
மற்றும் முழுமையான புரட்சி

இவர் அரசியல் வாழ்வில் இருந்து விலகி, நிலமற்றோருக்கு நிலத்தைப் பகிர்ந்தளிக்கும் பூமிதான இயக்கம்  போன்ற சமூகப் பணிகளில் ஈடுபட்டார்.

முழுமையான புரட்சி (Total Revolution)

இந்திய ஜனநாயகத்தின் மீதான இவரது அசைக்க முடியாத நம்பிக்கையும், ஒடுக்கப்பட்ட மக்களுக்கான இவரது இடைவிடாத போராட்டமும் இவரை நாட்டின் வரலாற்றில் ஒரு தவிர்க்க முடியாத தலைவராக நிலை நிறுத்தியுள்ளது. ஈரோட்டில் தந்தை பெரியாரைச் சந்தித்து தமது காங்கிரஸ் சோச லிஸ்ட் கட்சிக்கு அழைப்பு விடுத்தவரும் ஆவார்.

பெண் கல்வியை ஊக்குவித்த மாயூரம் வேதநாயகம் பிள்ளை பிறந்தநாள் இன்று (11-10-1826)

மாயூரம் வேத நாயகம் பிள்ளை, தமிழ் இலக்கியத்தின் முன்னோடிகளில் ஒருவராகத் திகழ்ந்தவர். இவர் ஒரு தமிழ்நாட்டு எழுத்தாளர், கவிஞர், சமூக சேவகர் மற்றும் நீதிபதி ஆவார். திருச்சிராப்பள்ளி மாவட்டத்திலுள்ள வேளாண் குளத்தூரில் 1879 ஆம் ஆண்டு அக்டோபர் 11 ஆம் நாள் பிறந்தார்.

ஆங்கிலேயர் ஆட்சிக் காலத்தில் தரங்கம்பாடி நீதிமன்றத்துக்கு நீதிபதியாக நியமிக்கப்பட்டதன் மூலம் முதல் இந்திய நீதிபதியாகப் பதவியேற்றவர் வேதநாயகம் பிள்ளை. பின்னர் சீர்காழி, மயிலாடுதுறை உட்படப் பல்வேறு ஊர்களில் பணிபுரிந்தாலும் மாயூரத்தின் மேல் கொண்ட அன்பால், தனது பெயருக்கு முன்னால் அதனைச் சேர்த்துக்கொண்டு மாயூரம் வேதநாயகம் பிள்ளை என்று ஆனவர்.

தனது தந்தையிடமும், பின்னர் புலவர் தியாகராச பிள்ளை என்பவரிடமும் தமிழ் மொழியைக் கற்றார். சமஸ்கிருதம், பிரெஞ்சு மற்றும் லத்தீன் மொழிகளையும் அறிந்திருந்தார். வீணை இசைப்பதிலும் வல்லமை பெற்றிருந்தார்.

நீதித்துறைப் பணி

திருச்சியில் ஆவணக் காப்பாளராகப் பணியில் சேர்ந்து, பின்னர் மொழிபெயர்ப்பாளராகப் பணியாற்றினார். சட்டம் பயின்று, 1860 ஆம் ஆண்டில் மாயூரம் (தற்போதைய மயிலாடுதுறை) மாவட்ட முன்சீஃப் (மாவட்ட நீதிபதி) ஆகப் பொறுப்பேற்று 13 ஆண்டுகள் பணியாற்றினார். இவர் மாயூரம் முன்சீஃப் என அழைக்கப்பட்டதால், மாயூரம் வேதநாயகம் பிள்ளை எனப் புகழ் பெற்றார். இவர் தென்மாநில நீதிமன்றத் தீர்ப்புகளை முதன்முதலில் தமிழில் மொழிபெயர்த்து வெளியிட்டார்.

சமூகப் பணிகள்: இவர் பெண் கல்வியை ஊக்குவித்தார். மாயவரத்தில் பெண்களுக்காகப் பள்ளியைத் தொடங்கினார், இது தமிழ்நாட்டில் பெண்களுக்காகத் தொடங்கப்பட்ட முதல் பள்ளிகளில் ஒன்று. 1876-1878 ஆண்டுகளில் தமிழ்நாட்டில் ஏற்பட்ட பஞ்சத்தின்போது தனது சொத்துகள் அனைத்தையும் ஏழை மக்களுக்குக் கொடையளித்தார்.

வேதநாயகம் பிள்ளை தமிழ் உரைநடையை வளம்பெறச் செய்த முன்னோடிகளில் முக்கியமானவர்.

பிரதாப முதலியார் சரித்திரம் (1879) இதுவே தமிழில் வெளியான முதல் நவீன புதினம் ஆகும். பெண் கல்வி, பெண்கள் விடுதலை, சமூக சீர்திருத்தம் போன்ற தனது கருத்துகளை இப்புதினத்தின் மூலம் வெளிப்படுத்தினார். சுகுண சுந்தரி இவருடைய மற்றொரு நாவலாகும்.

வேதநாயகம் பிள்ளை, நீதியாளர், சமூக சேவகர், தமிழ்ப் புலவர் மற்றும் முதல் தமிழ் நாவலாசிரியர் எனப் பன்முகத் திறமையுடன் வாழ்ந்தவர். இவரது எழுத்துகள் எளிய தமிழில் அமைந்து மக்கள் மனதில் நீதியையும், பெண் கல்வி போன்ற புதிய சிந்தனைகளையும் விதைத்தன. வேதநாயகம் பிள்ளை 1889 ஆம் ஆண்டு ஜூலை 21 ஆம் நாளில் தமது 63 ஆம் வயதில் மறைவுற்றார்.

தகவல் :  பாணாவரம் பெ. வீரமணி