சர்.ஜான் மார்ஷல் சிலையல்ல, நமக்கு வழிகாட்டியாக இருக்கிற ஒரு சீலம்! அவரது சிலைக்கு மாலையணிவித்த தமிழர் தலைவர் ‘கலைஞர்’ தொலைக்காட்சிக்குத் அளித்த நேர்காணல்!

சென்னை, செப்.29 சர்.ஜான் மார்ஷல் சிலையல்ல, நமக்கு வழிகாட்டியாக இருக்கிற ஒரு சீலம்! என்று அவரது பிறந்த நாளில் (22.9.2026) எழும்பூர் கலையரங்கத்தில் உள்ள சிலைக்கு மாலையணிவித்த தமிழர் தலைவர் ஆசிரியர் ‘கலைஞர்’ தொலைக்காட்சிக்குத் அளித்த நேர்காணல் வருமாறு:

சிந்துவெளி நாகரிகம் என்ற சிறப்பான நாகரிகம் திராவிட நாகரிகம் என்பதை உலகுக்கே அறிவித்த ஒரு பெரிய தொல்லியல் ஆய்வறிஞர் தொல்லியல் துறையிலே ஒப்பாரும் மிக்காரும் இல்லாத ஒரு அரிய தொண்டினை செய்த சர்.ஜான் மார்ஷல் அவர்களுடைய, 150 ஆம் பிறந்தநாள் விழாவை ஒட்டி, மீண்டும் ஒரு பண்பாட்டுப் படையெடுப்பை தடுத்து நிறுத்த, இதுபோன்ற நினைவுகளும், நிகழ்ச்சிகளும், விழாக்களும் தேவை என்ற அடிப்படையிலேதான் இதைச் செய்கிறோம்.

‘திராவிட மாடல்’ ஆட்சியில், முதலமைச்சர் மு.க.ஸ்டாலின் அவர்கள், சர் ஜான் மார்ஷல் அவர்களுக்கு சிலை நிறுவி, வரலாற்றிலே ஒரு புதிய அத்தியாயத்தைச் சேர்த்தார்கள். வேதகால நாகரிகம்தான் முந்திய நாகரிகம் என்ற வரலாற்றுப் புரட்டை உடைத்துக்காட்டி, இல்லையில்லை திராவிட நாகரிகம்தான் சிந்துவெளி நாகரிகம்தான் முந்தியது என்பதையும், ஆடு, மாடு மேய்த்துக்கொண்டு மேய்ச்சல் நிலத்தைத் தேடி வந்தவர்கள் நிரந்தரமானவர்கள் அல்ல. அவர்கள் குடியேறிகள்தான்; வந்தேறிகள்தான் என்பதை மறைமுகமாக அல்ல, நேரிடையாகவே ஆதாரங்களுடன் சுட்டிக்காட்டியிருக்கிறார்.

இன்றைக்கும் கீழடி போன்றவை தொடர்ச்சியான சான்றுகளாக இருந்துகொண்டிருக்கின்றன. அப்படிப்பட்டவரின் சிறப்பான நிகழ்ச்சியை அறிஞர்கள் பால கிருஷ்ணன், பேராசிரியர் கருணா னந்தன், பேராசிரியர் தேன்மொழி ஆகியோர் கலந்துகொண்டு சிறப்பாக நடத்த இருக்கிறார்கள்.

பண்பாட்டுப் படையெடுப்பு என்பது அரசியல் படையெடுப்பைவிட ஆபத்தானது. மக்களுக்கு புரிய வைக்க வேண்டும். அதற்காகத்தான் ஆய்வறி ஞர்களுக்கு நாம் சிறப்பு செய்கிறோம். திராவிடம் என்றால், ஏதோ ஒரு இடத்தையோ, இனத்தையோ குறிப்பது அல்ல. அது பண்பாட்டைக் குறிப்பது என்பதை சிறப்பாக நிலைநாட்டுவதற்கு மிகப்பெரிய சான்றாவணமாகத்தான் சிலையாக நிற்கிறார். அது சிலையல்ல, நமக்கு வழிகாட்டியாக இருக்கிற ஒரு சீலம் என்று கூறுகிறோம்.

– இவ்வாறு ‘கலைஞர்’ தொலைக் காட்சிக்குப் பேட்டியளித்தார் தமிழர் தலைவர் ஆசிரியர்.

சிந்துவெளி ஆய்வாளர் முனைவர் ஆர்.பாலகிருஷ்ணன், பேராசிரியர் கருணானந்தன், கழகத் துணைத் தலைவர் கவிஞர் கலி.பூங்குன்றன், பொதுச்செயலாளர் வீ.அன்புராஜ், பொருளாளர் வீ.குமரேசன், சேதுராமன் ஆகியோர் உடனிருந்தனர்.