மாந்தர் கெடுதலை விலக்க…
கெடுதலெது? மண்ணைச் சுரண்டுவது மட்டுமா?
மாந்தர் உழைப்பைத் திருடுவதும் அல்லவா…
மனிதநேயம் மறந்து வாழ்வதும் கெடுதல்தான்…
அடிமைசெய்த வெளிநாட்டினரை விரட்டுவதா விடுதலை?
அடிமைத்தனம் உள்நாட்டிலெனினும்
விரட்டுவதும்தானே விடுதலை!
ஜாதியை விரட்டி பெறுவோம் விடுதலை.
வீதித்தீண்டாமை ஒழித்து அடைவோம் விடுதலை…
மதத்தைத் துரத்தியடித்து மனிதர்களுக்கு விடுதலை.
மனிதனைப் பிரிப்பது கடவுள் என்றால்…
அதனையும் எதிர்க்கும் ஆற்றலே
அறிவு விடுதலை!
எதனையும் கேள்வி கேட்பதே
பகுத்தறிவு விடுதலை!
வீரச்சுதந்திரம் வகுப்புவாரி விடுதலையே…
தூரம் ஒதுக்கியோர்க்கு,
இடஒதுக்கீடே விடுதலை!
சொந்த மண்ணில் ஒடுக்கப்பட்டோர் பாட்டாளிகள்…
ஈந்த உழைப்பிற்கு இழப்பீடுதான் விடுதலை!
– மாரி கருணாநிதி
