புதுடில்லி, செப்.2– ஒன்றிய அரசின் பொருளாதாரக் கொள்கைகள், நாட்டில் நிலவும் விலைவாசி உயர்வு மற்றும் வேலைவாய்ப்பின்மை ஆகியவற்றை கண்டித்து இந்திய கம்யூனிஸ்டு கட்சியினர் “மாற்றம் அவசியம் தேவை” எனும் தலைப்பில் டில்லியில் நேற்று (1.9.2026) பேரணி மற்றும் ஆர்ப்பாட்டம் நடத்தினர்.
இந்திய கம்யூனிஸ்டு கட்சியின் பொதுச்செயலாளர் டி.ராஜா தலைமையில் நடைபெற்ற இந்தப் போராட்டத்தில் நாடு முழுவதும் இருந்து ஆயிரக்கணக்கான நிர்வாகிகள், தொண்டர்கள், விவசாயிகள், தொழிலாளர்கள் மற்றும் இளைஞர்கள் கலந்துகொண்டனர். தமிழ்நாட்டில் இருந்து மாநில செயலாளர் மு.வீரபாண்டியன், திருப்பூர் எம்.பி. கே.சுப்பராயன், நாகப்பட்டினம் நாடாளுமன்ற உறுப்பினர் வை.செல்வராஜ், தேசிய கட்டுப்பாட்டுக் குழு உறுப்பினர் இரா.முத்தரசன் உள்ளிட்டோர் கலந்துகொண்டனர்.
ஆர்ப்பாட்டத்தில், பொதுச்செயலாளர் டி.ராஜா பேசுகையில், “மோடி பிரதமர் ஆனதில் இருந்து, நமது தேசம் தொடர்ந்து நெருக்கடியில் உள்ளது. அரசியலமைப்பு, ஜனநாயகம், மதச்சார்பின்மை, கூட்டாட்சி ஆகியவற்றிற்கு அச்சுறுத்தல்கள் அதிகரித்து வருகின்றன. மக்கள் ஒரு மாற்றத்தை எதிர்பார்க்கிறார்கள் என்றார்.
