புதுடில்லி, மே 17- சிறு மற்றும் நடுத்தர வரி செலுத்துவோர் 2026-2027 மதிப்பீட்டு ஆண்டிற்கான (Assessment Year) வருமான வரித் தாக்கல் (ITR) செய்வதற்கான புதிய வசதியை வருமான வரித்துறை தற்போது தொடங்கியுள்ளது.
இதற்கான அய்டிஆர்-1 (ITR-1) மற்றும் அய்டிஆர்-4 (ITR-4) படிவங்களுக்கான எக்ஸல் (Excel) மற்றும் ஆன்லைன் படிவங்கள் வருமான வரித்துறையின் அதிகாரப்பூர்வ இணையதளத்தில் வெளியிடப்பட்டுள்ளன.
2025-2026 நிதியாண்டில் ஈட்டிய வருமானத்திற்கான இந்த வரிப் படிவங்கள் கடந்த மார்ச் 30ஆம் தேதி அறிவிக்கப்பட்டன. தற்போது இதற்கான இணைய வழி நடைமுறைகள் முழுமையாகத் தொடங்கப்பட்டுள்ளதால், தகுதியுள்ள வரி செலுத்துவோர் தங்களுக்கான படிவங்களைப் பதிவிறக்கம் செய்து, விவரங்களைச் சரிபார்த்து உடனே வரித் தாக்கல் செய்யத் தொடங்கலாம் என அறிவிக்கப்பட்டுள்ளது.
காலக்கெடு விவரங்கள்
வரி செலுத்துவோர் தங்களின் படிவங்களைத் தாக்கல் செய்ய வேண்டிய கடைசித் தேதிகள் வருமாறு:
அய்டிஆர்-1 படிவம் (தனிநபர்கள்): ஜூலை 31
அய்டிஆர்-4 படிவம்: ஆகஸ்ட் 31
அதிக எண்ணிக்கை யிலான சிறு மற்றும் நடுத்தர வரி செலுத்துவோர் பயன்படுத்தும் வகையில் இந்த இரண்டு படிவங்களும் மிகவும் எளிமையான முறையில் வடிவமைக்கப்பட்டுள்ளன.
தற்போது இணையவழி மற்றும் எக்ஸல் பயன்பாடுகள் அறிமுகமாகியுள்ளதால், வரி செலுத்துவோர் எவ்வித சிரமமும் இன்றி எளிதாக வரி தாக்கல் செய்யலாம் என வருமான வரித்துறை தெரிவித்துள்ளது.
