புதுடில்லி, அக்.05 மாநிலங்களவை தலைவர் சி.பி.ராதாகிருஷ்ணன் மற்றும் மக்களவைத் ஓம் பிர்லா ஆகியோர் பல்வேறு துறை சார்ந்த நாடாளுமன்ற நிலைக்குழுக்களை மாற்றி அமைத்து உத்தரவிட்டுள்ளனர்.
இந்த மாற்றங்களில், திரிணாமூல் காங்கிரஸ் கட்சிக்கு பெரும் பின்னடைவு ஏற்பட்டுள்ளது. குறிப்பாக, அந்தக் கட்சி வகித்து வந்த இரண்டு முக்கியமான நிலைக்குழு தலைவர் பதவிகள் பறிக்கப்பட்டுள்ளன. வர்த்தகத் துறைக்கான நாடாளுமன்றக் குழுவின் தலைவராக இருந்த திரிணாமூல் காங்கிரஸ் நாடாளுமன்ற உறுப்பினர் டோலா சென்னுக்குப் பதிலாக, பாஜகவைச் சேர்ந்த சுதான்ஷு திரிவேதி புதிய தலைவராக நியமிக்கப்பட்டுள்ளார்.
அதேபோல், ரசாயனம் மற்றும் உரங்கள் துறைக்கான நிலைக்குழு தலைவர் பதவியிலிருந்து திரிணாமூல் காங்கிரஸின் கீர்த்தி ஆசாத் நீக்கப்பட்டுள்ளார். அவருக்குப் பதிலாக, அதே கட்சியைச் சேர்ந்த அதிருப்தி பிரிவுத் தலைவரான ககோலி கோஷ் தஸ்திதார் இப்பதவிக்கு நியமிக்கப்பட்டுள்ளார். மறுபுறம், திமுக நாடாளுமன்ற உறுப்பினர்களுக்கு மீண்டும் முக்கியப் பொறுப்புகள் வழங்கப்பட்டுள்ளன. தொழில்துறைக்கான நாடாளுமன்றக் குழுவின் தலைவராக திருச்சி சிவாவும், உணவு, நுகர்வோர் விவகாரங்கள் மற்றும் பொது விநியோகத் துறைக்கான குழுவின் தலைவராக கனிமொழியும் மீண்டும் நியமிக்கப்பட்டுள்ளனர்.
இதர எதிர்க்கட்சிகளைப் பொறுத்தவரை, காங்கிரஸ் கட்சியைச் சேர்ந்த சசி தரூர் (வெளியுறவு விவகாரங்கள்), சரண்ஜித் சிங் சன்னி (விவசாயம்) மற்றும் முகுல் வாஸ்னிக் (கல்வி, பெண்கள், குழந்தைகள் மற்றும் இளைஞர் நலம்) ஆகியோர் தங்களது நிலைக்குழு தலைவர் பதவிகளில் தொடர்ந்து நீடிக்கின்றனர்.
