ஓர் கண் துடைப்பு நாடகம்!

சி.பி.எஸ்.இ. 12ஆம் வகுப்பு தேர்வில் டிஜிட்டல் விடைத்தாள் மதிப்பீட்டில் முறைகேடு
சி.பி.எஸ்.இ. தலைவர், செயலாளர் மாற்றம்
விசாரணை நடத்த ஒரு நபர் குழு; ஒன்றிய அரசு நடவடிக்கை

புதுடில்லி, ஜூன் 3 சிபிஎஸ்இ 12ஆம் வகுப்பு விடைத்தாள்களை திருத்த அறிமுகம் செய்யப்பட்ட டிஜிட்டல் மதிப்பீட்டு முறையில் முறைகேடுகள் நடந்ததைத் தொடர்ந்து, சிபிஎஸ்இ தலைவர் ராகுல் சிங் மற்றும் செயலாளர் ஹிமான்ஷு குப்தா ஆகியோரை தேசிய கல்வி வாரியத்தில் இருந்து இடமாற்றம் செய்து ஒன்றிய அரசு நடவடிக்கை எடுத்துள்ளது. மேலும், இதற்கான ஓஎஸ்எம் தொழில்நுட்ப சேவை கொள்முதல் நடவடிக்கை குறித்து விசாரிக்க ஒருநபர் குழுவும் அமைக்கப்பட்டுள்ளது.

டிஜிட்டல் விடைத்தாள் திருத்த முறைகேடு

சிபிஎஸ்இ 12ஆம் வகுப்பு பொதுத்தேர்வு முடிவுகள் கடந்த மே 13ஆம் தேதி வெளியிடப்பட்டன. அதில், தேர்ச்சி விகிதம் குறைந்ததோடு, பல மாணவர்களுக்கு மதிப்பெண் குறைவாக வந்தது பெரும் அதிர்ச்சியை ஏற்படுத்தியது. இதைத் தொடர்ந்து, வழக்கத்திற்கு மாறாக 4 லட்சத்திற்கும் மேற்பட்ட மாணவர்கள் தங்களின் ஸ்கேன் செய்யப்பட்ட விடைத்தாள் நகல் கோரி விண்ணப்பித்தனர். அதில், பலரது ஸ்கேன் செய்யப்பட்ட விடைத்தாள் மங்கலாக இருப்பதாக வும், விடைத்தாளின் பல பக்கங்கள் விடுபட்டிருப்பதாகவும், விடைத் தாள்களே மாறியிருப்பதும் என பல குளறுபடிகள் நடந்திருப்பது வெளிச்சத் திற்கு வந்தது.

இதற்கு, சிபிஎஸ்இ இம்முறை விடைத்தாள்களை திருத்த அறிமுகப் படுத்திய ஆன் ஸ்கிரீன் மார்க்கிங் (ஓஎஸ்எம்) எனும் டிஜிட்டல் மதிப் பீட்டு முறையே காரணம் என மாணவர்களும், பெற்றோர்களும் குற்றம்சாட்டினர். விடைத்தாள்களை ஆசிரியர்கள் நேரடியாக திருத்துவதற்கு பதிலாக, அவை ஸ்கேன் செய்யப்பட்டு கணினி வழியாக டிஜிட்டல் முறையில் திருத்துவதற்கான சேவையே ஓஎஸ்எம் முறையாகும்.

இதற்கான சோதனை முயற்சிகளின் போது, ஆசிரியர்கள் உள்ளிட்ட பல்வேறு தரப்பினர் பல தொழில்நுட்ப குறைபாடுகளை சுட்டிக்காட்டிய போதிலும், சிபிஎஸ்இ நிர்வாகம் எதையும் தீவிரமாக எடுத்துக் கொள்ளாமல் ஓஎஸ்எம் முறையை கொண்டு வந்ததால் 17 லட்சம் மாணவர்கள் பாதிக்கப்பட்டதாக நாடு முழுவதும் பெற்றோர் மத்தியில் கொந்தளிப்பு ஏற்பட்டது.

இதற்கிடையே, ஓஎஸ்எம் தொழில்நுட்பத்தை எளிதாக ஹேக் செய்யும் வகையில் பாதுகாப்பற்ற முறையில் இருப்பதை 12ஆம் வகுப்பு மாணவர் ஒருவரே கண்டறிந்து சமூக ஊடகங்களில் அமல்படுத்தினார். மேலும், ஓஎஸ்எம் சேவைக்கான ஒப்பந்தத்தை பெற்ற தெலங்கானாவைச் சேர்ந்த கோஎம்ட் எஜூகேட் நிறுவனத்தின் மீதும் அடுக்கடுக்கான குற்றச்சாட்டுகள் எழுந்தன.

சிபிஎஸ்இ தலைவர் மாற்றம்

இதுமட்டுமின்றி, மறுமதிப்பீட்டிற்காக சிபிஎஸ்இ இணையதளத்தில் மாணவர்கள் விண்ணப்பிக்க முயன்ற போது தொழில்நுட்ப கோளாறுகள் ஏற்பட்டு விண்ணப்ப கட்டணம் ரூ.69,000 என தாறுமாறாக காட்டியதும் சர்ச்சையானது.

ஏற்ெகனவே நீட் வினாத்தாள் கசிந்ததாக, அத்தேர்வு ரத்து செய்யப் பட்டு மறுதேர்வு நடக்க இருக்கும் நிலையில், சிபிஎஸ்இ தேர்வையும் நியாயமாக நடத்த முடியாத ஒன்றிய அரசின் திறமையின்மை இளம் தலைமுறையினர் மத்தியில் கடுமையான அதிருப்தியை ஏற்படுத்தியது.

இதற்கு பொறுப்பேற்று ஒன்றிய கல்வி அமைச்சர் தர்மேந்திர பிரதான் பதவி விலக வேண்டுமென்று காங்கிரஸ் உள்ளிட்ட எதிர்க்கட்சிகள் கடும் அழுத்தம் கொடுத்து வருகின்றன. நாடாளுமன்ற நிலைக்குழுவும் இந்த விவகாரம் குறித்து சிபிஎஸ்இ அதிகாரிகள் விளக்கம் தர அறிவிக்கை அனுப்பியது. இந்நிலையில், சிபிஎஸ்இ தலைவர் ராகுல் சிங் மற்றும் செயலாளர் ஹிமான்ஷு குப்தா ஆகியோரை தேசிய கல்வி வாரியத்தில் இருந்து இடமாற்றம் செய்து ஒன்றிய அரசு நேற்று நடவடிக்கை எடுத்தது.

இதுதவிர, ஓஎஸ்எம் சேவைகளை கொள்முதல் செய்வது தொடர்பான விஷயங்களை விசாரிக்க திறன் மேம் பாட்டு ஆணையத்தின் தலைவர் எஸ். ராதா சவுகான் தலைமையில் ஒருநபர் குழு அமைக்கப்பட்டி ருப்பதாக ஒன்றிய அமைச்சரவைச் செயலகம் வெளியிட்ட அறிவிப்பில் கூறப்பட்டுள்ளது. இந்த விஷயத்தில், தேவைக்கேற்ப மற்ற துறை அதிகாரிகளின் உதவியைப் பெறுவதற்கு சவுகானுக்கு அதிகாரம் வழங்கப்பட்டுள்ளது.

இக்குழு தனது அறிக்கையை ஒரு மாதத்திற்குள் ஒன்றிய பணியாளர் மற்றும் பயிற்சித் துறையிடம் சமர்ப் பிக்கும்.  ஒன்றிய கல்வி அமைச்சரின் பதவியை பறிக்க வேண்டுமென்ற குரல்கள் வலுத்து வரும் நிலையில், அதிகாரிகளின் இடமாற்றம் திசை திருப்பும் நடவடிக்கை எனவும் விமர் சனங்கள் எழுந்துள்ளன.

நாடாளுமன்ற குழுவிடம் விளக்கம்
தந்த மாணவன்

ஒன்றிய கல்வி, பெண்கள், குழந்தைகள், இளைஞர்கள் மற்றும் விளையாட்டு துறைக்கான நாடாளு மன்ற நிலைக்குழு முன்பாக, 12ஆம் வகுப்பு மாணவர் சர்தக் சித்தாந்த்  ஆஜராகி விளக்கம் அளித்தார். இவர் தான் ஓஎஸ்எம் டெண்டரில் நடந்த விதிமுறை முறைகேடுகளை அம்பலப்படுத்தியவர். இவர் நாடாளுமன்ற குழுவிடம், சிபிஎஸ்இ தலைவர் ராகுல் சிங், பள்ளி கல்வித் துறை செயலாளர் சஞ்சய் குமார் மற்றும் கல்வி அமைச்சக அதிகாரிகள் முன்னிலையில் தனது விளக்க அறிக்கையை சமர்பித்தார்.

இதற்கு பதிலளித்த சிபிஎஸ்இ அதிகாரிகள் இணையதளத்தில் தொழில்நுட்ப கோளாறுகள் சரி செய் யப்பட்டு விட்டதாகவும், மாணவர்கள் விடைத்தாள்களை மறுமதிப்பீடு செய்ய விண்ணப்பிக்க அவகாசம் நீட்டிக்கப்பட்டிருப்பதாகவும் அறிக்கை சமர்பித்துள்ளனர். இதில் மாணவர்கள் எழுப்பியுள்ள கவலைகளை பரிசீ லிப்பதாக நாடாளுமன்ற நிலைக் குழு தலைவர் திக்விஜய் சிங் தெரிவித் துள்ளார்.

மறுமதிப்பீடு வெப்சைட்
செயல்பாட்டிற்கு வந்தது

மாணவர்கள் விடைத்தாள்களை சரிபார்க்கவும், மறுமதிப்பீட்டிற்கு விண்ணப்பிக்கவும் சிபிஎஸ்இ கொண்டு வந்த தனித்த இணையதளத்திலும் கடுமையான தொழில்நுட்ப பிரச் சினைகள் ஏற்பட்டன. ஒரே நேரத்தில் பல மாணவர்கள் விண்ணப்பிக்க முயன்றதால் இந்த இணையதளம் முடங்கியது. இதனால் மே 29 வரை மறுமதிப்பீட்டிற்கு விண்ணப்பிக்க கால அவகாசம் நீட்டிக்கப்பட்ட நிலையில், தொழில்நுட்ப பிரச்சினைகள் இல்லாத வகையில் புதிய இணையதளம் ஜூன் 1ஆம் தேதி முதல் செயல்பாட்டிற்கு வரும் என சிபிஎஸ்இ அறிவித்தது.

அதன்படி, சரி செய்யப்பட்ட மறுமதிப்பீட்டிற்கான இணையதளம் நேற்று செயல்பாட்டிற்கு கொண்டு வரப்பட்டது. அதில், ஏற்ெகனவே ஸ்கேன் செய்யப்பட்ட விடைத்தாள் நகல் பெற்ற மாணவர்கள் மட்டும் மறுமதிப்பீட்டிற்கு விண்ணப்பிக்க முடியும் என சிபிஎஸ்இ தெரிவித் துள்ளது. வரும் 6ஆம் தேதிக்குள் விடைத்தாள் சரிபார்ப்பு மற்றும் மறுமதிப்பீட்டிற்கு விண்ணப்பிக்கவும் அறிவுறுத்தப்பட்டுள்ளது.

புதிய தலைவர் நியமனம்

சிபிஎஸ்இ தலைவர், செயலாளர் அதிரடி மாற்றத்தை தொடர்ந்து உடனடியாக புதிய தலைவராக மூத்த அய்ஏஎஸ் அதிகாரி லோகன்டே பிரசாந்த் சீதாராமையும், செயலாளராக வருண் பரத்வாஜையும் நியமித்து ஒன்றிய அரசு உத்தரவிட்டது.