சென்னை, நவ. 7- தமிழ்நாட்டில் தொழில் வளர்ச்சியை அதிகரித்து, வெளிநாட்டு மற்றும் உள்நாட்டு முதலீட்டாளர்களை ஈர்க்கும் வகையில் தலைமை செயலாளர் தலைமையில் புதிய முதலீட்டாளர் ஊக்குவிப்பு ஆணையத்தை தமிழ்நாடு அரசு அமைத்துள்ளது. இதற்கான அரசாணை வெளியிடப்பட்டுள்ள நிலையில், 19 அரசு உயர் அதிகாரிகள் இந்த ஆணையத்தில் இடம்பெற உள்ளனர்.
தமிழ்நாட்டில் தொழில் தொடங்கு வதற்கு முதலீட்டாளர்கள் பல்வேறு துறைகளின் அனுமதிகளை பெற வேண்டியுள்ளது. இதனால் ஏற்படும் காலதாமதம் மற்றும் நிர்வாக சிக்கல்களைக் குறைத்து, முதலீட்டு திட்டங்களை விரைவாக செயல்படுத்தும் நோக்கில் இந்த நடவடிக்கை எடுக்கப்பட்டுள்ளது.
தலைமை செயலாளர் தலைமையில் செயல்படும் இந்த ஆணையத்தில் தொழில், நிதி, வர்த்தகம், மின்சாரம், சுற்றுச்சூழல், நில ஒதுக்கீடு உள்ளிட்ட துறைகளின் 19 அதிகாரிகள் உறுப்பினர்களாக இருப்பார்கள். வர்த்தக துறை செயலாளர் ஒருங்கிணைப்பாளராக செயல்படுவார்.
