ஆளும்கட்சியின் தகவல் தொழில்நுட்ப அணி போல காவல்துறை செயல்படக் கூடாது – கனிமொழி எம்.பி.

தூத்துக்குடி, அக். 28- ஆளும் கட்சியின் அய்டி விங்க் போல காவல்துறை செயல்படக்கூடாது என்று திமுக துணைப் பொதுச் செயலாளர் கனிமொழி எம்.பி. தெரிவித்தார்.

தூத்துக்குடி விமான நிலையத்தில் நேற்று (27.10.2026) செய்தியாளர் களுக்கு அவர் அளித்த பேட்டியில் கூறியுள்ளதாவது:

தவெக ஆட்சிப் பொறுப்பை ஏற்றுக்கொண்ட பிறகு தமிழ்நாடு முழுவதும் இதுவரை 50 கைதிகளுக்கு மேல் சிறைகளில் இருந்து தப்பி ஓடியுள்ளனர். ஒரே நாளில் 17 கைதிகள் தப்பிச் செல்லக்கூடிய அவலமான சூழ்நிலை தமிழ்நாட்டில் நிலவுகிறது.

நடக்கக்கூடிய தவறுகளை சுட்டிக்காட்டும்போது, காவல் துறையினர் ஆளும்கட்சிக்காக குரல் கொடுக்கக் கூடியவர்களாகவும், அரசியல் தலைவர்களுக்கு பதில் சொல்லக் கூடியவர்களாகவும் மாறியிருக்கின்றனர். காவல் துறை அவர்களுடைய பணிகளை செய்ய வேண்டுமே தவிர, ஆளும்கட்சியின் அய்டி விங்க் போல செயல்படக் கூடாது.

அத்தியாவசியப் பொருட்களின் விலை உயர்ந்து கொண்டே இருக்கிறது. சட்டம் –- ஒழுங்கு சீர்குலைவை கண்டித்தும், விலைவாசி உயர்வைக் கண்டித்தும் அனைத்து மாவட்டத் தலைநகரங்களிலும் வரும் 31ஆம் தேதி திமுக மகளிரணி சார்பில் ஆர்ப்பாட்டம் நடைபெற உள்ளது. அரசின் நேரடி கட்டுப்பாட்டில் இருக்கக்கூடிய ஆவின் பொருட்களின் விலையையாவது கட்டுப்பாட்டில் வைத்திருக்கலாம். அதையும் அவர்கள் செய்யவில்லை. இவ்வாறு கனிமொழி தெரிவித்தார்.