திண்டுக்கல் செப். 28– பொதுப்பாதையை ஆக்கிரமித்து கட்டப்படும் கட்டடங்கள் நீதிமன்ற உத்தரவின்படி அகற்றப்பட்டு வருகின்றன. அந்த வகையில், திண்டுக்கல் மாவட்டம் அம்மையநாயக்கனூரில் பொதுப்பாதையை ஆக்கிரமித்துக் கட்டப்பட்டிருந்த 3 கோயில்களை வருவாய்த்துறையினர் இடித்து அகற்றினர்.
வண்டிப்பாதை ஆக்கிரமிப்பு
திண்டுக்கல் மாவட்டம் கொடைரோடு அருகே, அம்மையநாயக்கனூர் காவல் நிலையம் எதிரே சிறுமலை கிழக்கு தோட்டத்திற்குச் செல்லும் பொது வண்டிப்பாதை உள்ளது. இங்குச் சீலைக்காரி அம்மன், சோனை கருப்புசாமி, வீரகாளியம்மன் ஆகிய 3 சிறிய கோயில்கள் இருந்தன. கடந்த சில ஆண்டுகளுக்கு முன்பு இக்கோயில்கள் பெரிதாகக் கட்டப்பட்டு, குட முழுக்கு நடத்தப்பட்டது. இதனால் நாள்தோறும் பக்தர்கள் வந்து வழிபட்டுச் சென்றனர்.
இந்நிலையில், இக்கோயில்கள் பொதுப்பாதையை ஆக்கிரமித்துக் கட்டப்பட்டுள்ளதாக அம்மையநாயக்க னூரைச் சேர்ந்த ராஜராஜ சோழன் என்பவர் சென்னை உயர்நீதிமன்ற மதுரைக் கிளையில் வழக்குத் தொடர்ந்தார். வழக்கை விசாரித்த நீதிபதி, பாதையை ஆக்கிரமித்துக் கட்டப்பட்ட 3 கோயில்களையும் இடித்து அகற்ற உத்தர விட்டார்.
பொக்லைன் எந்திரம் மூலம் இடிப்பு
நீதிமன்ற உத்தரவின்படி, நிலக்கோட்டை வட்டாட்சியர் (தாசில்தார்) ராமசாமி, அம்மையநாயக்கனூர் பேரூராட்சி செயல் அலுவலர் (பொறுப்பு) இளவரசி ஆகியோர் தலைமையில் 3 கோயில்களின் கட்டடங்களும் பொக்லைன் எந்திரத்தின் உதவியுடன் இடித்து அகற்றப்பட்டன. தொடர்ந்து, கோயில்களில் இருந்த சுவாமி சிலைகள் வட்டாட்சியர் அலுவலகத்திற்கு எடுத்துச் செல்லப்பட்டன. காவல்நிலைய உதவி ஆய்வாளர் சேகர் தலைமையில் காவல்துறையினர் பாதுகாப்புப் பணியில் ஈடுபட்டனர்.
