சேலம், ஆக. 26– மேட்டூர் அணையில் இருந்து டெல்டா பாசனத்துக்கு நீர் திறப் பதற்கு தமிழ்நாடு முதலமைச்சர் ஜோசப் விஜய் மேட்டூர் வந்து செல்லும் வகையில் முன்னேற்பாடுகள் திட்டமிடப்பட்டு வருகின்றன.
மேட்டூர் அணையி லிருந்து ஒவ்வொரு ஆண்டும் ஜூன் 12ஆம் தேதி காவிரி டெல்டா பாசனத்துக்கு நீர் திறக்கப்படுவது வழக்கம். இதன் மூலம் சேலம், ஈரோடு, நாமக்கல், திருச்சி, தஞ்சை, திருவாரூர் உள்ளிட்ட 12 மாவட்டங்களில் 17 லட்சம் ஏக்கர் நிலங்கள் பாசன வசதி பெறும்.
இந்நிலையில், நடப்பாண்டில் அணையில் போதிய நீர் இருப்பு இல்லாததால், ஜூன் 12ஆம் தேதி பாசனத்துக்கு நீர் திறக்க முடியவில்லை. இந்நிலையில், கருநாடகாவில் இருந்து திறக்கப்படும் உபரிநீரால், மேட்டூர் அணைக்கு நீர் வரத்து சற்று அதிகரித்து, அணையின் நீர்மட்டம் உயர்ந்து வருகிறது.
இதன் காரணமாக அணையின் நீர்மட்டம் 88.21 அடியைக் கடந்து, விரைவில் நீர் மட்டம் 90 அடியை எட்டும் நிலையில் உள்ளது.
இந்நிலையில், சட்டப்பேரவையில் மேட்டூர் அணை எப்போது திறக்கப்படும் என்ற கேள்விக்கு பதிலளித்த, நீர் வளத்துறை அமைச்சர் என்.ஆனந்த், விரைவில் நல்ல செய்தி அறிவிக்கப்படும் என தெரிவித்தார்.
தற்போது மேட்டூர் அணை நீர் மட்டம் உயர்ந்து வரும் நிலையில், நீதிமன்ற உத்தரவால் கருநாடகா அணைகளில் இருந்து தமிழ்நாட்டிற்கு உரிய நீர் திறக்கப்படும் வாய்ப்பு அதிகரித்துள்ளது.
எனவே, மேட்டூர் அணையில் இருந்து அடுத்த சில நாட்களில் டெல்டா பாசனத்துக்கு நீர் திறக்கப்படும் என்று தகவல் வெளியாகிறது.
குறிப்பாக, தமிழ்நாடு முதலமைச்சர் ஜோசப் விஜய், மேட்டூர் வந்து, அணையில் இருந்து டெல்டாவுக்கு நீரை திறந்து வைப்பார் என்று உறுதியான தகவல்கள் தெரிவிக்கின்றன.
