தெஹ்ரான், ஜூலை 19- அமெரிக்க விமானப்படைக்குச் சொந்தமான போர் விமானங்கள் மற்றும் எரிபொருள் நிரப்பும் விமானங்களைத் தாக்கி அழித்துள்ளதாக ஈரான் ராணுவம் அதிரடியாக அறிவித்துள்ளது. இதனால் மத்திய கிழக்கு வளைகுடாப் பகுதியில் போர் பதற்றம் மேலும் அதிகரித்துள்ளது.
ஹார்முஸ் நீரிணைப் பகுதியில் பன்னாட்டு புரிந்துணர்வு ஒப்பந்தத்தை மீறி, வணிக எண்ணெய்க் கப்பல்கள் மீது ஈரான் தாக்குதல் நடத்தியது. இதற்குப் பதிலடியாக, அமெரிக்க ராணுவம் கடந்த 6 நாள்களாக ஈரானின் பல்வேறு பகுதிகள் மீது கடுமையான வான்வழித் தாக்குதலை மேற்கொண்டு வருகிறது.
நேற்று முன்தினம் (17.7.2026) அமெரிக்கா நடத்திய கொடூரத் தாக்குதலில், ஈரானின் முக்கிய நகரமான ‘பந்தர் அப்பாஸ்’ பகுதியில் இருந்த பாலங்கள், ரயில் நிலையங்கள் மற்றும் மின் நிலையங்கள் உள்ளிட்ட உள்கட்டமைப்புகள் முற்றிலும் தரைமட்டமாக்கப்பட்டன. மேலும், ‘ஈரான்ஷர்’ ராணுவ தளத்தின் மீது நடத்தப்பட்ட தாக்குதலில் ஈரான் ராணுவ வீரர்கள் 7 பேர் உயிரிழந்தனர்.
அமெரிக்காவின் தாக்குதலுக்குப் பதிலடியாக வளைகுடா நாடுகள் மீது ஈரான் ஏவுகணை மற்றும் ட்ரோன் தாக்குதல்களை நடத்தியது. இதில் ஈரானின் 3 ஏவுகணைகளை நடுவானி லேயே தடுத்து அழித்ததாக ஜோர்டான் நாடு தெரிவித்துள்ளது.
ஈரான் ராணுவத்தின்
அதிகாரப்பூர்வ அறிக்கை
இந்நிலையில், ஈரான் ராணுவம் வெளியிட்டுள்ள தற்போதைய அறிக்கையில் கூறப்பட்டுள்ளதாவது:
ஜோர்டானில் உள்ள அமெரிக்க ராணுவ தளத்தைக் குறிவைத்து ஏவுகணை மற்றும் ட்ரோன் தாக்குதல்களை நடத்தினோம். இதில் அமெரிக்காவின் எரிபொருள் நிரப்பும் விமானங்கள் மற்றும் பல போர் விமானங்கள் கடுமையாகச் சேதமடைந்துள்ளன.
சிரியாவின் ‘அல்-டன்ஃப்’ நகரில் அமைந்துள்ள அமெரிக்க ராணுவ தளத்தின் மீதும் எங்களது படைகள் தாக்குதல் நடத்தியுள்ளன.
ஜோர்டான் மக்களும், முஸ்லிம்களுக்கு எதிராகச் செயல்படும் அமெரிக்கர்களைக் குறிவைத்துத் தாக்குதல் நடத்த வேண்டும்.
ஹார்முஸ் நீரிணைப் பகுதி தற்போது ஈரானின் முழு கட்டுப்பாட்டில் உள்ளது. அமெரிக்கா தனது தாக்குதலை நிறுத்தாத வரை, இந்த வழியாக எந்தவொரு எரிபொருள் கப்பலும் கடந்து செல்ல அனுமதிக்கப்பட மாட்டாது.
இவ்வாறு ஈரான் ராணுவம் எச்சரித் துள்ளது. அமெரிக்கா மற்றும் ஈரான் இடையேயான இந்த நேரடி மோதலால் வளைகுடா பகுதியில் போர் மேகங்கள் சூழ்ந்துள்ளன.
