சாமியார்களின் சிம்ம சொப்பனம்
ஏ.டி.கோவூர் பிறந்த நாள் (10.04.1898)
ேரள மாநிலம் திருவல்லாவில் பிறந்து, தனது வாழ்நாளின் பெரும் பகுதியை இலங்கையில் கழித்தவர் பேராசிரியர் ஏ.டி.கோவூர். ஒரு சிறந்த எழுத்தாளராகவும், பேராசிரியராகவும் விளங்கிய அவர், சமூகத்தில் மலிந்து கிடந்த மூடநம்பிக்கைகளை வேரறுக்கத் தனது வாழ்வை அர்ப்பணித்தவர்.
தங்களை ‘தெய்வீக சக்தி’ கொண்டவர்கள் என்று கூறிக்கொண்டு மக்களை ஏமாற்றிய போலிச் சாமியார்களை இவர் அறிவியல் ரீதியாகத் தோலுரித்துக் காட்டினார். “மந்திரம் அல்லது ஆன்மிக சக்தியின் மூலம் அற்புதங்கள் செய்துகாட்டுபவர்களுக்குப் பெரும் தொகையைப் பரிசாக அளிக்கிறேன்” என்று அவர் விடுத்த பகிரங்கச் சவால், ஆன்மிக உலகில் பெரும் அதிர்வலைகளை ஏற்படுத்தியது. இந்தியாவில் இருந்து எந்த மடத்தலைவர்கள் கொழும்பு சென்றாலும், அவர்களுக்கு முதல் ஆளாகக் கேள்வி கேட்கக் காத்திருப்பவர் கோவூரார்தான்.
இவரது துணிச்சலான வாழ்வியல் நிகழ்வுகள் பிற்காலத் தலைமுறைக்கும் பெரும் ஊக்கமளிப்பதாக அமைந்தன. குறிப்பாக, ஹிந்தி நடிகர் அமீர்கான் நடித்த ‘பி.கே’ (PK) திரைப்படத்தில் சாமியாரிடம் கேள்வி கேட்கும் காட்சி, கோவூராரின் வாழ்க்கையில் நடந்த ஒரு உண்மைச் சம்பவத்தின் தாக்கமே ஆகும்.
சமூக விழிப்புணர்விற்காக அவர் எழுதிய பல நூல்களில் கீழ்வருபவை மிகவும் பிரபலமானவை:
‘மனக்கோலங்கள்’, ‘சாமியார்களே ஜாக் கிரதை’ இந்த நூல்கள் இன்றும் பகுத்தறிவுப் பாதையில் பயணிப்பவர்களுக்கு வழிகாட்டியாக அமைந்துள்ளன.
செப்டம்பர் 18, 1978 அன்று கொழும்பில் காலமான ஏ.டி.கோவூர், தனது மரணத்திற்குப் பின்னும் ஒரு முன்மாதிரியாகத் திகழ்ந்தார். மூடநம்பிக்கைகளுக்கு எதிராகப் போரிட்ட அவர், தனது உடல் எரிக்கப்படவோ புதைக்கப் படவோ கூடாது என்றும், அது மருத்துவ ஆய்வுக்காகத் தானம் செய்யப்பட வேண்டும் என்றும் உயில் எழுதி வைத்திருந்தார்.
மக்களின் அறியாமையைப் பயன்படுத்தி பிழைப்பு நடத்தும் சாமியார்களுக்கு எதிராக அவர் விடுத்த சவாலை, இன்றுவரை யாராலும் முறியடிக்க முடியவில்லை என்பது அவரது பகுத்தறிவுப் போராட்டத்திற்குச் சான்றாகும்.
இன்று அவரது பிறந்த நாளாகும். (10.4.1898)
