கேரள அரசு புதிய கட்டுப்பாடு 23 வயதுக்கு கீழ் மதுபானம் விநியோகிக்கத் தடை

திருவனந்தபுரம், அக். 31- கேரளாவில் 23 வயது பூர்த்தியடையாத நபர்களுக்கு மதுபானம் விநியோகிப்பதற்குத் தடை விதிக்கப்பட்டுள்ளது.
வாடிக்கையாளர்களின் வயதை உறுதி செய்ய ஆதார் உள்ளிட்ட அரசு அடையாளச் சான்றுகளைக் கட்டாயம் பரிசோதிக்க வேண்டும் என்று மாநில கலால் துறை ‘பார்’களுக்கு அதிரடி உத்தரவிட்டுள்ளது.
வயது குறைவாகத் தோன்றும் வாடிக்கையாளர்களுக்கு மது வழங்கும் முன் ஆதார் அல்லது வயதை உறுதிப்படுத்தும் வேறு அடையாள ஆவணங்களைச் சரிபார்க்க வேண்டும், விதியை மீறும் பார்கள் மீது கடும் நடவடிக்கை எடுக்கப்படும் என்று கலால் துறை அமைச்சர் எம். ராஜேஷ் எச்சரித்துள்ளார்.
கொச்சி நெடும்பாசேரியில் மினி கூப்பர் காரை மோதி உயிரிழப்பு ஏற்படுத்திய 19 வயது இளைஞர் சுஹைல் சஜீவுக்கு, வயதுச் சான்று எதுவுமின்றி மது விநியோகிக்கப்பட்டதையடுத்து, 23 வயதுக்கு உட்பட்டோருக்கு மதுபானம் வழங்கும் பார்களின் உரிமத்தை ரத்து செய்ய உத்தரவிடப்பட்டுள்ளது. அய்க்கிய ஜனநாயக முன்னணி அரசு புதிய மதுபானக் கொள்கையை உருவாக்கி வருவதாகவும், கேரள உயர் நீதிமன்றத்திடம் தெரிவித்தபடி, நவம்பர் மாதத்தில் புதிய கொள்கை அறிவிக்கப்படும் என்றும் அமைச்சர் கூறினார்.