சென்னை, ஜூலை 23- சென்னை மெட்ரோ ரயில் நிறுவனம் (CMRL) தனது பயண அட்டையிலிருந்து சிங்கார சென்னை அட்டைக்கு ஆகஸ்ட் 1 ஆம் தேதி முதல் முழுமையாக மாற திட்டமிட்டுள்ளது. இது பயணிகளுக்கு மெட்ரோ ரயில் மற்றும் மாநகரப் பேருந்துகளில் ஒரே அட்டையைப் பயன்படுத்தி பயணம் செய்யும் வசதியை வழங்கும்.
தேசிய பொதுப் போக்குவரத்து அட்டையான சிங்கார சென்னை அட்டை, CMRL பயண அட்டையுடன் கூடுதலாக கடந்த 2023 ஆம் ஆண்டு ஏப்ரல் 14 ஆம் தேதி அறிமுகப்படுத்தப்பட்டது.
இதன் பயன்பாடு படிப்படியாக அதிகரித்து வந்த நிலையில், மாநகரப் பேருந்துகளிலும் இதை பயன்படுத்தும் திட்டம் ஜனவரி 6 ஆம் தேதி தொடங்கப்பட்டது. இதன் பிறகு, சிங்கார சென்னை அட்டையைப் பயன்படுத்துபவர்களின் எண்ணிக்கை கணிசமாக உயர்ந்துள்ளது.
ஆகஸ்ட் 1 முதல், சென்னையின் 41 மெட்ரோ ரயில் நிலையங்களிலும் CMRL பயண அட்டைகளை ரீசார்ஜ் செய்யும் வசதி நிறுத்தப்படும். இருப்பினும், QR பயணச்சீட்டுகள் மற்றும் பிற பயணச்சீட்டு பெறும் முறைகள் வழக்கம்போல் தொடரும். பயணிகள் தங்கள் பழைய CMRL பயண அட்டைகளில் உள்ள மீதித் தொகையை மெட்ரோ ரயில்களில் பயணிக்கப் பயன்படுத்தலாம்.
பயண அட்டையின் இருப்புத் தொகை குறைந்தபட்ச மதிப்பை (ரூ.50க்கும் குறைவாக) அடையும் போது, பயணிகள் தங்கள் CMRL பயண அட்டையை மெட்ரோ ரயில் நிலைய பயணச் சீட்டு கவுன்ட்டர்களில் ஒப்படைத்து, எந்தக் கட்டணமும் இல்லாமல் சிங்கார சென்னை அட்டையைப் பெற்றுக் கொள்ளலாம்.
பழைய அட்டையின் வைப்புத்தொகை மற்றும் மீதமுள்ள தொகை புதிய சிங்கார சென்னை அட்டைக்கு மாற்றப்படும் என்று சென்னை மெட்ரோ ரயில் நிறுவன அதிகாரிகள் தெரிவித்துள்ளனர்.
ஒரே அட்டையில் மாநகரப் பேருந்து மற்றும் மெட்ரோ ரயில்களில் பயணிக்கும் வசதி இருப்பதால், அன்றாடம் 1,500க்கும் மேற்பட்டோர் புதிய சிங்கார சென்னை அட்டையை வாங்கி வருகின்றனர்.
பயணிகளுக்கு இந்த அட்டை தடையின்றி கிடைப்பதை உறுதி செய்ய, கிண்டி, சைதாப்பேட்டை, ஆயிரம்விளக்கு உள்ளிட்ட பல இடங்களில் சிறப்பு அரங்குகள் அமைத்து புதிய அட்டைகள் விற்பனை செய்யப்படுகின்றன.
