தந்தை பெரியார் 51 ஆம் ஆண்டு நினைவு நாளன்று சென்னை பெரியார் திடலில் பெரியார் பகுத்தறிவு எணினி நூலகம் – ஆய்வு மய்யம் திறப்பு விழா!
தந்தை பெரியாரின் சிந்தனைகளையும் கொள்கை களையும் திராவிட இயக்கத்தின் வரலாற்றையும் ஆவணங்களையும் பாதுகாக்கின்ற கருவூலமாகத் திகழும் ‘‘பெரியார் பகுத்தறிவு நூலகம் மற்றும் ஆய்வு மய்யம்’’ 1974 ஆம் ஆண்டு செப்டம்பர் 17 அன்று பெரியார் திடலில் தொடங்கப்பட்டது.
நூலகம்
தந்தை பெரியார் தம் கடைசி பிறந்த நாளாக அமைந்துவிட்ட 95 ஆம் ஆண்டு பிறந்த நாள் விழாவில் (1973) தனக்கு வழங்கப்பட்ட நன்கொடை களை, அப்படியே அன்றைய திராவிடர் கழகப் பொதுச்செயலாளர் ஆசிரியர் கி.வீரமணி அவர்களிடம் வழங்கி, பெரியார் நூலகம் அமைக்கும் பணியைத் தொடங்கிட ஆணையிட்டார். அவ்வாண்டு டிசம்பர் 24 அன்று தந்தை பெரியார் மறைவுற்றாலும், அதற்கடுத்த பிறந்த நாளுக்குள்ளாகவே பணிகள் நிறைவுற்று, நூலகம் அமைக்கப்பட்டது.
பெரியார் திடலில் அமைக்கப்பட்ட ‘‘பெரியார் பகுத்தறிவு நூலகம் – ஆய்வு மய்யத்தை’’ அன்றைய கல்வி அமைச்சர் நாவலர் இரா.நெடுஞ்செழியன் அவர்கள் தலைமையில், திராவிடர் கழகத் தலைவர் அன்னை மணியம்மையார் முன்னிலையில், அன்றைய முதலமைச்சர் டாக்டர் கலைஞர் அவர்கள் திறந்து வைத்தார்கள் (17.9.1974).
கடந்த 50 ஆண்டு காலமாக பல்லாயிரக்கணக்கான ஆவணங்களையும், லட்சத்திற்கும் மேற்பட்ட புத்த கங்களையும் காலத்திற்கு ஏற்ப பாதுகாத்துப் பராமரித்து வரும் இந்நூலகத்திலிருந்து ஏராளமான ஆவணங்கள் தொகுப்புகளாகவும், புதிய புத்தகங்களாகவும் வெளி யிடப்பட்டுள்ளன. தமிழ்நாடு, இந்தியா மட்டுமல்லாமல், பல்வேறு நாடுகளிலிருந்து பல நூற்றுக்கணக்கான ஆய்வாளர்கள், ஆய்வு மாணவர்கள் இந்நூலகத்தைப் பயன்படுத்தி திராவிட இயக்க வரலாற்றையும், தந்தை பெரியாரின் கருத்துகளையும் ஆய்வு செய்துள்ளார்கள். இந் நூலகத்திற்கு மூன்று விரிவாக்கத் தளங்களும் பின்னாளில் ஏற்படுத்தப்பட்டுள்ளன.
நூலகம் என்பது நாளும் வளர்ந்து கொண்டே இருக்கும் அமைப்பு ஆகும். இந்நூலகத்தின் பொன்விழா ஆண்டான இவ்வாண்டில் (1974-2024) புதிய அறிவியல் தொழில்நுட்ப வளர்ச்சிகளுக்கு ஏற்பவும், இந் நூலகத்தின் பணிகளை அதிகரிக்கும் வகையிலும் ‘‘பெரியார் பகுத்தறிவு எணினி நூலகம் (டிஜிட்டல்)’’ மற்றும் ஆய்வு மய்யம் புதிய தனி கட்டடத்தில் உருவாக்கப்பட்டுள்ளது.
இதன் மூலம் எண்மப்படுத்தப்பட்டுள்ள (Digitalized) திராவிட இயக்க நூல்களை, ஆவணங்களை, தமிழில் வெளிவந்துள்ள மின் நூல்களைக் கணினிகளிலேயே படிக்க ஆவன செய்யப்பட்டுள்ளது. இது பழைய ஆவணங்களுக்கு எவ்விதச் சேதமும் இல்லாமல், ஆய்வாளர்கள் எளிதில் படிப்பதற்கான வாய்ப்பை உருவாக்கும்.
மேலும் தமிழில் இயங்கும் மின் நூலகங்களையும், ஆவணக் களஞ்சியங்களையும் இப் புதிய எணினி நூலகத்தின் பயன்பாட்டாளர்கள் இங்கிருந்தே அணுக முடியும்.
அதேபோல் உலகில் முதன்மையான மின் நூலகங்க ளின் புத்தகங்களையும், ஆவணங்களையும் இங்கிருந்து படிப்பதற்கான வாய்ப்பு ஏற்படுத்தப்பட்டுள்ளது. மேலும் புதிய வசதிகளும், தொழில்நுட்ப வாய்ப்புகளும் செய்யப்பட்டுள்ளன.
மூன்று தளங்களில் இதுவரை செயல்படும் நூல கத்தின் மொத்தப் பரப்பளவு 4,450 சதுர அடியாகும். தற்போது கூடுதலாக தனிக் கட்டடத்தில் புதிய எணினி நூலகம் 2,674 சதுர அடியில் அமைந்துள்ளது. இதன்மூலம் மொத்தம் 6,174 சதுர அடியில் நூலகம் செயல்பட உள்ளது.
இந்நூலகத்தில், நகலெடுத்தல் பிரிவு, குறிப்புதவிப் பிரிவு, மின்னாக்கப் பிரிவு, ஒளி, ஒலிப் பதிவுகள் பிரிவு ஆகியன ஏற்கெனவே செயல்பட்டு வருகின்றன. பல லட்சம் பக்கங்களில் திராவிட இயக்க இதழ்கள் எண்மப்படுத்தப்பட்டு வருகின்றன.
முதலமைச்சர் மு.க.ஸ்டாலின்
இத்தனை சிறப்புக்குரிய பெரியார் பகுத்தறிவு எணினி நூலகம் மற்றும் ஆய்வு மய்யத்தினைத் (Periyar Rationalist Digital Library & Research Centre) தந்தை பெரியாரின் 51 ஆம் நினைவு நாளான 2024 டிசம்பர் 24 காலை 10 மணிக்கு பெரியார் சுயமரியாதைப் பிரச்சார நிறுவனத்தின் செயலாளரும், திராவிடர் கழகத்தின் தலைவருமான தமிழர் தலைவர் ஆசிரியர் கி.வீரமணி அவர்களின் தலைமையில், தமிழ்நாடு முதலமைச்சர் சமூக நீதிக்கான சரித்திர நாயகர் மாண்புமிகு மானமிகு மு.க.ஸ்டாலின் அவர்கள் திறந்து வைக்க உள்ளார்கள்.
தொடர்ந்து பெரியார் திடலில் அமைந்துள்ள தந்தை பெரியார் நினைவிடத்தில் தமிழ்நாடு முதல மைச்சர் அவர்களும், திராவிடர் கழகத்தின் தலைவர் அவர்களும், பல்வேறு கட்சித் தலைவர்களும் மலர்வளையம் வைத்து மரியாதை செலுத்துவார்கள்.
அதனைத் தொடர்ந்து நடைபெறும் விழாவில், திராவிடர் கழகத் துணைத் தலைவர் கவிஞர் கலி. பூங்குன்றன் வர வேற்புரை ஆற்றிட, திராவிடர் கழகத் தலைவர் ஆசிரியர் கி.வீரமணி அவர்கள் தலைமையில், தமிழ்நாடு முதலமைச்சர் விழாப் பேருரை ஆற்றவுள்ளார்.
விழா நிறைவில் திராவிடர் கழக பொதுச்செயலாளர் வீ.அன்புராஜ் நன்றியுரை ஆற்றுவார்.
வரலாற்றுச் சிறப்புமிக்க இவ்விழாவிற்கு வாரீர், வாரீர் என அழைக்கிறோம்.
