புதுடில்லி, நவ.2 உள்நாட்டுப் பரிவர்த்தனைகள் வாயிலாக அதிக வருவாய் ஈட்டியதன் மூலம், அக்டோபர் மாதத்தில் மொத்த ஜிஎஸ்டி வசூல் 9 சதவீதம் அதிகரித்து ரூ.1.87 லட்சம் கோடியாக உயர்ந்துள்ளது. நாடு முழுவதும் அக்டோபர் மாதம் உள்நாட்டு விற்பனை அதிகரித்ததால் ஜிஎஸ்டி வசூல் உயர்ந்துள்ளது. இதனால் அக்டோபர் மாதம் 9 சதவீதம் அதிகரித்து ஒட்டுமொத்த ஜிஎஸ்டி வசூல் ரூ.1.87 லட்சம் கோடியாக உயர்ந்துள்ளது.
இதில் ஒன்றிய ஜிஎஸ்டி வசூல் ரூ.33,821 கோடியாகவும், மாநில ஜிஎஸ்டி ரூ.41,864 கோடியாகவும், ஒருங்கிணைந்த ஐஜிஎஸ்டி ரூ.99,111 கோடியாகவும், செஸ் ரூ.12,550 கோடி யாகவும் உள்ளது. 2023ஆம் ஆண்டு அக்டோபர் மாதம் ரூ.1.72 லட்சம் கோடி வசூலானது. அதைவிட 0.15 லட்சம் கோடி அதிக வசூலாகி உள்ளது.
மேலும் இந்த அக்டோபர் மாதம் மட்டும் ரூ.19,306 கோடி மதிப்பிலான ரீ பண்ட்கள் வழங்கப்பட்டன. இது கடந்த ஆண்டைக் காட்டிலும் 18.2 சதவீத வளர்ச்சியாகும்.
ரீ பண்ட் வழங்கப்பட்டதை கழித்துப் பார்த்தால் நிகர ஜிஎஸ்டி வசூல் 8 சதவீதம் அதிகரித்து ரூ.1.68 லட்சம் கோடியாக இருந்தது.
தேர்தல் ஆணையம்மீது காங்கிரஸ் பாய்ச்சல்
சட்ட ரீதியிலான நடவடிக்கை எடுப்போம்
காங்கிரஸ் எச்சரிக்கை
புதுடில்லி, நவ.2- அரியானா சட்டமன்றத் தேர்தலில் ஓட்டு எண்ணிக்கையில் முறைகேடு நடந்திருப்பதாக தேர்தல் ஆணையத்துக்கு காங்கிரஸ் கட்சி கடிதம் எழுதியது. இதை விசாரித்த தேர்தல் ஆணையம், காங்கிரஸ் அளித்த புகாரை நிராகரித்தது. மேலும், ஆணையம் மீது அடிப்படை ஆதாரமற்ற குற்றச்சாட்டுகளை கூறுவதை தவிர்க்க வேண்டும். முக்கியத்துவம் வாய்ந்த ஓட்டு எண்ணிக்கை நடைமுறை மீது பொறுப்பற்ற குற்றச்சாட்டுகளை கூறுவதால், குழப்பமும், பொது அமைதியின்மையும் ஏற்படும் என்று தேர்தல் ஆணையம் கூறியிருந்தது.
இந்த நிலையில், தேர்தல் ஆணையத்திற்கு பதில் கடிதம் ஒன்றை காங்கிரஸ் கட்சி அனுப்பியுள்ளது.
காங்கிரஸ் கட்சியின் மூத்த தலைவர்களான கே.சி.வேணுகோபால், அசோக் கெலாட், அஜய் மக்கான் உள்ளிட்ட 9 தலைவர்கள் கையெழுத்திட்டுள்ள அந்தக்கடிதத்தில் கூறப்பட்டுள்ள தாவது:
குறிப்பிட்ட பிரச்சினைகளுக்கு மட்டுமே தேர்தல் ஆணையத்திற்கு கடிதம் எழுதினோம். தேர்தல் ஆணையம் மற்றும் ஆணையர்களை மதிக்கிறோம். ஆனால், தேர்தல் ஆணையம் எங்களுக்கு அளிக்கும் பதில்கள் தாழ்ந்த தொனியில் உள்ளது.
தேர்தல் ஆணையம் தனக்கு தானே நற்சான்றிதழ் அளித்தது ஆச்சர்யம் அளிக்கவில்லை. ஆனால் தேர்தல் ஆணையம் அளித்த பதிலில் உள்ள தொனியை எளிதாக எடுத்து கொள்ள மாட்டோம். அது எங்களின் தலைவர்களை விமர்சிப்பதுபோல் உள்ளது. மோசமான தொனியில் உள்ளது. முடிவு எடுக்க வேண்டிய இடத்தில் உள்ளவர்கள். எந்த விமர்சனத்தையும் செய்யக்கூடாது. கட்சியை தாக்கக்கூடாது. ஆனால், தேர்தல் ஆணையத்தின் இதுபோன்ற கருத்துகளை நீக்குவதற்கு சட்ட ரீதியிலான நடவடிக்கையை எடுப்பதைத் தவிர வேறு வழியில்லை” என்று கூறியுள்ளனர்.
