சென்னை அக். 31- சிதம்பரம் நடராஜர் கோயில் கனகசபையில் நின்று பக்தர்கள் வழிபாடு செய்ய அனுமதியளித்து அறநிலையத் துறை பிறப்பித்த உத்தரவை எதிர்த்து பொது தீட்சிதர்கள் தரப்பில் சென்னை உயர் நீதிமன்றத்தில் வழக்குகள் தொடரப்பட்டன. அந்த அரசாணைக்கு ஆதரவாகவும் வழக்குகள் தொடரப்பட்டிருந்தன.
நீதிபதிகள் ஜி.ஜெயச்சந்திரன், இ.மனோகரன் அமர்வில் இந்த வழக்குகள் மீதான விசாரணை நடந்தது. வழக்கு தொடர்ந்த டி.ஆர்.ரமேஷ் மற்றும் மனுதாரர்கள் தரப்பில் வழக்குரைஞர்கள் கே.ஹரிசங்கர், ஜி.சந்திரசேகரன் ஆகியோரும், அறநிலையத் துறை தரப்பில் சிறப்பு அரசு வழக்குரைஞர் ஆர்.பரணிதரன், குற்றவியல் வழக்குரைஞர் என்.பழனிவேல் ஆகியோரும் ஆஜராகி வாதிட்டனர்.
அனைத்து தரப்பு வாதங்களையும் கேட்ட நீதிபதிகள் பிறப்பித்துள்ள உத்தரவு: ‘‘சிதம்பரம் கோயில் நிர்வாகத்தில் உள்ள சீர்கேடுகள் களையப்படும் வரை நிர்வாகத்தை கவனிக்க, உயர் நீதிமன்ற முன்னாள் நீதிபதி வி.பாரதிதாசனை தலைவராகவும், முன்னாள் நீதிபதி ஆர்.சுரேஷ்குமாரை இணைத் தலைவராகவும் கொண்ட புதிய இடைக்கால நிர்வாகக் குழுவை அமைக்கிறோம். இந்த குழுவில், முன்னாள் அய்ஏஎஸ் அதிகாரி ராஜேந்திரனை உறுப்பினராகவும், பொது தீட்சிதர்கள் சங்கத்தின் செயலாளர் மற்றும் இந்து சமய அறநிலையத் துறை செயலர் ஆகியோரை அலுவல்சாரா உறுப்பினர்களாகவும் நியமிக்கிறோம்.
கனகசபையில் நின்று அனைத்து பக்தர்களும் சுவாமி தரிசனம் செய்யவும், தேவாரம், திருவாசகம் பாடுவதில் சம வாய்ப்பு வழங்கப்படுவதையும் இந்த நிர்வாகக் குழு உறுதி செய்ய வேண்டும்.
அதே நேரம், அன்றாட பூஜைகள், திருவிழாக்களை நடத்துவது பொது தீட்சிதர்களின் பிரத்யேக உரிமை என்பதால் அதில் நிர்வாகக் குழு தலையிடாது. கோயிலின் அன்றாட வரவு செலவு கணக்குகளை பொது தீட்சிதர்கள் ஒவ்வொரு மாதமும் 5-ஆம் தேதி நிர்வாகக் குழுவிடம் ஒப்படைக்க வேண்டும். இவ்வாறு நீதிபதிகள் உத்தரவிட்டுள்ளனர்.
