மதுரை, அக். 3- 24 மணி நேர பணி செய்யும்போது கிடைக்கும் ஓய்வு நேரத்தில் மருத்துவர்கள் தூங்குவது தவறில்லை என தமிழ்நாடு அரசு மருத்துவர்கள் சங்க மாநிலத் தலைவர் மருத்துவர் சிறீனிவாசன் தெரிவித்தார்.
“தூத்துக்குடி அரசு மருத்துவமனையில் நேற்று (2.10.2026) நள்ளிரவில் சிறீவைகுண்டம் சட்டமன்ற உறுப்பினர் சரவணன் ஆய்வு செய்தார். அப்போது பணியில் இருந்த மருத்துவர் தூங்கிக் கொண்டிருந்ததால் செவிலியர் மூலம் அலைபேசியில் அழைத்து வெளியே வரச் செய்தார். பணி நேரத்தில் அவர் தூங்கியதாக இதுபற்றி தகவல் பரவுகிறது. இது தவறு. மருத்துவர்களின் வேலை நேரம் தெரியாமல் தவறாகப் பேசக்கூடாது.
அந்தந்த மருத்துவமனைகளில் உள்ள மருத்துவர்களின் எண்ணிக்கைக்கு ஏற்ப வாரத்தில் ஒரு நாள் அல்லது அய்ந்து நாட்கள் அல்லது நான்கு நாட்களுக்கு ஒரு முறை என மருத்துவர்களுக்கு 24 மணி நேர பணி வழங்கப்படும். காவல்துறையில் கூட இப்படி 24 மணி நேர பணி கிடையாது. மருத்துவர்களுக்கு மட்டும்தான் இந்த பணி உண்டு.
எனவே நேரம் கிடைக்கும் போது மருத்துவர்கள் ஓய்வு எடுப்பது இயல்பான விஷயம்தான். தொடர்ந்து மருத்துவப் பயனாளிகள் (நோய் பாதிப்படைந்தவர்கள்) வந்தாலோ அல்லது விபத்து ஏற்பட்டாலோ 24 மணி நேரமும் ஓய்வு எடுக்காமல் வேலை பார்ப்பது மருத்துவர்கள் மட்டும்தான். நள்ளிரவில் சட்டமன்ற உறுப்பினர், ஆய்வு செய்ய வந்தாரா? அல்லது மருத்துவப் பயனாளியை அழைத்து வந்தாரா என தெரியவில்லை. ஆனால் அவர் வரும்போது அங்கே மருத்துவப் பயனாளிகள் யாருமே இல்லை.
மருத்துவப் பயனாளி இல்லாத நேரத்தில் மருத்துவர் தூங்கி ஓய்வெடுப்பதில் தவறில்லை. அரசு மருத்துவமனை என்பது எல்லோரும் வந்து செல்லும் பொதுவான இடம். அங்கு அறைக்கதவை மருத்துவர் திறந்து வைத்து தூங்கினால் அவரது அலைபேசி, பர்ஸ் போன்றவை திருடப்படக்கூடும். எனவே கதவை பூட்டி தூங்கினார். செவிலியர் மருத்துவப் பயனாளி வந்து விட்டார் என நினைத்து உடனடியாக வெளியே வந்துவிட்டார். அவர் பணியில் இல்லாமல் இருந்தாலோ அல்லது வெளியே சென்று இருந்தாலோ தான் இது குறித்து கேள்வி எழுப்பவேண்டும்” என்றார்.
