காஞ்சிபுரம்,மே7 – தமிழ்நாட்டில் முதல் முறையாக காஞ்சிபுரம் மாவட்டத்தில் உள்ள நியாயவிலைக்கடைகளில் ‘கியூ ஆர் கோடு’ மூலம் பணப்பரிமாற்றம் செய்யும் நடை முறையை கூட்டுறவு சங்கப்பதிவாளர் சண்முகசுந்தரம் அறிமுகம் செய்து வைத்தார்.
காஞ்சிபுரம் மாவட்டத்தில் செயல்படும் 53 தொடக்க வேளாண்மை கூட்டுறவு கடன் சங்கங்கள், 7 நகர கூட்டுறவு கடன் சங்கங்கள், 10 மருந்தகங்கள், பணியாளர் கூட்டுறவு சங்கங்கள், காஞ்சிபுரம் மாவட்ட நுகர்வோர் கூட்டுறவு மொத்த விற்பனை பண்டகசாலை மற்றும் காஞ்சிபுரம் மாவட்டத்தில் இயங்கி வரும் 602 கூட்டுறவு நியாய விலைக்கடைகள் உள்ளன.
இந்தநிலையில் தமிழ்நாட்டில் முதல் முறையாக காஞ்சிபுரம் மாவட்டத்தில் உள்ள அனைத்து கூட்டுறவு நிறுவனங்களிலும் மின்னணு பரிமாற்றம் (‘கியூ ஆர் கோடு’) மூலம் பணமற்ற பரிவர்த்தனை நடைமுறைப்படுத்தும் திட்டத்தை காஞ்சிபுரம் மாநகராட்சிக்கு உட்பட்ட டெம்பிள் சிட்டியில் உள்ள எம்.வி.எம்.பி. நகர் நியாயவிலைக்கடையில் சென்னை, கூட்டுறவுச் சங்கங்களின் பதிவாளர் சண்முக சுந்தரம் தொடங்கி வைத்தார்.
இதனால் பொதுமக்கள் தங்கள் வாங்கும் பொருட் களுக்கு நேரடியாக பணம் வழங்காமல் ஸ்மார்ட் போன் மூலமாக ‘கியூ ஆர் கோடு’ பயன்படுத்தி பணப்பரிமாற்றம் செய்து கொள்ளலாம்.
