இந்தியாவில் முதல் முறையாக கார்ப்பரேட் தலைமைத்துவத்தில் பெண்களின் எண்ணிக்கை 20 விழுக்காட்டை எட்டியுள்ளது.
இதுதொடர்பாக நியூயார்க்கை சேர்ந்த அவதார்-செராமவுண்ட் ஆய்வில் தெரிவிக்கப்பட்டுள்ளதாவது: இந்தியாவில் கார்ப்பரேட் நிறுவனங்களின் தலைமை பொறுப்புகளில் 2016இல் 13 விழுக்காடாக இருந்த பெண்களின் எண்ணிக்கை படிப்படியாக அதிகரித்து 2024இல் 19விழுக்காடு அளவுக்கு உயர்ந்தது. இந்த நிலையில் தற்போது தலைமைத்துவத்தில் பெண்களின் பங்கு முதல் முறையாக 20 விழுக்காட்டை தொட்டுள்ளது. இது சமூகத்தில் முற்போக்கான நிலையை பிரதிபலிப்பதாக அமைந்துள்ளது. உலகம் முழுவதும் கார்ப்பரேட் நிறுவனங்களின் தலைமைப் பதவிகளில் பெண்களின் பங்கு கணிசமாக அதிகரித்து வருகிறது. அதன்படி இந்த எண்ணிக்கை 2020இல் 14 விழுக்காடு, 2021இல் 15 விழுக்காடு, 2022இல் 17 விழுக்காடு, 2023இல் 19 விழுக்காடு, 2024இல் 19 விழுக்காடாக இருந்தது. சிறந்த நிறுவனங்களில் மொத்த பணியாளர்களின் அடிப்படையில் பெண்களின் பிரதிநிதித்துவம் 35.7விழுக்காடு -ஆக நிலையானதாக இருந்தது. குறிப்பாக, தொழில்முறை சேவைகள் துறையில் பெண்களின் பங்கு 44.6 விழுக்காடு என்ற அளவில் அதிகமாக உள்ளது. இதைத் தொடர்ந்து, அய்டிஇஎஸ் (41.7விழுக்காடு), மருந்து (25 விழுக்காடு), எப்எம்சிஜி (23 விழுக்காடு), உற்பத்தி (12 விழுக்காடு) ஆகிய துறைகள் உள்ளன.
இந்தியாவில் பெண்களுக்கான சிறந்த நிறுவனங்கள் பட்டியலில் 125 நிறுவனங்கள் இடம் பெற்றுள்ளன. அவற்றில் 15 விழுக்காடு அய்டி சேவை நிறுவனங்கள், 9 விழுக்காடு உலகளாவிய திறன் மய்யங்கள். உற்பத்தித் துறை 9 விழுக்காட்டையும், மருந்துகள் மற்றும் நுகர்வோர் பொருட்கள் தலா 5 விழுக்காட்டையும் கொண்டுள்ளன. இந்தியாவில் பெண்களுக்கான முதல் சிறந்த 10 நிறுவனங்களில் அக்சென்ஸர், ஆக்ஸா எக்ஸ்எல் இந்தியா பிசினஸ் சர்வீசஸ், கெய்ர்ன் ஆயில் அண்ட் கேஸ் வேதாந்தா லிமிடெட், ஈஒய், கேபிஎம்ஜி, மாஸ்டர்கார்டு இன்கார்பரேஷன், ஆப்டம் குளோபல் சொல்யூஷன்ஸ் (இந்தியா) பிரைவேட் லிமிடெட், ப்ராக்டர் & கேம்பிள், டெக் மஹிந்திரா, விப்ரோ ஆகியவை அடங்கும். இவ்வாறு ஆய்வில் கூறப்பட்டுள்ளது.
