துபாய், அக். 29- துபாயில் இருந்து இஸ்ரேலின் டெல் அவீவ் நோக்கி 170-க்கும் மேற்பட்ட பயணிகளுடன் சென்ற ஃபிளைதுபாய் விமானம், கடந்த செப்டம்பர் 30 ஆம் தேதி நடுவானில் பறந்து கொண்டிருந்தது. அப்போது ஓமன் நாட்டைச் சேர்ந்த உதவி விமானி, அவசர காலக் கோடரியால் இந்திய முதன்மை விமானி ஸ்மித் மச்சார் மீது திடீர் தாக்குதல் நடத்தினார். இதில் விமானம் பல அடி கீழே பாய்ந்தது. படுகாயமடைந்த நிலையிலும், விமானி ஸ்மித் மச்சார் விடாமுயற்சியுடன் காக்பிட் கதவை திறந்தார்.
இதனால் பயணிகள் மற்றும் ஊழியர்கள் உள்ளே நுழைந்து தாக்குதல் நடத்தியவரை கட்டுப் படுத்தினர். இதையடுத்து, விமானத்தில் இருந்த மாற்று விமானிகள் அதை சவுதி அரேபியாவின் தபூக் நகரில் பாதுகாப்பாக தரையிறக்கினர். பயணிகளின் உயிரைக் காப்பாற்றிய இந்திய கேப்டன் ஸ்மித் மச்சார் மற்றும் விமான ஊழியர்களின் தைரியமான இந்த செயலைப் பாராட்டி, அய்க்கிய அரபு அமீரகத்தின் ‘முதல் வகுப்பு சையத் II விருது’ அறிவிக்கப்பட்டது. துபாய் பட்டத்து இளவரசர் ஷேக் ஹம்தான் பின் முகமது பின் ரஷீத் அல் மக்தூம் இவ்விருதுகளை வழங்கி கவுரவித்தார்.
