18 வயதுக்கு மேற்பட்ட எவரும் உடல் கொடை செய்ய சட்டப்பூர்வமாக ஒப்புதல் அளிக்கலாம். மருத்துவர்களைப் பயிற்றுவிப்பதைத் தவிர, புதிய மருத்துவ சாதனங்களை உருவாக்குவதற்கும் பல்வேறு நோய்களின் உடலியல் தாக்கத்தை ஆய்வு செய்வதற்கும் அந்த உடல்கள் பயன்படுத்தப்படலாம்.
செப்டம்பர் 12ஆம் தேதி காலமான மார்க்சிஸ்ட் கம்யூனிஸ்ட் கட்சியின் தலைவர் சீதாராம் யெச்சூரி, தனது உடலை அகில இந்திய மருத்துவ அறிவியல் கழகத்திற்கு (எய்ம்ஸ்) கொடையளித்திருந்தார். இது இந்தியாவில் உள்ள பலர் எடுக்கும் முடிவு அல்ல.
உடல்கள் எதற்காகப் பயன்படுத்தப்படுகின்றன?
இறந்த உடல் கொடை என்பது ஒரு நபர் தனது முழு உடலையும் (தனிப்பட்ட உறுப்புகளை விட) இறந்த பிறகு அறிவியலுக்கு கொடை செய்வதைக் காட்டுகிறது. பொதுவாக, மனித உடற்கூறியல் மற்றும் அறுவைச் சிகிச்சையை சிறப்பாகப் புரிந்துகொள்வதன் மூலம் மருத்துவர் களைப் பயிற்றுவிப்பதற்கு உடல்கள் பயன்படுத்தப்படுகின்றன. உடல்களைப் பயிற்சிக்கு பயன்படுத்தலாம் என்றாலும், ஒரு மனிதனுக்கு அறுவைச் சிகிச்சை செய்வதில் இறந்த உடல்கள் மிகவும் யதார்த்தமான அனுபவத்தை வழங்குகிறது.
மருத்துவர்களைப் பயிற்றுவிப்பதைத் தவிர, புதிய மருத்துவ சாதனங்களை உருவாக்குவதற்கும் பல்வேறு நோய்களின் உடலியல் தாக்கத்தை ஆய்வு செய்வதற்கும் இறந்த உடல்கள் பயன்படுத்தப்படலாம்.
யார் உடல் கொடை செய்யலாம்?
18 வயதுக்கு மேற்பட்ட எவரும் உடல் கொடை செய்ய சட்டப்பூர்வமாக ஒப்புதல் அளிக்கலாம். இறக்கும் போது அவர்கள் உடல் கொடை செய்வதாகப் பதிவு செய்யப்படா விட்டால், அவர்களின் பாதுகாவலரோ அல்லது உறவினர்களோ அவர்களின் உடலை கொடை செய்யலாம்.
நாள்பட்ட நோய்களால் இறந்தவர்கள் தகுதியுள்ள நன்கொடையாளர்களாக இருந்தாலும், காசநோய், செப்சிஸ் அல்லது எச்அய்வி போன்ற தொற்று நோய்களால் பாதிக்கப்பட்டவர்களின் உடல்கள் ஏற்றுக்கொள்ளப்பட வாய்ப் பில்லை. உறுப்பு கொடை செய்பவர்களின் உடல்களிலும் இதே நிலைதான். கடைசியாக, மருத்துவக் கல்லூரிகள் இயற்கைக்கு மாறான காரணங்களால் இறந்தவர்களின் உடல்களை ஏற்க மறுக்கலாம், அது மருத்துவ – சட்ட வழக்குக்கு உட்பட்டது.
ஒருவரின் உடலை எப்படி கொடை செய்வது?
முழு உடல் கொடை (உறுப்பு கொடை போலல்லாமல்) கண்காணிக்க எந்த தேசிய அமைப்பும் இல்லை. பொதுவாக, மருத்துவக் கல்லூரி மருத்துவமனைகளின் உடற்கூறியல் துறைகள் நேரடியாகப் பொறுப்பேற்க வேண்டும். எனவே, ஒருவர் தனது உடலை கொடை செய்ய விரும்பும் குறிப்பிட்ட துறைக்குச் சென்று தேவையான படிவங்களில் கையெழுத்திட வேண்டும். மரணத்திற்குப் பிறகு, நன்கொடையாளரின் குருதிச் சொந்தம் அல்லது உறவினர், நன்கொடையைச் செயல்படுத்த துறையைத் தொடர்பு கொள்ள வேண்டும்.
இந்தியாவில் உடல் கொடை மிகவும் மோசமான நிலையில் உள்ளது. இதற்குக் காரணம் கல்வி அறிவின்மை மற்றும் மதநம்பிக்கைகள் என்று ஒரு கருத்துக்கணிப்பு கூறுகிறது. இளங்கலை மருத்துவக் கல்லூரிகளில் சேர்க்கப்படும் ஒவ்வொரு 10 மாணவர்களுக்கும் ஒரு உடல் தேவைப்படுகிறது. யெச்சூரி தனது உடலை கொடை செய்த டில்லி எய்ம்ஸ் மருத்துவமனை, கடந்த இரண்டு ஆண்டுகளில் 70 உடல்களைப் பெற்றுள்ளது.
எசப்தர்ஜங் மருத்துவமனை மற்றும் வர்தமான் மகாவீர் மருத்துவக் கல்லூரி (VMMC) ஆகியவை கடந்த அய்ந்து ஆண்டுகளில் 24 உடல்களை மட்டுமே நன்கொடையாகப் பெற்றுள்ளன. ராம் மனோகர் லோஹியா மருத்துவமனை மற்றும் அதனுடன் தொடர்புடைய அடல் பிஹாரி வாஜ்பாய் மருத்துவ அறிவியல் நிறுவனம் (ABVIMS) 2019ஆம் ஆண்டில் அதன் எம்.பி.பி.எஸ் படிப்பைத் தொடங்கியதில் இருந்து 18 உடல்களைப் பெற்றுள்ளது. வி.எம்.எம்.சி 150 யு.ஜி பேட்ச் அளவைக் கொண்டுள்ளது (வரவிருக்கும் காலத்தில் 170 மாணவர்கள் அனுமதிக்கப்படுகிறார்கள்) . ஏ.பி.வி.அய்.எம்.எஸ் ஆண்டுதோறும் 100 எம்.பி.பி.எஸ் மாணவர்களை சேர்க்கிறது. குறிப்பிடத்தக்க வகையில், இந்த இரண்டு நிறுவனங்களும் தேசிய தலைநகரில் அமைந்துள்ளன – இந்தியாவின் பிற பகுதிகளில் நிலைமை மோசமாக இருக்கும்.
மருத்துவக் கல்லூரிகள் எப்படி செயல்படுகின்றன?
இந்த பற்றாக்குறைக்கு மத்தியில், மருத்துவக் கல்லூரிகள் தங்கள் மாநிலத்தின் உடற்கூறியல் சட்டத்தின் விதிகளின்படி, உரிமை கோரப்படாத இறந்த உடல்களைப் பயன்படுத்த வேண்டிய கட்டாயத்தில் உள்ளன. பிரத்தியேகங்கள் மாறுபடலாம் என்றாலும், இந்தச் செயல்கள் அனைத்தும் அறிவியலுக்கு உரிமை கோரப்படாத உடல்களைப் பயன்படுத்த அனுமதிக்கின்றன. பெரும்பாலான சட்டங்கள் இறந்தவரின் உடலை 48 மணி நேரத்திற்குள் அல்லது குறைந்தபட்ச நடைமுறை தாமதத்துடன் உறவினர்களால் உரிமை கோர வேண்டும் என்று கூறுகின்றன.
மருத்துவ நெறிமுறைகள் இதழில் வெளியிடப்பட்ட 2020ஆம் ஆண்டு ஆய்வில், கடந்த 25 ஆண்டுகளில் மருத்துவ நிறுவனங்களின் எண்ணிக்கை அதிகரிப்பு மற்றும் மருத்துவம் படிக்கும் மாணவர்களின் எண்ணிக்கையில் அதிவேக அதிகரிப்பு ஆகியவை இறந்த உடல்களின் தேவைக்கு வழிவகுத்தன என்று கூறியது. உரிமை கோரப்படாத உடல்கள் பாரம்பரியமாக மருத்துவ நிறுவனங்களுக்கு முக்கிய ஆதாரமாக இருந்து வருகிறது என்று ஆய்வு மேலும் கூறுகிறது.
இருப்பினும், உரிமை கோரப்படாத பெரும்பாலான உடல்கள் ஏழைகள், ஆதரவற்றவர்கள் மற்றும் பிற விளிம்புநிலை மக்களுடையது என்பதால் இதைச் சுற்றி முக்கிய நெறிமுறைச் சிக்கல்கள் உள்ளன. அதனால்தான், இந்தியாவைப் போலல்லாமல், குறிப்பாக வளர்ந்த நாடுகளில் உள்ள பல நாடுகளில் உடல்கள் ஏற்றுக்கொள்ளப்படுவதற்கு வெளிப்படையான ஒப்புதல் தேவைப்படுகிறது, சிலருக்கு வழக்குரைஞர்கள் முன்னிலையில் உயில் கையொப்பமிட வேண்டும்.
மேலை நாடுகளில் உடல்கள் ஆய்வுக்கு கொடுக்கப்படுவது தொடர் நடைமுறையாக உள்ளது. அதே போல் சீனா மாற்றும் தென் கொரியா போன்ற நாடுகளிலும் உடல் கொடை பொதுவான ஒன்றாக உள்ளது. இதனால் இந்த நாடுகளில் மருத்துவம் பல்வேறு பரிணாமத்தை அடைத்து சிறப்பான வகையில் மருத்துவத்துறை செயல்பட்டு வருகிறது.
