சென்னை, செப். 5- தமிழால் உலகளந்த பெருங்கவிக்கோவின் 90ஆவது ஆண்டு நிறைவு விழா எதிர்வரும் பிப்ரவரி 9, 2025 முழுநாள் தமிழ்ப் பெருவிழாவாகக் கொண்டாடப்பட உள்ளது.
அவர் பணி பாடும் செயல்களை எப்படிச் செயல்படுத்துவது என்று ஆலோசிக்கும் செயல் வீரர்கள் கூட்டம் மே, 4 அன்று சென்னையில் சிறப்பாக நடைபெற்றது. தமிழ் அன்னைக்குத் தமிழ்நாட்டில் முதன்மை வேண்டி 1993இல் தமிழ் நடைப் பயணம் நடந்து, தொடர்ந்து இன்று வரை ஆண்டு தோறும் நடந்து, ஓடி, உந்தி, பறந்து, தமிழ் மொழி, இனம், நாடு தழைக்கப் பல ஆயிரம் பயணங்கள் செய்த பெருங்கவிக்கோவிற்கு அகவை 90.
பெருங்கவிக்கோ கல்லூரி தமிழ் ஆர்வலர்களால் நிர்வகிக்கப்படும் நிறுவனமாக மாற்ற தமிழர்கள் “ஒரு ரூபாய்” ஆவது நன்கொடை வழங்க வழிவகுக்கும் இந்தியத் தமிழர்களுக்கான “பெருங் கவிக்கோவிற்குப் பெருமை சேர்க்க “உங்கள் பங்கு ஒரு உரூபாய்” திட்டத் தையும், ”உலகக் கவியின் உன்னதப் பணிக்கு உங்கள் பங்கு” என்ற அயலகத் தமிழருக்கான திட்ட விவரங் களையும், கல்லூரி அமைக்க இதுவரை நடந்துள்ள பணிகளையும், தமிழ்ப் பணிக் கழகத் தலைவர் வா.மு.சே.கவி அரசன் எடுத்துரைத்தார்.
பாவாணர் கோட்ட நிறுவனர் நெடுஞ்சேரலாதன், பைந்தமிழ் இயக்க நிறுவனர் தமிழாளன் திட்டத்தை செயல்படுத்தும் வழியை விவரித்தனர். மறத்தமிழன் தொலை இணையில் இணைந்தவர்களை ஒருங்கிணைக்க, உலக அன்னதான நாள் நிறுவனர் சாய் இரவிச்சந்திரன், கவிஞர் இரவி பாரதி, பன்னாட்டுத் தமிழுறவு மன்ற இயக்குநர் வா.மு.சே.திருவள்ளுவர், தமிழ் இயலன், தலைநகரத் தமிழ்ச் சங்கத்தின் கணபதி, கவிச்சிங்கம், கண்மதியன் ‘முற்றம்’ ஆசிரியர் தளபதி, சிந்தை வாசன், அம்பேத்கர் மன்றத்தின் நந்தன், கவிக்குயில் கவிஞர் மன்றத்தின் தலைவர் தமிழரசன், பீட்டர், சேக் இரசீது, சிந்தை கோ.சேகர் மற்றும் பலர் பெருங்கவிக்கோ 90 ஆலோசனைக் கூட்டத்தில் கலந்து கொண்டு 2025 கல்வி ஆண்டில், கல்லூரி தொடங்கும் பணிக்குத் தங்கள் ஆதரவைத் தெரிவித்தனர்.
