சத்ரபதி சம்பாஜிநகர், ஆக. 22- மராட்டிய மாநில சட்டப் பேரவைத் தேர்தலில் பாஜகவைத் தோற்கடிக்க எதிர்க் கட்சிகளின் கூட்டணியான மகாராட்டிர விகாஸ் அகாடியில் இணையத் தயாராக இருப்பதாக அசாதுதீன் ஒவைசி தலைமை யிலான அகில இந்திய மஜ்லிஸ் கட்சி அறிவித்துள்ளது.
மஜ்லிஸ் கட்சியின் மராட்டிய மாநில தலைவர் இம்தியாஸ் ஜலீல் கூறுகையில், ‘மக்களவைத் தேர்தல் நடைபெற்றபோதும் பாஜகவைத் தோற்கடிப்பதற்காக மராட்டிய மாநிலத்தில் எதிர்க்கட்சிகள் அணியில் இணைய விருப்பம் தெரிவித்தோம்.
அடுத்து நடைபெறவுள்ள சட்டப் பேரவைத் தேர்தலிலும் அதே நிலைப்பாட்டில்தான் இருக்கிறோம். பாஜகவைத் தோற்கடிக்க வேண்டும் என்பதே எங்கள் நோக்கம்.
ஆனால், எதிர்க்கட்சி கூட்டணியினர் எங்களை சேர்த்துக் கொள்வது என்பது அவர்கள் கையில்தான் உள்ளது. கூட்டணி ஏற்படாவிட்டால் மஜ்லிஸ் கட்சி தனித்துப் போட்டியிடும்.
எங்களை இணைத்துக் கூட்டணியில் கொண்டால், எதிர்க்கட்சிகளுக்குதான் அதிக பலன் கிடைக்கும். எதிர்க் கட்சிகள் அணியில் உத்தவ் தாக்கரே தலைமையிலான சிவசேனா கட்சி இருப்பதால் எங்களுக்கு எந்தப் பிரச் சினையும் இல்லை. பாஜக நாட்டை மோசமான பாதைக்கு கொண்டு செல்கிறது.
எனவே, அக்கட்சியை அனைத்துத் தேர்தல்களிலும் தோற்கடிக்க வேண்டும் என்பதே எங்கள் நோக்கம் என்றார் அவர்.
