நீட்டிக்கப்பட்ட சேலம் – மயிலாடுதுறை மெமு ரயில் ஆனால் குறைவான இடவசதி

திருச்சி, ஆக.18 நீட்டிக்கப்பட்ட சேலம் – மயிலாடுதுறை மெமு ரயிலில் இடவசதி குறைவால் பயணிகள் கடும் அதிருப்தியில் உள்ளனா்.
திருச்சியிலிருந்து மயிலாடு துறைக்கு மாலை 5.30 மணிக்கும், மயிலாடுதுறையிலிருந்து திருச்சிக்கு காலை 6.20 மணிக்கும் பல ஆண்டு களாக இயக்கப்பட்ட பயணிகள் ரயில்கள், கரோனா காலத்தில் முன்பதிவற்ற விரைவு ரயில்களாக மாற்றப்பட்டன.
ரயில்வே நிா்வாகம் கடந்த 08-06-2024 முதல் மேற்கண்ட ரயிலையும், சேலம் – திருச்சி ரயிலையும் இணைத்து, மயிலாடுதுறை – சேலம் – மயிலாடுதுறை விரைவு மெமு ரயில்களாக மாற்றி இயக்கி வருகிறது.
இந்த ரயிலானது, தற்போது சேலத்திலிருந்து பிற்பகல் 2.05 மணிக்குப் புறப்பட்டு, ராசிபுரம், நாமக்கல், மோகனூா், கரூா், குளித்தலை, பேட்டவாய்த்தலை, ஜீயபுரம், முத்தரசநல்லூா், திருச்சி, திருவெறும்பூா், பூதலூா், தஞ்சாவூா், பாபநாசம், கும்பகோணம், ஆடுதுறை, குத்தாலம் உள்ளிட்ட ரயில் நிலையங்கள் வழியாக இரவு 9.45 மணிக்கு மயிலாடுதுறை சென்றடைகிறது. மறுமாா்க்கமாக, காலை 6.20 மணிக்குப் புறப்பட்டு மேற்கண்ட ரயில் நிலையங்கள் வழியாக சேலத்தை பிற்பகல் 1.45 மணிக்குச் சென்றடைகிறது.
சாதாரண 12 அய்சிஎப் பெட்டிகளைக் கொண்ட ரயில்களாக இயக்கப்பட்ட மேற்கண்ட ரயில்களை ரயில்வே நிா்வாகம், தற்போது மெமு ரயிலாக மாற்றிய நிலையில், 4 பெட்டிகளை குறைத்து 8 பெட்டிகளாக மட்டுமே இயக்கப்பட்டு வருகிறது.
முன்பதிவில்லாத இந்த ரயிலில் கல்வி பயிலும் பள்ளி, கல்லூரி மாணவா்கள், பணியாளா்கள், பொதுமக்கள் என ஆயிரக்கணக் கானோா் நாள்தோறும் பயணித்து வருகின்றனா்.திருச்சி – மயிலாடுதுறை – திருச்சி ரயில் சேவை சேலம் வரை நீட்டிக்கப்பட்டதால், பயண நேரமும், செலவும் மிச்சமாகும் என முதலில் மகிழ்ந்த பயணிகள், தற்போது இந்த நீட்டிப்புக்காக வருத்தத்திலும், ரயில்வே துறை மீது கடும் அதிருப்தியிலும் உள்ளனா்.
இதுகுறித்து மயிலாடுதுறை ரயில் பயணிகள் சங்கத்தின் ஒருங்கிணைப்பாளரும், மேனாள் ரயில்வே அதிகாரியுமான தமிழன் கணேசன், ரயில் உபயோகிப்பாளா் சங்க நிா்வாகி கிரி மற்றும் பயணிகள் கூறியதாவது:
சுமாா் 282 கி.மீ. தூரம் பய ணிக்கும் மயிலாடுதுறை – சேலம் மெமு ரயிலில் 8 பெட்டிகள் மட்டுமே உள்ளன. குறிப்பாக, திருச்சியிலிருந்து மாலை 6.05-க்குப் புறப்படும் இந்த ரயிலை தவறவிட்டால், இரவு 10 மணிக்கு மேல்தான் மயிலாடுதுறை வழித்தடத்தில் அடுத்ததாக ரயில்கள் உள்ளன என்பதால் இந்த ரயிலில் பயணிப்போரின் எண்ணிக்கை சற்று அதிகம். இதனால் கரூா், திருச்சி, தஞ்சாவூரில் உள்ளிட்ட ரயில் நிலையங்களில் பயணிகளின் கூட்டம் அதிகளவில் ஏறி, இறங்கும். பெட்டிகள் குறைவாக இருப்பதால், இந்த ரயிலில் உட்கார போதிய இடவசதியில்லாமல், பலா் இருக்கை கிடைக்காமல் நின்று கொண்டே பயணிக்க வேண்டியுள்ளது. கும்பகோணத்துக்குப் பிறகே கூட்டம் குறைவதால், சற்று ஆசுவாசமடைய முடிகிறது.
12 பெட்டிகள் கொண்ட அய்சிஎப் ரயிலாக ஓடிய போது, ஒரு பெட்டிக்கு 2 வீதம் இணைக்கப்பட்ட இரண்டு பெட்டிகளில் 4 கழிவறைகள் இருக்கும். ஆனால் மெமு ரயிலில் இரண்டு பெட்டிகளுக்கு ஒரே ஒரு கழிவறை மட்டுமே உள்ளது. அதுவும் அதிகளவிலான பயணிகளின் உபயோகத்தால் கடும் துா்நாற்றம் வீசுகிறது. இதன் காரணமாக, கா்ப்பிணிகள், வயது முதிா்ந்தோா், சா்க்கரை நோய் உள்ளிட்ட நோயாளிகள் கடும் அவதிக்குள்ளாகி வருகின்றனா். இதனை ரயில்வே நிா்வாகம் கவனத்தில் கொண்டு, மயிலாடுதுறை – சேலம் மெமு ரயிலை 16 பெட்டிகள் கொண்டதாக மாற்றி இயக்க வேண்டும். மேலும், அனைத்து ரயில் நிலையங்களிலும் நின்று பயண நேரத்தை அதிகப்படுத்தும் இந்த ரயிலை பழையபடி பயணிகள் ரயிலுக்கான கட்டணத்தை மட்டுமே வசூலிக்க வேண்டும் என்றனா்.
இதுகுறித்து திருச்சி கோட்ட ரயில்வே அதிகாரிகள் கூறுகையில், சேலம் – மயிலாடுதுறை மெமு ரயிலில் கூடுதல் பெட்டிகள் இணைக்க ரயில்வே நிா்வாகத்திடம் கேட்டுள்ளோம். விரைவில் அனுமதி கிடைத்ததும் 12 பெட்டிகளாக இயக்கப்படும் என்றனா்.
ரயில்வே நிா்வாகம் லாபத்தை மட்டுமே கருத்தில் கொள்ளாமல், பயணிகளின் நலனையும் கருத்தில் கொள்ள வேண்டும் என்பதே அனைவரது எதிா்பாா்ப்பாக உள்ளது

லாப நோக்கத்துடன் மெமு ரயில்கள் மாற்றம்
மெமு ரயில்களில் இருபுறமும் இயங்கும் என்ஜின்கள் மூலம் வேகமாகச் செல்லலாம். ரயில் என்ஜின்களை ரயில் புறப்படத் தொடங்கும் நிலையங்களில் கழட்டி மாற்றும் தொழிலாளா்கள் தேவையில்லை. அய்சிஎப் ரயில்கள் போல அல்லாமல் குறைந்தபட்சத் தொழிலாளா்களைப் பயன்படுத்தி ரயிலை இயக்கலாம். பயணிகளை அதிகளவில் ஏற்றி இறக்கலாம் என்ற லாப நோக்குடன் மட்டுமே ரயில்வேயில் பல ரயில்கள், மெமு ரயில்களாக மாற்றி இயக்கப்படுகின்றன.
குறைந்தபட்ச தூரம் பயணிக்க உகந்ததாகக் கருதப்படும் மெமு ரயில்களை அதிக தூரம் செல்லும் வழித்தடங்களில் இயக்குவது என்பது பயணிகளை மனிதா்களாக மதிக்காத, ரயில்வேயின் லாப நோக்கச் செயலாக மட்டுமே உள்ளது. இதனை ரயில்வே நிா்வாகம் கவனித்து, மக்கள் சேவைக்காக பணியாற்ற வேண்டும் என மேனாள் ரயில்வே அதிகாரி தமிழன் கணேசன் தெரிவித்தாா்.