சென்னை, ஜூலை 1- கால்நடை மருத்துவப் படிப்புகளுக்கு விண்ணப்பித்த மாணவர்கள், விண்ணப்பத்தில் திருத்தம் மேற்கொள்ளவும், விடுபட்ட சான்றிதழை இணைக்கவும் ஜூலை 3 முதல் 5ஆம் தேதி வரை அவகாசம் தரப் பட்டுள்ளது.
தமிழ்நாடு கால்நடை மருத்துவ அறிவியல் பல்கலைக் கழகத்தின்கீழ் சென்னை, நாமக்கல், திருநெல்வேலி, உரத்தநாடு, சேலம் தலைவாசல், உடு மலைப்பேட்டை, தேனி வீரபாண்டி ஆகிய 7 இடங்களில் கால்நடை மருத்துவக் கல்லூரிகள் உள்ளன. இந்த கல்லூரிகளில் அய்ந்தரை ஆண்டுகள் கொண்ட கால்நடை மருத்துவம் – பராமரிப்பு படிப்பு (பிவிஎஸ்சி – ஏஹெச்) உள்ளது.
திருவள்ளூர் மாவட்டம் கோடுவெளியில் உள்ள உணவு – பால்வள தொழில்நுட்ப கல்லூரியில் உணவு தொழில்நுட்பம் (பி.டெக்), பால்வள தொழில்நுட்பம் (பி.டெக்) மற்றும் ஓசூர் மத்திகிரியில் உள்ள கோழியின உற்பத்தி – மேலாண்மை கல்லூரியில் கோழியின தொழில் நுட்பம் (பி.டெக்) ஆகிய பட்டப் படிப்புகள் உள்ளன. இவை 4 ஆண்டு கால படிப்பாகும். பிளஸ் 2 மதிப்பெண் அடிப்படையில் இதற்கு மாணவர் சேர்க்கை நடைபெறும்.
இப்படிப்புகளில் 2024-2025 கல்வி ஆண்டுக்கான மாணவர் சேர்க்கைக்கு https://adm.tanuvas.ac.inஎன்ற இணையதளத்தில் இணைய வழியில் விண்ணப்பிப்பது கடந்த ஜூன் 3ஆம் தேதி காலை 10 மணிக்கு தொடங்கி கடந்த ஜூன் 28ஆம் தேதி மாலை 5 மணியுடன் முடிவடைந்தது.
பிவிஎஸ்சி – ஏஹெச் படிப்புக்கு 14,497 பேர், பிடெக் படிப்புகளுக்கு 3,000 பேர் என மொத்தம் 17,497 பேர் விண்ணப் பித்துள்ளனர். இந்நிலையில், மாணவ, மாணவிகள் இணைய வழியில் விண்ணப்பிக்கும்போது, தவறு செய்திருந்தால், அதற்கான திருத்தங் களை மேற்கொள்ளவும், விடுபட்ட சான்றிதழை இணைக்கவும் ஜூலை 3 முதல் 5ஆம் தேதி வரை 3 நாட்கள் அவகாசம் தரப்பட்டுள்ளது.
பின்னர், விண்ணப்பங்கள் பரிசீலனை செய்யப்பட்டு, ஜூலை இறுதியில் தரவரிசை பட்டியல் வெளியிடப்பட உள்ளது.
