புதுடில்லி, ஆக.25 – கோடிக்கணக்கான மக்கள் பயன்பெறும் ஊரக வேலைவாய்ப்புத் திட்டத்தில், ஆறாயிரத்து 366 கோடி ரூபாயை ஒன்றிய பா.ஜ.க. அரசு வழங்காமல், பாக்கி வைத்துள்ளதாக காங்கிரஸ் தலைவர் மல்லிகார்ஜுன கார்கே குற்றம் சாட்டியுள்ளார்.
மல்லிகார்ஜுன கார்கே வெளியிட்ட சமூக வலைதள பதிவில், கடந்த 2005 ஆம் ஆண்டு இதே நாளில், கோடிக்கணக்கான மக்களின் வேலை உரிமைத் திட்டமாக, மகாத்மா காந்தி தேசிய ஊரக வேலைவாய்ப்பு உத்தரவாதத் திட்டத்தை காங்கிரஸ் அரசு கொண்டுவந்ததை நினைவுகூர்ந்துள்ளார்.
மோடி ஆட்சியில் இத்திட்டத்திற்கான நிதி 33 சதவிகிதம் குறைக்கப்பட்டது டன், 18 மாநிலங்களுக்கு வழங்க வேண்டிய ஆறாயிரத்து 366 கோடி நிதியை வழங்காமல் பாக்கி வைத்துள்ளதையும் அவர் குறிப்பிட்டுள்ளார். ஒன்றிய பா.ஜ.க. அரசின் மக்கள் விரோத போக்கு தொடர்ந்தாலும், இத்திட்டத்தில் தற்போது பணியாற்றும் 14 கோடியே 42 லட்சம் மக்களுக்கு ஆதரவாக காங்கிரஸ் துணை நிற்கும் என்று மல்லிகார்ஜுன கார்கே கூறியுள்ளார்.
ஊரக வேலைவாய்ப்பு திட்டத்தில் பயனடைபவர்களில், பாதிக்கும் மேற்பட்டோர் பெண்கள் என்பதையும் அவர் சுட்டிக் காட்டியுள்ளார். மேலும், கரோனா பெருந்தொற்று ஊரடங்கு காலத்தில், கோடிக்கணக்கான மக்களை, ஊரக வேலைவாய்ப்பு திட்டம் பாதுகாத்ததாக மல்லிகார்ஜுன கார்கே தெரிவித்துள்ளார்.
