போக்குவரத்து மாற்றம் அறிவிப்பு

சென்னை ரிசர்வ் வங்கி சுரங்கப்பாதை ஒருவழிப் பாதையாக மாற்றம்
சென்னை,ஏப்.26- ரிசர்வ் வங்கி சுரங்கப்பாதை ஒருவழிப் பாதையாக மாற்றப்பட்டுள்ளது. இது குறித்து போக்கு வரத்து காவல்துறையினர் நேற்று (25.4.2024) வெளியிட்டுள்ள தகவல் வருமாறு:
ரயில்வே துறை சார்பில் ரிசர்வ் வங்கி சுரங்கப் பாதை பாலத்தில் 4-ஆவது ரயில் இருப்புப் பாதை வழித்தடம் அமைக்கும் பணி நடைபெற உள்ளது. இதையடுத்து, இன்று ( 26-ஆம் தேதி ) இரவு 10 மணி முதல் 3 மாத காலத்துக்கு ரிசர்வ் வங்கி சுரங்கப் பாதை ஒருவழிப் பாதையாக மாற்றப்படுகிறது. அதன் விவரம்: ராயபுரம் பாலம் மற்றும் ராஜாஜி சாலையிலிருந்து காமராஜர் சாலையை நோக்கிச் செல்லும் அனைத்து வாகனங்களும் ரிசர்வ் வங்கி சுரங்கப் பாதையில் ( போர் நினைவிடம் நோக்கி ) அனுமதிக்கப் படாது.
அதற்கு பதிலாக, அவை ரிசர்வ் வங்கி சுரங்கப் பாதை அணுகு சாலை – வடக்கு கோட்டை சாலை – முத்துசாமி சாலை – முத்துசாமி பாலம் – வாலாஜா பாயின்ட் – கொடிமரச் சாலை – போர் நினைவுச் சின்னம் வழியாக காமராஜர் சாலையை அடையலாம். காமராஜர் சாலையிலிருந்து பாரி முனை நோக்கி வரும் வாகனங்கள் ரிசர்வ் வங்கி சுரங்கப்பாதை வழியாக வழக்கம் போல் இயக்கப்படும். இவ்வாறு போக்குவரத்து காவல்துறையினர் தெரிவித்துள்ளனர்.