எகிப்தில் நடைபெறும் பன்னாட்டு துப்பாக்கி சுடுதல் சம்மேளனத்தின் (அய்எஸ்எஸ்எஃப்) உலகக் கோப்பை போட்டியில் இந்தியாவின் சோனம் மஸ்கர் வெள்ளிப் பதக்கம் வென்றார்.
10 மீட்டர் ஏர் ரைஃபிள் மகளிர் தனிநபர் பிரிவு இறுதிச்சுற்றில் அவர், 252.1 புள்ளிகளுடன் 2-ஆம் இடம் பிடித்தார். அவரை விட 9 புள்ளிகள் அதிகம் பெற்ற ஜெர்மனியின் அனா ஜான்சென் தங்கமும், போலந்தின் அனிடா ஸ்டான்கிவிஸ் வெண்கலப் பதக்கமும் பெற்றனர். சோனத்துக்கு இது முதல் உலகக் கோப்பை போட்டியாகும்.
முன்னதாக நடைபெற்ற தகுதிச்சுற்றில், சோனம் 632.7 புள்ளிகளுடன் 5-ஆம் இடமும், மற்றொரு இந்தியரான நான்சி 633.1 புள்ளிகளுடன் 4-ஆவது இடமும் பிடித்து இறுதிச்சுற்றுக்கு வந்தனர். அதில் சோனம் மட்டும் பதக்கம் வெல்ல, நான்சி 8-ஆம் இடம் பிடித்தார். இதிலேயே ஆடவர் பிரிவில் திவ்யன்ஷ் சிங் பன்வர் உலக சாதனையுடன் ஞாயிற்றுக்கிழமை தங்கப் பதக்கம் வென்றது குறிப்பிடத்தக்கது.
5-ஆம் இடம்: 25 மீட்டர் பிஸ்டல் மகளிர் தனிநபர் பிரிவில் இந்தியாவின் சிம்ரன்பிரீத் கவுர் பிரார் 5-ஆம் இடம் பிடித்தார். ரிதம் சங்வான், மானு பாக்கர் ஆகியோர் தகுதிச்சுற்றுடன் வெளியேறினர். போட்டி தொடங்கி 3 நாள்களில், பதக்கப் பட்டியலில் இந்தியா 2 தங்கம், 3 வெள்ளி என 5 பதக்கங்களுடன் முதலிடத்தில் நீடிக்கிறது.
