வாஷிங்டன், ஜன. 11– அய்ரோப்பிய நாடான டென்மார்க்கிடம் இருந்து கிரீன்லாந்தை கைப்பற்ற அமெரிக்கா புதிய வியூகத்தை வகுத்துள்ளது.
ஆர்டிக் பகுதியில் உலகின் மிகப்பெரிய கிரீன்லாந்து தீவு அமைந்திருக்கிறது. பிரான்ஸ், ஜெர்மனி, பிரிட்டன், ஸ்பெயின், இத்தாலி ஆகிய அய்ரோப்பிய நாடுகளின் பரப்பளவுக்கு இணையாக கிரீன்லாந்து பரந்து விரிந்துள்ளது.
கடந்த 1814ஆம் ஆண்டு முதல் இந்த தீவு அய்ரோப்பிய நாடான டென்மார்க்கின் கட்டுப்பாட்டின் கீழ் உள்ளது. ஆர்டிக் பகுதியில் மிக நீண்டகாலமாக ரஷ்யா ஆதிக்கம் செலுத்தி வருகிறது.
அண்மைகாலமாக சீனாவும் ஆர்டிக்கில் கால் பதித்து தனது ஆதிக்கத்தை நிலைநாட்ட தீவிர முயற்சி செய்து வருகிறது. இந்த சூழலில் பாதுகாப்பு காரணங்களுக்காக கிரீன்லாந்து தீவு அமெரிக்காவுடன் இணைக்கப்படும் என்று அதிபர் டிரம்ப் அண்மையில் தெரிவித்தார்.
இதுதொடர்பாக பிரிட்டன், பிரான்ஸ், ஜெர்மனி, இத்தாலி, போலந்து, ஸ்பெயின், டென்மார்க் ஆகிய நாடுகள் ஒன்றிணைந்து வெளியிட்ட அறிக்கையில், “கிரீன்லாந்தில் வசிக்கும் மக்களுக்கே அந்த தீவு சொந்தம். இதை வேறு யாரும் சொந்தம் கொண்டாட முடியாது. கிரீன்லாந்தின் எதிர்காலத்தை டென்மார்க், கிரீன்லாந்து மட்டுமே முடிவு செய்ய முடியும்” என்று தெரிவிக்கப்பட்டது.
டென்மார்க் பிரதமர் மெட்டே பிரடெரிக்சன் கூறும்போது, “கிரீன்லாந்தை அமெரிக்கா கைப்பற்ற முயன்றால் நேட்டோ கூட்டமைப்பு உடைந்து சிதறும். அமெரிக்காவின் கோரிக்கையை நாங்கள் ஒருபோதும் ஏற்க மாட்டோம்” என்று தெரிவித்தார்.
தன்னாட்சி அதிகாரத்துடன் தனி நாடாளுமன்றத்துடன் கிரீன்லாந்து செயல்பட்டு வருகிறது. பிரதமராக ஜென்ஸ் பிரடெரிக் நெல்சன் பதவி வகிக்கிறார். அவர் கூறும்போது, “கிரீன்லாந்து விற்பனைக்கு அல்ல. எங்கள் தீவை அமெரிக்கா சொந்தம் கொண்டாட முடியாது” என்று தெரிவித்தார்.
இந்த சூழலில் கிரீன்லாந்தை கைப்பற்ற அமெரிக்கா புதிய வியூகத்தை வகுத்திருக்கிறது. இதுதொடர்பாக அமெரிக்க அரசு வட்டாரங்கள் கூறியதாவது: பாதுகாப்பு காரணங்களுக்காக கிரீன்லாந்து தீவை அமெரிக்காவுடன் இணைக்க முடிவு செய்திருக்கிறோம். தற்போது கிரீன்லாந்து தீவில் சுமார் 57,000 பேர் வசிக்கின்றனர். அவர்களுக்கு தலா ஒரு லட்சம் டாலர் (ரூ.90 லட்சம்) வழங்க முடிவு செய்யப்பட்டு இருக்கிறது. இதன்மூலம் கிரீன்லாந்து மக்கள் அமெரிக்காவுக்கு ஆதரவு அளிப்பார்கள். எந்த வகையிலாவது கிரீன்லாந்து தீவை விலை கொடுத்து வாங்குவோம். இல்லையென்றால் ராஜ்ஜியரீதியில் பேச்சுவார்த்தை நடத்தி கிரீன்லாந்தை அமெரிக்காவுடன் இணைப்போம்.
இதுதொடர்பாக அமெரிக்க வெளியுறவு அமைச்சர் மார்கோ ரூபியோ அடுத்த வாரம் டென்மார்க் தலைவர்களை சந்தித்துப் பேசுவார். கடந்த 1917ஆம் ஆண்டில் டென்மார்க்கிடம் இருந்து வெர்ஜின் தீவுகளை விலைக்கு வாங்கினோம். அதேபோன்று இப்போது கிரீன்லாந்தை வாங்குவோம். தேவைப்பட்டால் ராணுவ நடவடிக்கை எடுக்கவும் தயங்க மாட்டோம். இவ்வாறு அமெரிக்க அரசு வட்டாரங்கள் தெரிவித்தன.
