கோயம்புத்தூர்

கோவை மாநகரம்: தொழில் முனைவோரின் சாம்ராஜ்யமும், கல்வி மய்யத்தின் எழுச்சியும், மெட்ரோவின் அவசியமும்.

தென்னிந்தியாவின்
மான்செஸ்டரின் பரிணாமம்

ஒரு காலத்தில் இதமான காலநிலையும், பஞ்சாலைகளின் சத்தமும் மட்டுமே நிறைந்திருந்த கோயம்புத்தூர், இன்று தென்னிந்தியாவின் மிக முக்கியப் பொருளாதார மய்யங்களில் ஒன்றாக பேருரு எடுத்துள்ளது. அமைதியான ஓய்வுக்கால நகரமாக அறியப்பட்ட கோவை, இன்று பரபரப்பான தகவல் தொழில்நுட்பப் (அய்டி) பூங்காக்கள், நவீன மருத்துவமனைகள் மற்றும் உயர்கல்வி நிறுவனங்களின் நகரமாக மாறி நிற்கிறது. காந்திபுரத்தையும், டவுன்ஹாலையும் மட்டுமே மய்யமாகக் கொண்டிருந்த நகரம், இன்று அவிநாசி சாலை, திருச்சி சாலை, சத்தி சாலை என அனைத்துத் திசைகளிலும் பல கிலோமீட்டர்கள் விரிவடைந்துவிட்டது. குறிப்பாக சரவணம்பட்டி, ஈச்சனாரி போன்ற பகுதிகள் புதிய துணை நகரங்களாகவே உருவாகிவிட்டன.

வளர்ச்சியின் இரட்டை இன்ஜின்கள்: தொழிற்துறையும், கல்வியும்!

மதுரையின் வளர்ச்சிக்குக் கட்டணமில்லாப் பேருந்து திட்டம் ஒரு முக்கிய உந்துசக்தியாக இருந்தது போல, கோவையின் அசுர வளர்ச்சிக்கு இரண்டு முக்கிய காரணிகள் உள்ளன.

முதலாவது, கோவையின் ரத்தத்தில் ஊறிய “தொழில்முனைவு கலாச்சாரம்” (Entrepreneurship). சிறு குறு தொழில்கள் (MSMEs), பம்ப் செட் உற்பத்தி மற்றும் ஜவுளித்துறை ஆகியவை ஏற்படுத்திய பொருளாதார அடித்தளம் மிக வலுவானது.

இரண்டாவது, கடந்த 20 ஆண்டுகளில் ஏற்பட்ட “கல்வி நிலையங்களின் பெருக்கம்”. நூற்றுக்கணக்கான பொறியியல் கல்லூரிகள், கலை அறிவியல் கல்லூரிகள் கோவையைச் சுற்றி உருவானது. இது தமிழ்நாடு மட்டுமல்லாது, கேரளா மற்றும் வட இந்திய மாணவர்களையும் பெருமளவில் ஈர்த்தது. படித்து முடித்தவுடன் இங்கேயே வேலையில் சேரும் ஒரு பெரிய இளைஞர் பட்டாளம் உருவானது, தகவல் தொழில்நுட்ப (அய்.டி.) நிறுவனங்களின் வருகைக்கு இது சிவப்புக் கம்பளம் விரித்தது.

மக்கள் தொகை பெருக்கமும், போக்குவரத்துச் சவாலும்!

தொழில் மற்றும் கல்வி வாய்ப்புகள் பெருகப் பெருக, மக்கள் தொகை செங்குத்தாக உயர்ந்தது. கோயம்புத்தூர் மாநகரப் பகுதியின் மக்கள் தொகை (Greater Coimbatore Area) ஏற்கெனவே 20 லட்சத்தைக் கடந்துவிட்டது.

இந்த அபரிமிதமான வளர்ச்சியின் உடனடிப் பக்கவிளைவு, தாங்க முடியாத போக்குவரத்து நெரிசல். குறுகலான சாலைகள், பெருகிவரும் தனிநபர் வாகனங்கள், கனரகத் தொழில்துறை வாகனங்களின் இயக்கம் ஆகியவை கோவையின் சாலைகளைத் திணறடித்து வருகின்றன. அவிநாசி சாலையில் ஒரு முனையில் இருந்து மறுமுனைக்குச் செல்வது ஒரு மிகப்பெரிய சவாலாக மாறிவிட்டது.

கோவையின் தேவை: மெட்ரோ ரயில்

20 லட்சத்திற்கும் அதிகமான மக்கள் தொகை, நாளுக்கு நாள் விரிவடையும் நகர எல்லைகள், மற்றும் பல்லாயிரக்கணக்கான கோடி வர்த்தகம் நடைபெறும் ஒரு நகரத்திற்கு, தற்போதைய பேருந்து மற்றும் தனிநபர் வாகனப் போக்குவரத்து முறை எந்த வகையிலும் தீர்வாகாது.

கோவையின் பொருளாதார வளர்ச்சியைத் தக்கவைக்கவும், மக்களின் பயண நேரத்தை மிச்சப்படுத்தவும் “மெட்ரோ ரயில்” திட்டம் உடனடியாகத் தேவைப்படுகிறது. விமான நிலையம், ரயில் நிலையங்கள், முக்கியப் பேருந்து நிலையங்கள், அய்டி பூங்காக்கள் மற்றும் தொழில்பேட்டைகளை இணைக்கும் ஒரு மெட்ரோ வலையமைப்பு, கோவையின் எதிர்காலத்திற்கு மிக அவசியம். இது வெறும் போக்குவரத்துத் திட்டம் மட்டுமல்ல, கோவையின் அடுத்த 25 ஆண்டுகால வளர்ச்சிக்கான உயிர்நாடித் திட்டம்.