சென்னை அக்.4- வடகிழக்கு பருவமழை இந்த மாதத்தின் இரண்டாவது அல்லது மூன்றாவது வாரத்தில் தொடங்கவிருக்கும் நிலையில், சென்னை மெட்ரோ ரயில் நிறுவனத்தின் இரண்டாம் கட்டப் பணிகள் நடைபெறும் பகுதிகளில் மழை வெள்ளத்தைத் தடுக்கப் போதிய முன்னெச்சரிக்கை நடவடிக்கைகள் எடுக்கப்பட்டுள்ளன.
இதற்காக, கட்டுமானப் பகுதிகளில் மழைநீர் தேங்குவதைத் தடுக்கும் விதமாக, சிறியது மற்றும் பெரியது எனப் பல்வேறு திறன் கொண்ட 603 தண்ணீர் பம்புகள் தயார் நிலையில் வைக்கப்பட்டுள்ளன என்று சென்னை மெட்ரோ ரயில் நிறுவன அதிகாரிகள் தெரிவித்துள்ளனர். இந்தத் திறன் வாய்ந்த பம்புகள் மூன்று முக்கிய வழித்தடங்களில் பிரிக்கப்பட்டு தயார் நிலையில் உள்ளன. இதன் மூலம், மழைக் காலத்தில் ஏற்படக்கூடிய எந்தவொரு சூழ்நிலையையும் சமாளிக்க மெட்ரோ ரயில் நிர்வாகம் தயாராக இருப்பதாக அதிகாரிகள் தெரிவித்துள்ளனர்.
மேலும், சென்னை மாநகராட்சி, மெட்ரோ ரயில் நிறுவனம், நீர்வளத் துறை மற்றும் நெடுஞ்சாலைத் துறை ஆகியவை இணைந்து ஒரு தொழில்நுட்பக் குழுவை அமைத்துள்ளன. கடந்த ஆண்டைப் போலவே, இந்த ஆண்டும் சென்னையில் 27 இடங்களில் மழைநீர் வடிகால் மற்றும் முன்னெச்சரிக்கை நடவடிக்கைகள் எடுக்கப்பட வேண்டிய பகுதிகளை இந்தக் குழு அடையாளம் கண்டுள்ளது.
இந்தப் பகுதிகளில் மாநகராட்சி மற்றும் மெட்ரோ ரயில் நிர்வாகம் எடுக்க வேண்டிய நடவடிக்கைகள் குறித்து குழு தெளிவுபடுத்தியுள்ளது, அதன் அடிப்படையில் தேவையான நடவடிக்கைகள் எடுக்கப்படும் என்று அதிகாரிகள் கூறியுள்ளனர்.
