எல் சால்வடாரில் குற்றங்கள் குறைக்கப்பட்டனவா?

எல் சால்வடாரில் குற்ற விகிதங்கள் பெருமளவில் குறைந்ததற்குக் காரணம், அந்நாட்டு அதிபர் நயிப் புக்கேலே மேற்கொண்ட கடுமையான நடவடிக்கைகளே ஆகும். 2015ஆம் ஆண்டு உலகின் அதிகமான கொலை நடக்கும் நாடுகளில் ஒன்றாக இருந்த எல் சால்வடார், 2024ஆம் ஆண்டில் 98% குற்றங்கள் குறைந்து, அமைதியான நாடாக மாறியுள்ளதாகத் தெரிவிக்கப்பட்டுள்ளது.

புக்கேலேவின் கடுமையான நடவடிக்கைகள்

2022ஆம் ஆண்டு மார்ச் மாதம் கொலைகள் அதிகரித்தபோது, புக்கேலே ஒரு “விதிவிலக்கு நிலையை” (State of exception) அறிவித்தார்.

இந்த நிலையில், மக்களின் அடிப்படை உரிமைகள் நிறுத்தி வைக்கப்பட்டன. வாரண்ட் இல்லாமல் கைது செய்ய அனுமதி வழங்கப்பட்டது. இந்த நடவடிக்கையின் கீழ், 85,000க்கும் மேற்பட்ட கும்பல் உறுப்பினர்கள் கைது செய்யப்பட்டனர். இப்படிக் கைது செய்யப்பட்டவர்களை அடைப்பதற்காக CECOT என்ற உலகின் மிகப்பெரிய சிறையை அவர் கட்டினார். இந்தச் சிறையில் பின்பற்றப்பட்ட விதிமுறைகள் மிகவும் கடுமையானவை:

படுக்கைகள் மற்றும் மெத்தைகள் இல்லாத நெரிசலான அறைகள். உயிர் வாழ்வதற்குத் தேவையான குறைந்தபட்ச உணவு. 24 மணி நேரமும் அணையாத விளக்குகள். குடும்பத்தினருடனும், வழக்குரைஞர்களுடனும் எந்தத் தொடர்பும் இல்லை.  கைதிகள் விலங்கிடப்பட்டு, அவமானகரமான நிலையில் அரசு ஊடகங்களில் காட்டப்பட்டனர்.

இதன் காரணமாக, குற்ற விகிதங்கள் குறைந்தன, மக்களின் பாதுகாப்பு உணர்வு உயர்ந்தது. இந்த நடவடிக்கைகளுக்குப் பிறகு, புக்கேலேவின் மக்கள் ஆதரவு 90%-க்கும் அதிகமாக உயர்ந்தது.

சமூகத்தில் குற்றங்களை அடக்குவதற்கு இது போன்ற கடுமையான நடைமுறைகள் தேவையா என்பது ஒரு சிக்கலான கேள்வி. இந்தக் கொள்கைகள் குறுகிய காலத்தில் வெற்றியைத் தந்தாலும், அவை சில முக்கியமான கேள்விகளை எழுப்புகின்றன.

மனித உரிமைகள் மீறல்

புக்கேலேவின் நடவடிக்கைகள் மனித உரிமைகளை மீறுவதாகக் குற்றம்சாட்டப்படுகின்றன. வாரண்ட் இல்லாமல் கைது செய்வது, வழக்குரைஞர் உதவி மறுப்பது, மற்றும் குடும்பத்துடன் தொடர்புகொள்ள அனுமதிக்காமல் இருப்பது போன்றவை ஜனநாயக நாட்டில் ஏற்றுக்கொள்ள முடியாதவை.

சட்டத்தின் ஆட்சிக்கு சவால்: ஓர் அரசாங்கம் சட்டம் மற்றும் நீதித்துறையின் அடிப்படைக் கொள்கைகளை மீறி செயல்படும்போது, அது சட்டத்தின் ஆட்சிக்கு மிகப்பெரிய சவாலாக அமைகிறது.

நீண்டகால விளைவுகள்: இந்தக் கடுமையான அடக்குமுறை நீண்டகாலத்தில் சமூகத்திற்கு என்ன விளைவுகளை ஏற்படுத்தும் என்பது உறுதியற்றது. இதுபோன்ற அடக்குமுறைகள் மறைமுகமாக அமைதியின்மைக்கும், எதிர்காலத்தில் வன்முறைக்கும் வழிவகுக்கலாம்.

எல் சால்வடாரின் கதை, ஒரு சர்வாதிகார ஆட்சியின் கீழ் உடனடியாக ஒரு நாட்டின் நிலையை எப்படி மாற்ற முடியும் என்பதற்கு ஒரு குறிப்பிடத்தக்க உதாரணம். ஆனால், அரசை எதிர்ப்போரை – மாற்றுக் கருத்துக் கொண்டோரை எந்தவிதமான ஆதாரங்களும் இன்றிக் கைது செய்யும் யதேச்சதிகாரமிக்க அரசு ஆபத்தானதாகவே முடியும்.